रोमियों 16 - सिरमौरी नौवाँ नियमबोईण फीबे का स्वागत 1 हांव तुऔं शै फीबे कारिए, जू साथी बिशवाशी बोईण औरौ किंख्रिया नोगर कै कलीसिया कै सैविका औसौ, हांव चोऊं कै तुऐं तियौं का आदर कौरौ। 2 कै जू प्रभु कै औसौ, तियौं का स्वागत कौरौ, औरौ जैसी कोसी बात दै तियौंकै तुऔं लोगौ शै मौदद चैंई, तियौंकै मौदद कौरौ; जिथुकै सै बै बौहितै कै यानी मैरी बै मौदद कौरणौवाल़ी हौए रौए। रोम देश कै संतौ का स्वागत 3 प्रिस्का जू कै अक्विला कै घोरवाल़ी औसौ जू मसीह यीशु दै मैरै मौददगार औसौ। मैरा नमशकार। 4 तिनुऐ मैरै जान कै खातिर आपणै जान खतरै दै पाए राए थी, औरौ सिरफ हांव ही नी, पौरौ बैगानै यहूदी लोगौ कै सौबै कलीसियाएं बै तिनका धन्यवाद कौरा। 5 औरौ तियौं कलीसिया कै बै नमशकार जू तिनकै घोरे कौठै हौंव। मैरै प्यारे इपैनितुस कै जू एशिया प्रदेश शै मसीह पांदी बिशवाश कौरणौवाल़ा पोयला आदमी थिया। नमशकार। 6 मरियम कै जियैं तुऔं कारिए बैजाए मैहनत कौरे, नमशकार। 7 अन्द्रुनीकुस औरौ यूनियास कै जू मैरै साथी यहूदी औसौ, औरौ मैरै साथै कैदी बै थिए औरौ चोणेयौंदे चैलै तिनु आछै शै जाणौए, औरौ ऐजै दुईनै जोणे मुं दै आगै मसीह दै आए गौवै थिए, नमशकार। 8 अम्पलियातुस कै, जू प्रभु दा मैरा प्यारा औसौ, नमशकार। 9 उरबानुस कै, जू मसीह दा अमारा मौददगार औसौ, औरौ मैरै प्यारे इस्तखुस कै नमशकार। 10 अपिल्लेस पौरखै जाणौ कै बाद बै जैसका बिशवाश मसीह दा जारी रौआ, नमशकार। अरिस्तुबुलुस कै परिवार कै नमशकार। 11 मैरै साथी यहूदी हेरोदियोन कै नमशकार। नरकिस्सुस कै परिवार कै जू प्रभु कै औसौ, तिनुखै नमशकार। 12 बोईण त्रुफेना औरौ त्रुफोसा कै जू प्रभु दै मैहनत कौरौ, नमशकार। प्यारे बोईण पिरसिस कै, जियैं प्रभु दै बैजाए मैहनत कौरे, नमशकार। 13 रूफुस कै जू प्रभु कै सेवा दा तिनकै खास काम कौरणौवाल़ा औरौ तैसकै माँ कै जू मैरै बै ऐक माँ कै जैशणै औसौ, नमशकार। 14 असुक्रितुस औरौ फिलगोन औरौ हिर्मेस औरौ पत्रुबास औरौ हिर्मास औरौ तिनकै साथै बिशवाशी भाईयों कै नमशकार। 15 फिलुलुगुस औरौ यूलिया औरौ नेर्युस औरौ तैसकै बोईण, औरौ उलुम्पास औरौ तिनकै साथौ कै सौबै पवित्र लोगौ कै नमशकार। 16 आपी मुंजी हाथ जौड़ेयौ ऐकी दूजै कै नमशकार कौरौ: तुऔं कै मसीह कै सौबै कलीसियाओं कै ढौबौशा नमशकार। आखिरी सलाह 17 ऐबै ओए रै बिशवाशी भाईयों, हांव तुऔं कैईंदै बिन्ती कौरु, कै सैजै लोग जिनकै बौजैह शै ओकी लोगौ कै बिशवाश खत्म हौए जांव, सै ऐशणै काम कौरौ जू बटंवारै कै बौजैह बौणौ कै तुऐं तिनु लोगौ शै चौकश औरौ दूर रौव। 18 जिथुकै ऐशणै लोग अमारै प्रभु मसीह कै नी, पौरौ आपणै सेवा कौरौ, सै सुन्दर शब्दो कै इस्तैमाल कौरौ औरौ सै लोगौ कै चापलूसी कौरौ; ऐशैखैई सै निर्दोष लोगौ खै धौखा दैंव। 19 सौबवे जाणौ कै तुऐं प्रभु कै आज्ञाकारी औसौ; इथकारिए हांव तोंवारै बारै मुंजी आनन्द कौरु; पौरौ हांव ऐजौ चोऊं, कै का आछौ औसौ ऐजौ जाणणौ दै बुध्दिमान, पौरौ बुराई कौरणौ दै निर्दोष रौव। 20 शान्तै का पौरमेशवर शैतान कै नाश कौरे दैला औरौ तैसी तोंवारै अधीन कौरे दैला। अमारै प्रभु यीशु मसीह का अनुग्रह तुऔं पांदी हौंदा रौंव। पौलुस कै दोस्तो शै स्वागत 21 तीमुथियुस मैरा मौददगार औसौ, औरौ लुकियुस औरौ यासोने औरौ मैरै साथी यहूदी लोग तुऔं कै बधाई दैय लोए। 22 मोऐं, तिरतियुसे जू पौलुस कारिए ऐजी चिट्ठी लैखै लोए, औरौ आपणै नमशकार कै भैजै लौआ। हांव बै प्रभु का ऐक चैला औसौ। 23 गयुस बै तुऔं कै आपणा नमशकार भैजौ। हांव तैसकै घोरे रोऊं जिथै कलीसिया कौठी हौंव। इरास्तुस, जू शहर कारिए पौयसै कै मामलै कै दैखौ, औरौ अमारै भाई क्वारतुस का तुऔं कै नमशकार। 24 हांव प्रार्थना कौरु कै अमारै प्रभु यीशु मसीह का अनुग्रह तुऔं पांदी हौंदा रौंव। आर्शीवाद 25 ऐबै जू तुऔं कै जैसी सुसमाचार का हांव प्रचार कौरु तुऔं खै बिशवाश दै मोजबूत बाणु, तैसी भैद कै पेयाशै कै हिसाब शै जू हमैशा शै छिपैयौंदा रौआ। 26 पौरौ ऐबै प्रगट हौयौ हमैशा कि आज्ञा लैई पौरमेशवर कै बातौ बौताणौवाल़ै जू बातौ लैखै रैई तिथकै दवारा सौबै जाति कै बौताए राए, कै सै बिशवाश लैई आज्ञा मानणोवाल़ै हौए जांव। 27 तैसी एकमात्र बुध्दिमान पौरमेशवर कि यीशु मसीह कै दवारा युग-युग महिमा हौंदी रौंव। आमीन। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation