लूका 23 - सिरमौरी नौवाँ नियम

पिलातुस दवारा यीशु शै सवाल

¹ तोबै सारी सभा कै लोग बिज़यो यीशु कै राज्यपाल पिलातुस कै धोरे लोऐ गौवै।

² औरौ सैजै ऐजौ बौलेयौ तैसी पांदी दोष लान्दै लागै, “आमुए ऐसी लोगौ कै बोयकांदे बैई औरौ रोम कै महाराजा कै मामला दैणौ शै मोना कौरदै बैई औरौ आपी खै मसीह, राजा बौलदै बैई बै शौणै राए।”

³ राज्यपाल पिलातुसे तैसीयांदो पूछु, “का तू यहूदी लोगौ का राजा औसौ?” यीशुए तैसीखै जोवाब दिया, “तुऐं आपी ही बौल़ै लो।”

⁴ तोबै राज्यपाल पिलातुसे मुख्य यहूदी पुरोहितो औरौ लोगौ कै बौल़ौ, “हांव ऐसी आदमी दा किछै बै दोष ना पोऊँ।”

⁵ पौरौ सैजै हौजौ बै जोर शै बौलदै लागै, “ऐजा गलील जिले शै लोएबा इथै तौड़ी सौबै यहूदिया प्रदेश कै सौबी लोगौ कै बीच आपणै उपदैश कै दवारा दंगे कै बौजैह बौणै रौआ। ऐणै गलील जिले दो ऐजौ शुरु कौरौ औरौ ऐबै इथै आए गौआ।”

⁶ ऐजौ शोणेयो राज्यपाल पिलातुसे पूछु, “का ऐजा आदमी गलील जिले का औसौ?”

⁷ औरौ ऐजौ जाणैयौ कै यीशु तैसी जिले का औसौ जिथै राजा हेरोदेसे राज कौरे लौआ। तैसी हेरोदेस कै धोरे छाड़ै दिया, जिथुकै तोलो सै बै यरूशलेम शहर दा थिया।

यीशु कै हेरोदेस राजा कै धोरे निणा

⁸ राजा हेरोदेस यीशु कै दैखैयो बौहुता खुशी हौआ, जिथुकै सै बौहितै दूसौ दा उंडा तैसीकै देखणा चांव थिया: इथकारिए कै तैसकै बारै मुंजी शौणै राए थियु, औरौ यीशु कै किछै चौमत्कार कै काम कौरदै बैई दैखणौ कै आशा राखौ थिया।

⁹ सै यीशु कैईंदी बोरिशी बातौ पूछदा रौआ, पौरौ यीशुए राजा हेरोदेस कै किछै बै जोवाब ना दी।

¹⁰ औरौ मुख्य यहूदी पुरोहित औरौ यहूदी शास्त्री खौड़ै हौयौ जोर दैयौ तैसी पांदी दोष लान्दै रौवै।

¹¹ तोबै राजा हेरोदेस आपणै सिपाहियो कै साथै तैसकी बैज्जती कौरेयौ तैसकै ठाटै उड़ाएयों, औरौ शाही भड़कीले खोटणो बाम्बायो तैसी पिलातुस कै धोरे पाछु छाड़ै दिया।

¹² तैसी सौमय तौड़ी राज्यपाल पिलातुस औरौ राजा हेरोदेस ऐकी दूजै कै दुशमन थिए, पौरौ तैसी दूसै सैजै दोस्त बौण गौए।

पिलातुसे यीशु कै मारणौ का दण्‍ड दिया

¹³ राज्यपाल पिलातुसे मुख्य यहूदी पुरोहितो औरौ ठोगड़े औरौ लोगौ कै बोयदयो तिनु बौल़ौ,

¹⁴ “तुऐं ऐसी आदमी कै मैरै धोरे लियोऊवा औरौ बौल़ौ कै ऐजा दंगा कौरवाणौ कारिए लोगौ कै बेहकांव थिया। पौरौ मोऐं तोंवारै सामणै ऐसीकै पोरखा पौरौ जिनु बातौ का तुऐं ऐसी पांदी दोष लौआ, इनु बातौ कै बारै मुंजी मोऐं ऐसी दा किछै बै दोष ना पाए रैई।

¹⁵ राजा हेरोदेस बै ऐसी दोषी ना पैई, इथकारिए तैणै यीशु कै अमारै धोरे पाछु छाड़ै दिया: औरौ दैखौ, ऐसी आदमीए मौरणौ कै सौजा कै लायक किछै बै गौलत ना कौरे रैई।

¹⁶ इथकारिए हांव ऐसी कौड़ै शै पीटायो छोड़े दियु।”

¹⁷ राज्यपाल पिलातुस फसह कै तैयार कै सौमय पांदी यहूदी लोगौ कारिए ऐकी कैदी कै छोड़े दैंव थिया।

¹⁸ तोबै सौबै लोग मिलैयौ लैरौ मारेयों बौल़ौ, “ऐसका काम तमाम कौर दैव, औरौ आमु कारिए बरअब्‍बा कै आज़ाद कौरे दैव।”

