फिलिप्पियों 1 - सिरमौरी नौवाँ नियमस्वागत 1 मोऐं पौलुसे तीमुथियुस कै साथै ऐजै चिट्ठी लैखै लौए औरौ आमै मसीह कै सेवक औसौ। मोऐं ऐजै चिट्ठी फिलिप्पी शहर दै रौणौवाल़ै कलीसिया कै सौबी ठोगड़े कै औरौ सेवको सहित पौरमेशवर कै पवित्र लोगौ कारिए लैखै लौए। 2 अमारा पिता पौरमेशवर औरौ प्रभु यीशु मसीह तुऔं अनुग्रह औरौ शान्तै दैंदा रौंव। पौलुस कै प्रार्थना औरौ धन्यवाद 3 हांव जौल़ौ-जौल़ौ तुऔं याद कौरु तौलौ-तौलौ आपणै पौरमेशवर का धन्यवाद कौरु। 4 औरौ हांव खुशी कै साथै आपणी हरेक प्रार्थना दै तुऔं सौबी कारिए सौदा पौरमेशवर कैईंदै मौदद कै बिन्ती कौरु। 5 इथकारिए कै तुऐं ऐसी यीशु मसीह कै बारै मुंजी जू सुसमाचार औसौ तिथ पांदी बिशवाश कौरा औरौ ऐलो तौड़ी तुऐं ऐसी सुसमाचार फौयलणौ खै मैरै साथै रौए रौवै। 6 मुखै इयौं बातौ का भोरोशा औसौ कै पौरमेशवरे तुऔं मुंजी किछै आछा काम कौरणा शुरु कौरे राए, सैजाई तैसी यीशु मसीह खै पाछु आणौ कै दूसौ तौड़ी पूरा कौरदा। 7 तुऔं सौबी कै बारै मुंजी ऐशणा विचार कौरणा मुं कारिए ठीक औसौ, जिथुकै हांव तुऔंआरी बैजाए प्यार कौरु। जौबेकै हांव इबी ज़ेलो दा औसौ तोबै बै हांव सुसमाचार का बौचाव कौरु औरौ ऐजौ साबित कौरु कै सुसमाचार साचा औसौ। इनु सौबी बातौ मुंजी तुऐं सौबै मैरै साथै पौरमेशवर कै अनुग्रह दै शामिल औसौ। 8 इदा पौरमेशवर मैरा गवाह औसौ कै हांव मसीह यीशु कै जैशणा प्यार कौरेयौ तुऔं सौबीआरी भैटिणौ चोऊं। 9 हांव ऐजै प्रार्थना कौरु कै तुऐं ऐकी दुजैआरी हौजौ जादा प्यार कौरदै रौ, औरौ सौचाई कै ज्ञान औरौ सौबी भान्त कै विचारो कै साथै लगातार बौढ़दै जाव। 10 इथकारिए कै तुऐं जू बातौ भली औसौ तिथका चुनाव कौरणौ कै लायक बौणै जांव ताकि मसीह खै औटेयौ पाछु आणौ कै दूसौ तौड़ी शुध्द औरौ बैकसूर बौणैयौंदे रौंव। 11 जैशै ऐक डाल़ फोल़ पौयदा कौरौ तैशैखैई तुऐं धरम कै काम कौरौ जू यीशु मसीह कै दवारा हौंव, औरौ भरपूर हौन्दै जांव जिथलैई पौरमेशवर कै महिमा औरौ बौड़ाए हौन्दै रौंव। पौलुस कै कोयदी कै रुप दै सेवा 12 ओए रै बिशवाशी भाईटु हांव चोऊं कै तुऐं ऐजौ जाणै पाव कै जू मुं पांदी बीतै रौ, तिथलैई बौहितै लोगौ खै सुसमाचार कै फौयलणौ मुंजी मौदद भैट रौए। 13 इथै तौड़ी कै महाराजा कै राजभवन कै सारै सैनिक गुटो औरौ महल कै सौबी लोगौ मुंजी ऐजौ प्रगट हौए गौ कै हांव कैद दा औसौ, जिथुकै हांव मसीह कै सेवा कौरु। 14 औरौ प्रभु दै जू बिशवाशी भाई औसौ, तिनुमुंजी दै भौरिशै मैरै कैद दै हौणौ की बौजैह शै उत्साह कै साथै पौरमेशवर का वचन निडर हौयौ शुणाणौ कै हौजौ बै जादा हिम्मत कौरौ। 15 किछै लोग तौ ज़लन औरौ झगड़ालु हौणौ की बौजैह शै मसीह कै बारै मुंजी सुसमाचार का प्रचार कौरौ, पौरौ किछै लोग आछै इरादै शै प्रचार कौरौ। 16 ऐजै लोग मुंआरी प्यार कौरणौ की बौजैह शै प्रचार कौरौ जिथुकै सै जाणौए कै मसीह कै बारै मुंजी सुसमाचार कै रक्षा कौरणौ कै बौजैह शै मुखै कोयदै दा पाए राए। 