मरकुस 11 - सिरमौरी नौवाँ नियम

यीशु कै यरूशलेम शहर दो आणौ

¹ जोबै यीशु औरौ तैसकै चैलै यरूशलेम शहर कै नेड़िक, जैतून धारो पांदी बैतफगे बैतनिय्‍याह गांव कै धोरे ओऊवे, तौ तैणै आपणै दो चैलै खै ऐजौ बौलेयौ छाड़ै।

² “सामणै कै गांव दै जांव, औरौ तिथै पोहचेबा तुऔं खै ऐक गाधडू बानेयोंदो भैटदौ, जिथपांदी ऐलो तौड़ी कौलोंई कुणिए बै ना बौठै रैली, तिथुखै खोलेबा मैरै धोरे लेयांव।

³ जै कुणिए तुऔं कैईंदु पूछौ, ‘ऐजौ किथुखै कौरे लौ? तौ बौलेया, प्रभु खै इथकै जौरुरत औसौ,’ औरौ सै तावल़ो पाछु दैय दैंदा।”

⁴ चैलै गांव दै हौटै, औरौ तिनुखै गाधडू खै ऐकी घोरो कै दवारो कै नेड़िक खुंडै दो बांनैयौंदो भैटौ, औरौ सै तिथुखै खोलदै लागै।

⁵ तिनुमुंजी दै जू तिथै खौड़ै थिए, कुणिए-कुणिए बौलदै लागै, “ऐजौ का कौरे लौ गाधडू खै किथुखै खोले लो?”

⁶ यीशुए चैलै खै जैशैखै बौल़ै राए थियु, तैशैखैई तिनुऐ तिनुकैईं बौल़ै दियु; तोबै लोगै गाधडू खै निणो दियु।

⁷ औरौ तिनुऐ गाधडू खै यीशु कै धोरे लियोऊ औरौ तिनुऐ गाधडू कै पीठ पांदी आपणै खोटणो धोरे औरौ यीशु तिथपांदी बौठै गौआ।

⁸ औरौ बौहितै लोगै यीशु कै आदर दैणौ कारिए बाटो पुंडे आपणै खोटणो बिछाए औरौ कैई लोगै खेतौ की डाल़ी पौरैशै पातै तौड़ेयो बिछाए दियै।

⁹ औरौ किछै लोग यीशु कै आगै-आगै औरौ पौछौड़ियौ-पौछौड़ियौ चालै रौवै थिए। तोबै सौबै खुश हौयौ जोर शै बौल़ौ थिए, “पौरमेशवर कै बौड़ाए हौंव! धन्‍य औसौ सैजा जू प्रभु कै औधिकार शै आंव।

¹⁰ धन्‍य औसौ! अमारै बुड़ेईक राजा दाऊद का राज्य जू पौरमेशवर कै औधिकार दा आए रौआ; पौरमेशवर कै बौड़ाए हौंव जू स्वर्ग दा रौंव।”

¹¹ जोबै यीशु यरूशलेम शहर दा पोऊंचा, तिथकै बाद, सै यरूशलेम मन्दिरो दा हौटा। तिथै तैणै चोऊ ढौबौ सौबै चीज़ौ खै ध्यान सै दैखी औरौ तोबै तैणै शहर छोड़ दियु जिथुकै फिरै हौए गौ थियु। इथकारिए सै बारौ चैलै आरी बैतनिय्‍याह गांव कै हौटा।

अंजीर कै डाल़ो खै शराप दैणा

¹² दूजै दूसै जोबै सै बैतनिय्‍याह गांव दै निकल़ै तौ तैसीखै भूख लागै।

¹³ औरौ यीशुए दूरकै दा ऐक अंजीर का हरा डाल़ दैखा औरौ डाल़ो कै नेड़िक हौटा, कै तिंदै किछै फोल़ भैट जांव। पौरौ पात छोडे़बा तिंदु किछै बै ना भैटी; जिथुखै तौलौ फोल़ का सौमय ना थी।

¹⁴ तोबै यीशुए डाल़ो खै शराप दिया, “ऐबै ऐलो दै ऊबै ऐसी डाल़ो दै कौलोंई फोल़ ना लागदै।” औरौ तैसकै चैलै शौणै लौ थियु।

मन्दिरो पौरैशै व्यापारियों खै निकाल़णै

¹⁵ इथकै बाद यीशु औरौ तैसकै चैलै यरूशलेम शहर दै ओऊवे, औरौ सै यरूशलेम मन्दिरो दा हौटा; औरौ यीशु तिनु लोगौ खै बायरै निकाल़दा लागा, जू चीज़ौ औरौ गोरु कै बल़ि कारिए खोरिदणो औरौ बैचणो कै काम कौरौ थिए। तैणै लोगौ कै मेजो कै जू पौयसै बौदलौ थिए, औरौ कबूतर बिकणौवाल़ै कै मेजो कै पोलटै दियै।

¹⁶ औरौ तैणै लोगौ खै मन्दिरो कै आँगणो पौरैशै कोसी खै बै समान लाणौ औरौ निणो ना दी।

¹⁷ औरौ तिनुखै उपदैश देएबा बौल़ौ, “पवित्र शास्त्र दो लैखै राए, कै मैरा मन्दिर सौबी देशो कै लोगौ कारिए प्रार्थना का घोर बौल़ै जांव। पौरौ तुऐं इथुखै डाकुओं लैई भोरेयोंदे गुफा कै जैशणौ बाणै राए।”

¹⁸ ऐजौ बौलेबा मुख्य यहूदी पुरोहित औरौ यहूदी शास्त्री तैसीखै मारणौ का मौका जौंदै लागै कै तैसीखै मारै सौकौ पौरौ सै तैसिदै डौरौ थिए। जिथुकै जू किछै बै यीशुए शिखोऊ सैजी सौबै बातौ शौणैबा भीड़ौ कै लोग हैरान हौए जांव थिए।

¹⁹ बैल़खै कै सौमय यीशु औरौ तैसकै चैलै बैतनिय्‍याह गांव दै तियौं राती सुतदे हौटै।

शुकै अंजीर कै डाल़ो शै शिक्षा

²⁰ ओकी दूसै झीशो यीशु औरौ तैसकै चैलै यरूशलेम शहर कै ढौबौ जांदै लागै रौवै थिए, तोबै तिनुऐ तैसी अंजीर कै डाल़ो खै जड़ दा ऊबा शोकेयौंदा दैखा।

²¹ पतरस खै सैजै बात याद आए, औरौ तैणै यीशु कै बौल़ौ, “ओए रै गुरुजी, दैख धिबा! जू ऐजा अंजीरो का डाल़ औसौ जैसीखै तुऐं शराप दैय राए थिया, ऐबै शोकै गौआ।”

²² यीशुए तैसीखै जोवाब दिया, “पौरमेशवर पांदी बिशवाश राखौ, कै तुऐं जू किछै मांगै राए सै तुऔं दैंदाए।

²³ हांव तुऔं कैंई साचौ बुलू कै जू कुणिए इयौं धारो खै बौल़ौ, ‘जै तू ओकशै जा, औरौ समुन्द्रो दो पौड़ै जा,’ औरौ आपणै मन दा शक ना कौरौ, पौरौ बिशवाश कौरौ तौ जू तुऐं मांगलै सै हौए जालो, औरौ पौरमेशवर तैसी कारिए ऐजौ कौरे दैंदा।

²⁴ इथकारिए हांव तुऔं खै बुलू, कै जू किछै तुऐं प्रार्थना कौरेयौ मांगलै तौ बिशवाश कौरेया कै पौरमेशवरे तोंवारै बिन्ती शौणै राए, तौ सै तुऔं खै जौरुर दैला।

²⁵ ऐशैकैई जोबै तुऐं प्रार्थना कौरणौ कै खौड़ै हौंव, तौ तोंवारै मन दै कोसी कारिए नफरत हौंव, तौ तैसीखै माफ कौरेया: इथकारिए पौरमेशवर जू तोंवारा पिता औसौ औरौ जू स्वर्ग दा रौंव तोंवारै पाप माफ कौरौ।

²⁶ (पौरौ जै तुऐं माफ नी कौरलै तौ तोंवारा पिता बै जू स्वर्गो दा औसौ, तोंवारै पाप माफ ना कौरदा)।”

यीशु कै औधिकार पांदी सवाल

²⁷ यीशु औरौ तैसकै चैलै यरूशलेम शहर दै आए, औरौ जोबै सै यरूशलेम मन्दिरो दा घोमै रौआ थिया तौ मुख्य यहूदी पुरोहित औरौ यहूदी शास्त्री औरौ बुड़ेईक तैसकै धोरे आयौ पूछदै लागै।

²⁸ तू ऐजै काम कोसी औधिकार शै कौरे? औरौ ऐजा औधिकार ताखै कुणै दैय राए कै तू ऐजै काम कौरे?

²⁹ यीशुए तिनुखै बौल़ौ, “हांव बै तुऔं कैईंदै ऐक बात पूछु; जै तुऐं मुखै जोवाब दैलै, तौ हांव तुऔं खै बौतौऊंबा कै ऐजै काम कोसी औधिकार शै कौरु।

³⁰ मुखै जोवाब दैव, जोबै यूहन्नाए लोगौ खै बपतिस्मा दिया, तौ तैसीखै ऐजा कौरणौ का औधिकार पौरमेशवरे दिया, या लोगै।”

³¹ “तोबै सै आपी मुंजी चौर्चा कौरदै लागै कै जै आमै जोवाब दियु, ‘स्वर्गो कै ढौबौशै,’ तौ सै बौलला, ‘कै तुऐं तैसका बिशवाश किथुखै ना की?’

³² औरौ जै आमु बुलूबे, ‘ऐजा औधिकार आदमियों कै ढौबौशै,’ तौ लोग आमुखै पौरैशानी खौड़ै कौरलै, जिथुकै सौबै लोग मानौ थिए कै यूहन्ना बपतिस्मा दाता सौथीखै ही पौरमेशवर कै बातौ बौताणौवाल़ा थिया इथकारिए सै डौरे रौवै थिए।”

³³ तोबै तिनुऐ यीशु खै जोवाब दिया, “आमै ना जाणु।” यीशुए तिनुखै बौल़ौ, “हांव बै तुऔं खै ना बौतांदा कै ऐजै काम कोसी औधिकार शै कौरु।”