¹⁹ बरअब्‍बा कोसी दंगे की बौजैह शै जू नोगरो दो हौए रौए थियु, औरौ हत्या की बौजैह शै कोयद खाने दा थिया।

²⁰ पौरौ राज्यपाल पिलातुसे यीशु कै छौड़णौ कै इछा सै लोगौ कै हौजौ सौमझौऊवे।

²¹ पौरौ तिनुऐ लैरौ मारेयों बौल़ौ, “यीशु खै क्रूसो पांदी किलियों खत्म कौरौ।”

²² तैणै तिजाल़ियों तिनुखै बौल़ौ, “किथुखै, ऐणै का बुरु कौरे राखौ? मोऐं ऐसी दी हत्या कै सौजा कै लायक किछै बै बात ना पैई! इथकारिए हांव ऐसी कौड़ै शै पीटाएयों छोड़े दियु।”

²³ पौरौ सै लेलयाए लैलियायो पौछौड़ियौ पौड़ै गौवै, कै ऐसी क्रूसो पांदी किलियों खत्म कौरौ, औरौ तिनकौ लैरौ मारणौ बैजाए बौड़ै गौ।

²⁴ तोबै राज्यपाल पिलातुसे आज्ञा दै, कै इनकै मांग पूरै कौरौ।

²⁵ औरौ तैणै बरअब्‍बा खै जैसी दंगे औरौ हत्या की बौजैह शै ज़ेलो पुंडा डाकै राए थिया, औरौ जैसी सै मांगौ थिए, छोड़े दिया; औरौ यीशु कै तिनकै मोरजी कै हिसाब शै सौंपै दिया।

यीशु का क्रूसो पांदी चौढ़ाया जाणा

²⁶ जोबै सिपाहीए यीशु कै नी लोआ थिया, तौ तिनुऐ शमौन नांव कै ऐकी आदमी कै जू कुरेन शहर का थिया, सै गांव पौरैशा आन्‍दा लागै रौआ थिया, पाकड़ेयौ तैसी पांदी क्रूस लादै दियु कै सै क्रूस कै यीशु कै पौछौड़ियौ-पौछौड़ियौ लौए जांव।

²⁷ लोगौ कै बौड़ै भीड़ तैसकै पौछौड़ियौ चालदै लागै: औरौ तिनुआरी बोरिशी बैटमाणिशौ बै थी, जू तैसी कारिए छाती पीटैयो रुओं थी।

²⁸ यीशुए तिनकै ढौबौ फेरेयो बौल़ौ, “ओए रै यरूशलेम शहर की बैटमाणिशौ, मुं कारिए नी रौया; पौरौ आपी कै औरौ आपणै नानड़िया कारिए जू किछै हौणौवाल़ौ औसौ तिथकी बौजैह शै रौया।

²⁹ जिथुकै सैजै पीड़ो कै दूस आन्दै लागै रौवै जिथमुंजी लोग बौलदै, ‘धन्‍य औसौ सैजी बैटमाणिशौ जिनकै कौलोंई नानड़िया नी थी, जिनुवै कौलोंई नानड़िया कै जन्म ना दी, जिनुऐ कौलोंई तिनु दूध ना पियैई।’

³⁰ तैसी सौमय लोग ‘धारो शै बौलदै, कै आमु पांदी पौड़ौ, औरौ धालै कै बौलदै कै आमु दबाए दैव।’

³¹ जै धरमी आदमी कै साथै ऐशै हौंव, तौ सुंचौ कै तिनु लोगौ कै साथै का हौंदौ जू इयौं सौजा पाणौ कै लायक औसौ।”

³² सिपाही यीशु कै साथै तिनु दु आदमी कै बै सौजा दैणौ कारिए साथै लोए गौवै जू कुकर्मी थिए।

³³ जोबै सैजै तैसी ठाँव पांदी जिथु खोपड़ी कै जौगैह बौल़ौ तिथै पौऊंचै, तौ तिनुऐ तिथै यीशु औरौ तिनु कुकर्मी खै बै, ऐकी कै यीशु कै सोऐं ढौबौ औरौ दूजै कै डैरै ढौबौ क्रूसो पांदी चौढ़ाए।

³⁴ तोबै यीशुए बौल़ौ, “ओए रै बापू इनु माफ कौर ऐजै ना जाणौ कै ऐजौ का कौरे लो?” औरौ तिनुऐ चिट्ठी पायौ, तैसकै खोटणो आपी मुंजी बान्डै दिए।

³⁵ लोगै खौड़ै-खौड़ै दैख लौ थियु, औरौ ठोगड़े बै ठाटा उड़ाएयो ऐजौ बौल़ौ थिए, “ऐणै ओकी कै बौचाए, जै ऐजा पौरमेशवर का मसीह औसौ, औरौ तैसका चोणेयौंदा औसौ, तौ आपी कै बौचाए पांदा।”

³⁶ सैनिक बै नेड़िक आयौ औरौ खाटे अंगूरो का रस दैयौ तैसका ठाटा पाड़ैयो बौल़ै लौ थियु,

