प्रकाशितवाक्य 19 - सिरमौरी नौवाँ नियम

स्वर्ग दै पौरमेशवर कै स्तुति

¹ जोबै बलवान स्‍वर्गदूतै बौल़ाणौ खत्म कौरौ, मोऐं जू शुणु सै ऐशैकै थियु जैशै स्वर्ग दै बौहितै सारै लोगै गाए लौ हौल़ौ, “हालेलुय्याह! मोक्ति, औरौ महिमा, औरौ अनौखी शौकतै अमारै पौरमेशवर का ही औसौ।

² तैसकै स्तुति कौरौ जिथुकै तैसकै सौबै फोयसलै सोही औरौ साची औसौ। तैणै मशहूर वेश्या का न्याय कौरा जिथुकै तियैं दुनिया कै लोगौ कै पाप कौरणौ कारिए ऊकसाए। पौरमेशवरे वेश्या का न्याय कौरा जिथुकै पौरमेशवर कै सेवक वेश्या कै दवारा मारै गौवै थिए।”

³ तोबै दुजाल़ियो तिनुऐ बौल़ौ, “हालेलुय्याह! बाबेल शहर कै नष्ट कौरणौवाल़ै आगी पौरैशा निकौलणौ वाल़ा धुआँ कौलोंई बै भौफकणा बंद ना हौंदा।”

⁴ तोबै चौबीश पुराणिया औरौ चारै प्राणीए उदे झोकैयौ पौरमेशवर कै ढाल़ कौरे, जू सिंहासनों पांदी बौठेयौंदा थिया, औरौ बौल़ौ, “आमीन! पौरमेशवर कै बौड़ाए हौंव!”

⁵ औरौ तोबै मोऐं कोसी कै बौलांदै बैई शुणा, औरौ ऐशैखै जाणियुं जैशै ऐजी आवाज़ पौरमेशवर कै सिंहासन कैईंदै आए रौली। तैणै बौल़ौ, “ओए रै अमारै पौरमेशवर कै सेवको औरौ तुऐं जू तैसका आदर कौरौ, चाहै बौड़ै दर्जै कै हौंव या छौटे दर्जै कै। पौरमेशवर कै बौड़ाए कौरौ!”

⁶ तोबै मोऐं जू शुणु सै बैजाए बौड़ी संख्या दौ लोगौ कै लैरौ मारणौ कै जैशणौ थियु। ऐजौ ऐक बौड़ै झरणै कै आवाज़ कै जैशणौ जौरदार थियु औरौ बादल़ कै गड़गड़ाणै कै जैशणौ थियु। तिनुऐ बौल़ौ, “आओ आमै पौरमेशवर कै स्तुति कौरु! अमारा सौबिदा बौड़ा शौकतीशाली पौरमेशवर राजा औसौ।”

⁷ आओ, आमै खुशी औरौ मगन हौं, औरौ तैसकै स्तुति कौरौ, जिथुकै ऐजा ऐबै यीशु का सौमय औसौ, जू मेम्ने साए औसौ, कै आपणै लोगौ कै साथै हमैशा शै एकजुट हौए जांव, ऐजौ ऐशैकै हौंदौ जैशै ऐक मर्द आपणै दुल्हन शै शादी कौरौ, जिथुकै जू लोग तैसकै औसौ तिनुऐ आपी कै तैसकै साथै एकजुट हौणौ कारिए तैयार कौरे पाए।

⁸ पौरमेशवरे तियौंखै साफ सुथरै चोमकदार मलमल शै बाणैयौंदे लुस्कै बाम्बणौ कै दैय राए, मलमल कै लुस्कै पौरमेशवर कै लोगौ कै भले कामौ कै दिखांव।

⁹ स्‍वर्गदूतै मुखै बौल़ौ, “ऐजौ लिख, कै धन्‍य सैजै औसौ, जू मेम्ने कै बैयाव कै जशन मौनाणौ कारिए बौइदूत मुंजी बौएदै राए।” तोबै तैणै मुखै बौल़ौ, “ऐजै साची वचन औसौ जू पौरमेशवर कै ढौबौशै आंव।”

¹⁰ जोबै मोऐं शुणु तौ हांव तैसी आदमी कै सामणै झौकै गौआ जैणै मुंआरी बातौ कौरे लोई थी, जिथुकै हांव तैसकी आराधना कौरणौवाल़ा थिया। तैणै मुंकैई बौल़ौ, “मैरी आराधना नी कौर। पौरमेशवर ही औसौ जैसकै ताखै आराधना कौरणै चैंई। जिथुकै हांव बै तैशैखैई पौरमेशवर का ऐक सेवक औसौ, जैशै तू औसौ औरौ तैशैखैई जैशै यीशु मसीह पांदी बिशवाश कौरणौवाल़ै तैरै बिशवाशी भाई औसौ, जू बिशवाश कौरौ कै यीशु तिनका प्रभु औसौ। ऐजी सौचाई जू यीशुए दिखाए राए थी, तिथु साबित कौरणौ कारिए पवित्र आत्मा लोगौ खै काबिल बाणौ।”

