तीतुस 3 - सिरमौरी नौवाँ नियम

मसीही कै जैशणा चाल-चलन

¹ बिशवाशी लोगौ खै याद दिया, कै राज्यपाल औरौ औधिकारियो का आदर कौरौ, औरौ तिनकी आज्ञा मानौ, औरौ तिनुखै औकै सौबै आछै काम कौरणै चैंई।

² कोसी कै बदनाम नी कौर, औरौ शान्त स्‍वभाव कै हौंव औरौ सौबी आदमी कै साथै बौड़ै शराफत कै साथै रौव।

³ जिथुकै आमै बै इदै आगै मूर्ख, औरौ पौरमेशवर कै आज्ञा ना मानणोवाल़ै, लोगौ शै धौखा खाणौवाल़ै थिए, आमुए हर भान्त कै बुरै काम कौरे जू आमै कौरणा चोऊं थिए औरौ जिथु कौरणौ दा आमु मौज़ा आंव थिया। आमै आपणा सौमय बुरै तरीकै शै बर्ताव कौरणौ दै औरौ ओकी लोगौआरी ज़लन कौरणौ दै बितौऊं थिए, औरौ आमै नफरत कै लायक थिए; हर कुणिए आमुआरी नफरत कौरौ थिए औरौ आमै तिनुआरी नफरत कौरु थिए।

⁴ पौरौ तोबै बै, अमारै उध्दारकर्ता पौरमेशवरे लोगौ कै प्रति आपणी दया औरौ प्यार दिखोऊवा।

⁵ तैणै आमु अमारै पापौ कै सौजा शै बौचौऊवै, औरौ ऐजौ धार्मिक कामौ की बौजैह शै नी, जू आमुए आपी कौरे, पौरौ बौजैह शै जू तैणै आमु पांदी दया कौरे राए। पौरमेशवरे आमु नौवाँ जीवन दैय राए। तैणै अमारै पापौ कै आमुवा दै दूर कौरे दिए औरौ आमु इथ लायक बाणै कै आमै ऐक नौवें तरीकै शै बर्ताव कौरणा शुरु कौरु। तैणै आपणै पवित्र आत्मा कै अमारै भीतरै राखैयौ ऐशै कौरे राए।

⁶ पौरमेशवरे दया शै उध्दारकर्ता यीशु मसीह कै दवारा आमु पवित्र आत्मा भरपूरी दैय राए।

⁷ पौरमेशवरे ऐशै इथकारिए कौरौ ताकि आपणै अनुग्रह शै सै आमु आपणै साथै सोही ठोहराए सौकौ, औरौ आमै तैसकै संतान बौणै सौकु औरौ इथकारिए बिशवाश कै साथै सौदा आशा राखै सौकु।

⁸ ऐजै बात साची औसौ। जू मोऐं इबी लैखै राए, औरौ हांव चोऊं, कै तू इनु बातौ खै बिशवाशियौं कै शिखा, इथकारिए कै जिनुवै पौरमेशवर पांदी बिशवाश कौरे राए, सै आछै काम कौरणौ कारिए आपणा सौमय दैणौ दा ध्यान लांव। सौबी कारिए ऐजी शिक्षाए आछी औसौ औरौ फायदैमंद औसौ।

कौल़ेशौ कैईंदै बौचौ

⁹ पौरौ मूर्खता खै बैहस-बाजी, औरौ पुराणिया कै पीढ़ी की लाम्बी चौड़ी सूची औरौ विरोध कौरणौवाल़ै औरौ झोगड़े शै दूर रौव जू मूसा कै कानून कै बारै मुंजी औसौ। जिथुकै ऐजी बातौ कोसी की मौदद ना कौरौ औरौ ना तिनका किछै बै फायदा आथी।

¹⁰ ताखै कम सै कम दो बैई तिनु लोगौ कै चैतावणी दैणी चैंई जू कलीसिया दै फूट पौड़ांव, कै सै ऐशै कौरणौ बंद कौरे दैंव। इथकै बाद, तिनुवांदो दूर रौणौ चैंई।

¹¹ तुऐं पाको जाणै पाव कै ऐशणा आदमी जाणै बौझेयौ पाप कौरौ, औरौ तैसकै बुरै काम साबित कौरौ कै सै दोषी औसौ।

आखरी सौंदेश

¹² हांव जोबै क्रेते टापू पांदी भाई अरतिमास औरौ भाई तुखिकुस खै छाडु़, तौ मैरै धोरे निकुपुलिस शहर आणौ खै कौचिश कौरेया जिथै मोऐं जाड़ै कै मीनै काटणौ कै ठाणै राए।

¹³ जोबै वकील जेनास औरौ अपुल्लोस आपणै यात्रा कारिए निकल़ौ, तौ तिनकै मौदद कारिए जू किछै तू कौरे सौकै, कौरेया। यात्रा दै जिनु चीज़ौ कै जिनकी तिनु जौरुरत औसौ सैजी चीज़ौ तिनुकै दै ताकि यात्रा कौरदै बैई तिनु किछै बै कमी नी हौंव।

¹⁴ सिरफ ऐशैखैई नी, पौरौ तू बिशवाशियौं कै शिखांदा रो कै सै आछै काम कौरणौ कै लगातार मैहनत कौरदै रौंव ताकि तिनु लोगौ की जौरुरतौ पूरी कौरे सौकौ जिनुवागै जौरुरत की चीज़ौ ना आथी। ऐजै बात बिशवाशियौं कै शिखा कै सै बैकार कै जिन्दगी ना जियौं।

¹⁵ मैरै साथै इथै कै सौबै बिशवाशी ताखै नमशकार कौरौ। औरौ तिथै क्रेते टापू कै अमारै बिशवाशी साथी जू आमुआरी प्यार कौरौ, तिनुखै नमशकार बौलेया। हांव प्रार्थना कौरु कै प्रभु तुऔं सौबी पांदी अनुग्रह कौरौ।