³⁷ “जै तू यहूदियों का राजा औसौ, तौ आपी खै बौचा।”

³⁸ औरौ यीशु कै मुंडो कै ऊबै तौकती किलियों लाए दै जिथपांदी लैखै राए थियु कै, “ऐजा यहूदी लोगौ का राजा औसौ।”

क्रूसो पांदी मन फिराणौ वाल़ा कुकर्मी

³⁹ जू तिथै कुकर्मी लोटकाए राए थिए, तिनु मुंजीदा ऐकीए तैसकै नेंदैया कौरेयौ बौल़ौ, “का तू मसीह ना आथी? तौ तू आपी खै औरौ आमु कै बौचाए पा।”

⁴⁰ इथपांदी ओकीए तैसी डांटैयौ बौल़ौ, “का तू पौरमेशवर दा बै ना डौरे? तुऐं बै तौ सैजै सौजा पाए लोए।

⁴¹ औरौ आमुए तौ न्याय कै हिसाब शै सौजा पाए लौए, जिथुकै आमुए आपणै कामौ कै सोही फोल़ पाए लौआ; पौरौ ऐणै तौ कुणजाई बै गौलत काम ना कौरे रैई।”

⁴² तोबै तैणै बौल़ौ, “ओए रै यीशु जोबै तू ऐक राजा कै साए आपणै राज्य दा आए तौ मुखै बै याद राखैया।”

⁴³ यीशुए तैसी बौल़ौ, “हांव ताखै साचौ बुलू कै ऐलोई तू मैरै साथै स्वर्ग दा हौंदा।”

यीशु का प्राण छोड़णा

⁴⁴ औरौ लमसम दुफारियौ कै बारौ बोजे शै ती बोजे तौड़ी तैसी सारै देशो दौ इनारौ छाएयौंदौ रौ।

⁴⁵ औरौ सुरजो को पेयाशो आगु हौटौ, औरौ सैजा मोटा पोरदा जू यरूशलेम मन्दिर दा टांगेयोंदा थिया, बीचो दा फाटै गौआ।

⁴⁶ औरौ यीशुए बौड़ै जोर शै पुकारेयौ बौल़ौ, “ओए रै पिता हांव आपणी आत्मा तैरै हाथौ दै दियु।” औरौ ऐजौ बौलेयौ यीशुए आपणै प्राण छोड़े दिए।

⁴⁷ सूबेदारे जू किछै हौए रौ थियु दैखैबा पौरमेशवर की बौड़ाए कौरे, औरौ बौल़ौ, “जौरुर ऐजा आदमी धरमी थिया।”

⁴⁸ औरौ भीड़ जू ऐजौ दैखणौ खै कौठै हौए रोए थै, ऐसी घोटना खै दैखैयो सैजै बैजाए दुखी हौयौ छाती पिटैयो आपणै घौरौ कै पाछु हौटै गौवै।

⁴⁹ औरौ तैसकै सौबै दोस्त औरौ जू बैटमाणिशौ गलील जिले शै तैसकै साथै आए रौए थी, दूर खौड़ै हौयौ जू किछै हौए रौ थियु, दैखै लौ थियु।

अरमतियाह का यूसुफ कै दवारा यीशु कै दफनाना

⁵⁰ तिथै यूसुफ नांव का ऐक महासभा का ऐक सदस्य थिया, जू भला औरौ धरमी मर्द थिया।

⁵¹ औरौ सै तिनकै इयौं योजना औरौ ऐसी कामौ लैई खुश नै थी। सै यहूदिया प्रदेश कै नोगरो अरिमतियाह शहर का रौणौवाल़ा थिया। औरौ पौरमेशवर कै राज्य कै आणौ कै ठोल़नाए कौरे लौए थै।

⁵² तैणै राज्यपाल पिलातुस कै धोरे जाऐबा यीशु की लाश मांगै।

⁵³ औरौ यीशु का शोरीर उतारेयो मलमल कै चादरी दा लोपेटा, औरौ ऐकी कब्रो दा जू चट्टान पांदी खोणे राए थै राखा, औरौ जिथ पुंडे कौलोंई बै कोसी कै लाश ना राखै रैई थी।

⁵⁴ सैजौ दूस शुको को दूस थियु, औरौ विशांव कौ दूस शुरु हौणौवाल़ौ थियु।

⁵⁵ औरौ तिनु बैटमाणिशौ कै जू यीशु कै साथै गलील जिले पौरैशी आए रौए थी, तिनुऐ पौछौड़ियौ-पौछौड़ियौ जाऐबा तियौं कब्रो कै दैखै औरौ ऐजौ बै कै तैसकै लाश कुकै राखै राए।

⁵⁶ औरौ आपणै घोरो कै पाछु जाऐबा खुशबू वाल़ी चीज़ौ औरौ यीशु कै शोरीरो पांदी लाणौ कारिए इत्र तैयार कियु, औरौ विशांव कै दूसै तिनुऐ मूसा कै कानून कै हिसाब शै आराम कौरा।