चिटै घोड़े पांदी शवार

¹¹ तोबै मोऐं स्वर्ग खै खोलेयौंदा दैखा, तिथै मैरै सामणै ऐक चिटा घोड़ा थिया, औरौ तैसी पांदी ऐक शवार थिया, जू पौरमेशवर का बिशवाश लायक औरौ साचा सेवक थिया। सै जू बातौ पौरमेशवर कै नज़र दी सोही औसौ तिथकै हिसाब शै पौरमेशवर कै दुशमन कै खिलाफ न्याय कौरदा औरौ लौड़ाए कौरदा।

¹² तैसकी आखी आगी कै लौयारै कै जैशणी चोमकदार थी, औरौ तैसकै मुंडो पांदी बौहितै मुकुट लाए राए थिए। औरौ तैसकौ ऐक नांव तिथपांदी लैखयौंदो थियु, पौरौ सिरफ सैजाई तैसी नांव का मतलब जाणौ थिया।

¹³ सै लोऊ मुंजी डौबेयौंदे लुस्कै कै बाम्बैयौंदा औसौ, औरौ तैसकौ नांव पौरमेशवर का वचन औसौ।

¹⁴ स्वर्ग शै सैनिकौ कै बौड़ी भीड़ तैसकै पाछी-पाछी हांडै। ऐजै सैनिक चिटै घोड़े पांदी शवार थिए औरौ तिनुऐ शुध्द चिटै मलमल कै लुस्कै बाम्बै राए थिए।

¹⁵ तैसकै मुँह पौरैशै ऐक तैज तलवार निकल़ै जिथलैई सै देशो कै हराए दैन्दा। जू कुणिए बै तैसकै औधिकार कै अपनांव ना सै तिनु पूरी तरह शै सौजा दैन्दा। सै सौबिदा बौड़ा शौकतीशाली पौरमेशवर कै खतरनाक प्रकोप कै तैशैखैई छोड़ दैन्दा, जैशैकै ऐक रसकुण्ड शै अंगूरो का रस बौंए।

¹⁶ औरौ तैसकै लौइये औरौ सोऐं कौलाटो पांदी ऐजौ नांव लैखै राखौ: “राजाओं का राजा औरौ प्रभुओं का प्रभु।”

राकस औरौ तैसकी सैना कै हार

¹⁷ तोबै मोऐं ऐक स्‍वर्गदूत खै सुरजो पांदी खोलेयौंदा दैखा। औरौ तैणै बौड़ै शब्द लैई धाव मारैबा मांस खाणौवाल़ै सौबी चिड़कुल़ै कै जोर शै धाव मारै जू गौयण दै ऊंचे उड़ै रौवै थिए। आओ तियौं बौड़ी बौईदुत कारिए कौठै हौए जाव जू पौरमेशवरे तुऔं कारिए तैयार कौरे राए।

¹⁸ आओ औरौ राजाओं, सैना कै अगुवे, ताकतवर सैनिकौ, घोड़ो औरौ तिनकै सवारौ का मौरेयौंदे शोरीरो कौ मांस खाव। तुऐं हर बान्त कै मौरेयौंदे लोगौ कौ मांस खाए सौकौ, यानी गुलाम औरौ आज़ाद, बौड़ै औरौ नानड़ै दु कौ।

¹⁹ तोबै मोऐं तैसी राकस कै दैखा जू समुन्द्र पौरैशा बायरै आए रौआ थिया, औरौ धोरती कै राजाओं औरौ तिनकी सैना खै दैखा। सै घोड़े पांदी बौठणौवाल़ै औरौ तैसकी सैना कै खिलाफ लौड़ाए लौड़णौ कारिए ऐक साथै आए।

²⁰ सैजा राकस औरौ सैजा झूठा सौंदेश दैणौवाल़ा पाकड़ै गौआ। ऐजा झूठा सौंदेश दैणौवाल़ा सैजाई औसौ जैणै आगलै राकस कै ढौबौशै चौमत्कारी निशान दिखाए औरौ तिनु सौबी लोगौ कै भरमाए, जिनुवै आगलै राकस कै छाप आपणै माथै पांदी लाए राए थी, औरौ जू तैसकै मूर्ती कै पूजा कौरौ थिए। इनु दुईनै जीतै जी तियौं आग कै झीलो मुंजी पाए दियै, जू गन्धक लैई जौल़ौ।

²¹ तोबै चिटै घोड़े कै घुड़शवारै तैसी राकस कै सौबी सैनिकौ कै मारै दियै, तैणै तिनु तियौं तलवार लैई काटै दियै जू तैसकै मुँह पौरैशै निकल़ौ थै। तोबै गौयणै कै पक्षी तांव तौड़ी लाशो कौ मांस खांदै रौवै जांव तौड़ी कै तिनकै छौकै नी गौ।