17 पौरौ जू लोग ज़लन कौरौ सैजै लोग आपणै मतलब कारिए बैईमानी शै मसीह कै बारै मुंजी प्रचार कौरौ। जिथकै सै जाणौए, कै हांव कोयदै दा औसौ औरौ मुं कारिए जादा पौरेशानियो कै खौड़ै कौरणा चांव। 18 तौ का हौव? सिरफ ऐजौ, कै हर तरीकै शै चाहै दिखावे शै, चाहै सोच्चाई शै, मसीह कै बारै मुंजी सुसमाचार का प्रचार हौए रौआ, औरौ हांव इथलैई खुश औसौ, औरौ इथलैई खुश हौंदा रौन्दा। जियुंदी रौणा मसीह औसौ 19 जिथुकै हांव जाणुए कै तोंवारै बिन्ती कै दवारा औरौ पवित्र आत्मा जू यीशु मसीहे छाड़ै राए, तैसकै दवारा मोदद का प्रतिफल मैरै उध्दार कारिए काम कौरदा। 20 मैरै दिल कै इछा औरौ आशा ऐजै औसौ, कै हांव कियौंई बै बातौ दा शर्मिंदा ना होऊं, पौरौ मुखै मसीह कै बारै मुंजी बौलणौ खै हिम्मत भैटौ जैशैकै मोऐं बीतैयौंदे सौमय दौ कौरे राए थियु। चाहै हांव जियुंदी रोऊं या मौरे जोऊं हांव आपणै पूरै जिन्दगी कै दवारा मसीह का आदर कौरदा रौंदा। 21 जिथुकै जै हांव जियुंदी रोऊं तौ ऐजौ मसीह कै आदर कारिए हौंदौ, औरौ जोबै हांव मौरे जोऊं तौ मुं कारिए ऐजौ आछौ हौंदौ जिथुकै हांव तोबै बै मसीह कै साथै रौंदा। 22 पौरौ जै हांव जियुंदी रौयौ मसीह कारिए फायदै का काम कौरे सौकु तौ हांव ना जाणु कै मुं कारिए का आछौ औसौ। 23 हांव ना जाणु कै कोसी खै चुणु; जी तौ चांव कै मौरे जोऊं औरौ मसीह कै धोरे जायौ रोऊं, ऐजौ बैजाए आछौ औसौ। 24 पौरौ जियुंदी रौयौ तोंवारै मौदद कौरणा हौजौ बै जौरुरी औसौ। 25 औरौ इथकारिए मुखै भोरोशा औसौ, कै हांव जियुंदी रौन्दा, औरौ तुऔं सौबी कै साथै रौन्दा। हांव तुऔं तोंवारै बिशवाश दै मोजबूत हौणौ औरौ तिथमुंजी खुश हौणौ कारिए मौदद कौरदा। 26 जोबै हांव औटेयौ तोंवारै साथै हौंदा, तौ तुऐं मैरी बौजैह शै मसीह यीशु कै बारै मुंजी हौजौ बै जादा घमण्ड कौर सौकदै। कौचिश औरौ मसीह कारिए दुख सैहणा 27 सिरफ ऐतरो कौरौ कै तोंवारा चाल चलन मसीह कै सुसमाचार कै लायक हौंव। चाहै हांव आयौ खै तुऔं दैखु, चाहै ना बै ओऊं, तोंवारै बारै मुंजी ऐजौ शुणु कै तुऐं ऐकैई मकसद दै मजबूत औसौ, औरौ ऐक साथै हौयौ सुसमाचार पांदी बिशवाश कारिए मैहनत कौरदै रौव। 28 औरौ कियौंई बै बातौ दै दुशमन दै ना डौरौ। तोंवारै हिम्मत तिनु कारिए नाश का साफ निशान औसौ, पौरौ तुऔं कारिए उध्दार का, औरौ ऐजौ पौरमेशवर कै ढौबौशौ औसौ। 29 जिथुकै मसीह कारिए तुऔं पांदी ऐजा अनुग्रह हौआ कै ना सिरफ तैसी पांदी बिशवाश कौरौ, पौरौ तैसी कारिए दुख बै उठाव। 30 औरौ तुऔं तैशैखैई पौरेशानियाँ सैहन कौरणी पौड़दी, जैशै तुऐं मुखै कौरदै बैई दैखै राए, जोबै हांव तोंवारै साथै फिलिप्पी शहर दा थिया औरौ जिनु पौरेशानियो कै बारै मुंजी तुऐं शुणौए जू मौखै कोयदै दी इबी बै औसौए। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation