मत्ती 16 - सिरमौरी नौवाँ नियम

फरीसियों दवारा यीशु कै पोरखा जाणा

¹ औरौ फरीसी लोगै औरौ सदूकी लोगै यीशु कै धोरे आयौ पौरखणौ कारिए तैसीखै बौल़ौ, “की आमुखै स्वर्ग दा कुणजाई निशान दिखा।”

² तैणै तिनुखै जोवाब दिया, “बैल़खै दो तुऐं बौल़ौए कै मौसम साफ रौंदा, जिथुखै गौयण लाल औसौ।

³ औरौ झीशींदु बौल़ौए की; ऐलो तूफान आन्दौ जिथुखै गौयण लाल औरौ धुमले औसौ; तुऐं गौयणै का लक्षण दैखैयो भैद बौताए सौकौ, पौरौ सौमय कै निशानो का भैद नै बौताए सौकदै?

⁴ ऐसी जमाने कै बुरै, औरौ गौलत सौमबंध राखणौवाल़ै लोग किथुखै निशान चांव, पौरौ योना पौरमेशवर कै बातौ बौताणौवाल़ै कै निशान छोडे़बा कुणजाई बै निशान ना दिया जांदा।” औरौ सै तिनु छोडे़बा आगु हौटा।

फरीसी औरौ सदूकी लोगौ का खमीर

⁵ औरौ चैलै झील कै पाइले ढौबौ जांदै सौमय रोटी लाणी बैसरै गौवै थिए।

⁶ यीशुए तिनुखै बौल़ौ, “फरीसी लोगौ औरौ सदूकी लोगौ कै खमीर दै चौकश रौया।”

⁷ चैलै आपी मुंजी विचार कौरदै लागै, “की आमै रोटी लाए ना रैई इथकारिए यीशुए ऐशैखै बौल़ौ।”

⁸ ऐजौ जाणैबा यीशुए तिनुखै बौल़ौ, “ओए रै बिशवाश ना कौरणौवाल़ै लोगौ, तुऐं आपी मुंजी किथुखै विचार कौरौ, कै आमुए तौ रोटी बै लाए ना रैई?

⁹ का तुऐं इबी तौड़ी ना रैई सौमझै? का तुऔं याद ना आथी कै मोऐं पाँच हजार लोगौ कै पाँच रोटी लैई खियोऊं थियु, औरौ तुऐं कैतरी शैकड़ी टिपी थी?

¹⁰ औरौ जोबै चार हजार लोगौ खै सात रोटी दी थी; तोबै तुऐं कैतरी शैकड़ी टिपी राए थी।

¹¹ तुऐं किथुखै ना सौमझौ कै मोऐं तुऔं खै रोटी कै बारै मुंजी ना बुली? पौरौ फरीसी लोगौ औरौ सदूकी लोगौ कै खमीर दै चौकश रौया।”

¹² तोबै तिनकै सौमझ ओऊ, कै तैणै रोटी कै खमीर शै नै, पौरौ फरीसी लोगौ औरौ सदूकी लोगौ कै शिक्षा दै चौकश रौणौ खै बौल़ौ थियु।

पतरस का यीशु खै मसीह मानणा

¹³ यीशुए कैसरिया फिलिप्‍पी नोगरो दै आयौ आपणै चैलै कैईंदु पूछु, “कै लोग मुं आदमी कै बैटै खै का बौल़ौ?”

¹⁴ तिनुऐ बौल़ौ, “किछै लोग तौ यूहन्ना बपतिस्मा दाता बौल़ौ; औरौ किछै एलिय्याह; औरौ किछै यिर्मयाह या पौरमेशवर कै बातौ बौताणौवाल़ै मुंजीदा कुणिए ऐक बौल़ौ?”

¹⁵ तैणै तिनुखै पूछु, “पौरौ तुऐं का बिशवाश कौरौ कै हांव कुण औसौ?”

¹⁶ शमौन पतरसे जोवाब दिया, “कै तू जीवते पौरमेशवर का बैटा मसीह औसौ।”

¹⁷ यीशुए तैसीखै जोवाब दिया, “ओए रै शमौन योना का बैटा, तू धन्‍य औसौ; जिथुखै मांस औरौ लोऊ शै नै, पौरौ मैरा पिता जू स्वर्गो दा औसौ, ऐजै बात तांव पांदी प्रगट कौरे राए।

¹⁸ औरौ हांव बै ताखै बुलूए, की तू पतरस औसौ; औरौ हांव ऐसी पाथरो पांदी आपणै मसीह कै कलीसिया बाणदा औरौ पताल़ो कै फाटक तिथपांदी प्रबल ना हौंदै।

¹⁹ हांव ताखै स्वर्ग कै राज्य की कुंजीयां दैंदा: औरौ जू तू धोरती पांदी बान्ला, सै स्वर्गो दो बानै जांदो; औरौ जू किछै तू धोरती पांदी खोलला सै स्वर्गो दो खोले जांदो।”

²⁰ तोबै यीशुए चैलै खै चिताऐबा बौल़ौ, “कै मैरै बारै मुंजी कोसी कैंई नी बौलेया, कै हांव मसीह औसौ।”

यीशु कौ आपणी मौत कै बारै मुंजी बौताणौ

²¹ तैसी सौमय यीशु आपणै चैलै खै बौतांदा लागा, “कै मुं कारिए जौरुरी औसौ, की हांव यरूशलेम शहर खै जोऊं, औरौ बुड़ेईक औरौ मुख्य यहूदी पुरोहित औरौ यहूदी शास्त्री कै हाथै बैजाए दुख झैलू; औरौ मौरे जोऊं, औरौ तिजै दूसै जियुंदा हौए जोऊं।”

²² इथपांदी पतरसे तैसीखै जौई नीयां औरौ डांटदा लागा औरौ बौल़ौ, “ओए रै प्रभु, पौरमेशवर ना कौरौ, की तैरै साथै कौलोंई ऐशै हौं।”

²³ तैणै पाछु फिरैयौ पतरस खै बौल़ौ, “ओए रै शैतान, मैरै सामणै दा दूर हौए जा: तू मुं कारिए ठोकर कै बौजैह औसौ; जिथु तोंवारै बिचार आदमी कै जैशणै औसौ, ना कै पौरमेशवर कै जैशणै औसौ।”

यीशु कै पौछौड़ियौ हांडणौ का मतलब

²⁴ तोबै यीशुए आपणै चैलै कै बौल़ौ, “जै तुऐं मैरै चैलै बौणणे चांव, तौ तुऔं खै आपणी इछाएं छुड़णी पौड़ली। औरौ आपणा क्रूस टिपयौ मैरै पौछौड़ियौ हांडणौ पोड़लो (आपणै क्रूस उठाणौ का मतलब औसौ, दुख औरौ नेंदैया सोणै पोड़दै औरौ आपणै प्राण तक बै दैणै पोड़लै)।

²⁵ जिथुखै जू कुणिए इयौं धोरती पांदी आपणै जिन्दगी बौचाणौ कै कौचिश कौरला, सै हमैशा कै जिन्दगी गवांए दैला, पौरौ जू कुणिए मुं पांदी बिशवाश कौरलै औरौ जू कुणिए मुं कारिए आपणै जिन्दगी गंवाला, सै स्वर्ग दै हमैशा खै जिन्दगी पाला।

²⁶ ऐक आदमी कै का भेटलो जै तैसीखै पूरी दुनिया कै चीज़ौ भेटली? औरौ पौरमेशवर कै साथै हमैशा कै जिन्दगी खोए दैला। हमैशा कै जिन्दगी कै बौदलै आदमी पौरमेशवर कै का दैय सौकौ?

²⁷ हांव आदमी का बैटा आपणै स्‍वर्गदूतौ कै साथै आपणै पिता कै महिमा दा आन्दा, औरौ तैसी सौमय ‘सै सौबी खै तिनकै कामौ का इनाम दैंदा।’

²⁸ हांव तुऔं कैंई साचौ बुलू, तुऔं मुंजी शै किछै लोग जू इथै खौड़ै औसौ, तिनुमुंजी दै कैतरै ऐशणै औसौ, कै सै आपणै मौरणौ दै औगौड़ियौ मुखै आदमी कै बैटै खै तैसकै राज्य दा आन्दै बैई दैखदै।”