लूका 13 - सिरमौरी नौवाँ नियम

पश्‍चाताप कौरौ ताकि नाश ना हौं

¹ तैसी सौमय दै किछै लोग आए, औरौ तिनुऐ यीशु खै बौल़ौ, रोमी राज्यपाल पिलातुसे गलील जिले कै कैई लोगौ खै मारै दिए थिए, जोबै तिनुऐ मन्दिरो दै बल़ि चौढ़ाए लोऐ थी।

² ऐजौ शोणेयो तैणै तिनु जोवाब दिया, “का तुऐं सौमझौ कै ऐजै गलील जिले कै लोग, ओकी गलील जिले कै लोगौ दै बै जादा पापी थिए कै तिनु पांदी ऐशणी समस्या पौड़ी?”

³ हांव तुऔं बुलू कै ना; पौरौ जै तुऐं पाप कौरणा ना छोड़ो तौ तुऐं सौबै ऐशैखैई नाश हौए जांदै।

⁴ औरौ का तुऐं ऐजौ सौमझौ कै ऐजै अठारो लोग तोबै दौबेयौ मौरे गौवै थिए, जौल़ौ यरूशलेम शहर कै धोरे शीलोह को गुम्मट तिनु पांदी पौड़ौ? तौ का सै यरूशलेम शहर कै रौणौवाल़ै लोगौ दै जादा पापी थिए?

⁵ हांव तुऔं खै बुलू कै ना; पौरौ जै तुऐं पाप कौरणै नै छोड़ले, तौ तुऐं सौबै बै ऐशैखैई नाश हौए जांदै।

बिना फोल़ वाल़ा अंजीर का डाल़

⁶ तोबै यीशुए ऐजा उदारण बै दिया, “कोसी आदमी कै अंगूरो कै बागो दा ऐक अंजीरो का डाल़ लागैयौंदा थिया। सै तिंदै आई साल फोल़ झौंदा आंव थिया, पौरौ किछै नै भैटी।

⁷ तोबै तैणै बारी कै रोखवाल़ै खै बौल़ौ, ‘दैखौ, ती सालो दा उंडा हांव ऐसी अंजीरो कै डाल़ो दा फोल़ झौंदा ओऊं पौरौ मुखै इबी तौड़ी किछै फोल़ ना भैटी। ऐसीकै काटै दै जिथुकै ऐणै आछी जोमीनो खै खराब कौरे लोए।’

⁸ बागड़ी कै रोखवाल़ै तैसी जोवाब दिया, कै ओए रै मालिक, ऐसी इयौं साल रौणौ दै; कै हांव इथै चोऊ ढौबौ खोणेयौ खाद छुडु़।

⁹ जै आगलै साल फोल़ आंव तौ आछौ, नी तौ ऐसी काटै दैया।”

कुबड़ी बैटमाणिशौ खै ठीक कौरणै

¹⁰ विशांव कै दूसै यीशुए यहूदी सभा-घोरो दा उपदैश दैय लौआ थिया।

¹¹ तिथै ऐक ऐशणी बैटमाणिश थी, जियौं दै अठारो सालो दी ऊंडी अपंग कौरणौवाल़ै ऐक दुष्टआत्मा थी, औरौ सै कुबड़ी हौए रोए थी, औरौ कैशैकैई बै सीधी नै हौए सौकौ थै।

¹² यीशुए तियौं बैटमाणिशौ कै दैखैयो बोईदी औरौ बौल़ौ, “ओए रै बैटमाणिश, तू आपणै इयौं बीमारी शै ठीक हौए गौए।”

¹³ तोबै यीशुए तियौं पांदी हाथ राखा, औरौ सै तावल़ै सीधी हौए गौए औरौ पौरमेशवर कै बौड़ाए कौरदै लागै।

¹⁴ इथकारिए कै यीशुए विशांव कै दूसै तियौं ठीक कौरे राए थै, यहूदी सभा-घोरो का ठोगड़ा खिजैयौ कै लोगौ खै बौलदा लागा, “ऐकी हफते दै छौ दूस औसौ, जिंदै आमु टोल सांडणी चैंई, औरौ तिनु दूसौ दै ठीक हौणौ कारिए आणौ चैंई, पौरौ विशांव कै दूसौ नै।”

¹⁵ ऐजौ शोणेयो प्रभु यीशुए जोवाब दिया, “ओए रै कपटियो, का विशांव कै दूसै तुऔं मुंजीदै सौबीए आपणै बौल़ोद या गोदहे कै शाल़ो पौरैशै खोल़ेयो खै पाणी पियांदै ना नियौ?

¹⁶ तौ का इयौं बैटमाणिशौ कै जू अब्राहम कै वंश कै औसौ, औरौ जियौं खै शैतानै अठारो सालो दै बानेयो राखै राए थै, यहूदी लोगौ कै विशांव कै दूसै ऐसी बन्धन शै आज़ाद कौरणौ ठीक ना थी?”

¹⁷ जोबै यीशुए ऐजी बातौ बुली, तौ तैसकै सौबै विरोधी बैज्जत हौए गौवै, औरौ सौबै भीड़ तैसी महान कामौ शै जू सै कौरौ थिया, दैखैयो खुशी हौए।

राई कै दाणै औरौ खमीर का उदारण

¹⁸ तोबै यीशुए बौल़ौ, “हांव तुऔं खै बौतौऊं कै पौरमेशवर का राज्य कोसी साए औसौ? औरौ हांव तैसकी तुलना कोसी आरी कौरु?

¹⁹ सै ऐकी राई कै दाणै कै जैशणा औसौ, जैसी कोसी आदमीए लोयो आपणै बागड़ी दा जायौ बोए दिया: औरौ सै बौढ़ेयौ डाल़ बौणै गौआ; औरौ गौयणै कै चुड़कुल़ै आयौ तिथकै डाल़ी पांदी कोएलाण बाणौ।”

²⁰ तैणै हौजौ बौल़ौ, “हांव पौरमेशवर कै राज्य की तुलना कोसी आरी कौरु?

²¹ सै तैसी खमीरो साए औसौ, जिथुकै कोसी बैटमाणिशै लोयो भौरिशै आटै मुंजी बाटी दियु, औरौ सैजौ दैणिक शौ खमीर पूरै आटै दौ फोयलै गौ।”

चैईथा दवार

²² यीशु आपणै चैलै कै साथै नोगरो-नोगरो औरौ गांव-गांव दा जाऐबा उपदैश दैंदै बैई यरूशलेम शहर कै ढौबौ जांदा लागै रौआ थिया।

²³ तौ कोसीए तैसीयांदो पूछु, “ओए रै प्रभु, का पौरमेशवर ठिकै लोगौ खै सौदा कै सौजा शै बौचांदा?” तैणै तिनु बौल़ौ,

²⁴ “पौरमेशवर कै राज्य दो सांगड़ै दवारो बाटी जाणौ चैईथु औसौ, जिथुकै हांव तुऔं बुलू कै भौरिशै लोग ऐसी दवार दै जाणौ की कौचिश कौरलै, पौरौ जाणौ दै नाकामयाब हौए जांदै।

²⁵ जोबै पौरमेशवर जू घोरो का मालिक औसौ बिज़यो दवार बन्‍द कौरे दैला, औरौ तुऐं बायरै खौड़ै हौयौ दवार खोटखोटायो औरौ बिन्ती कौरेयौ बौलदै, ‘ओए रै प्रभु यीशु, आमु कारिए दवार खोले दै,’ औरौ सै जोवाब दैंदा, हांव तुऔं ना जाणु, तुऐं कुकै दै आए रौवै?

²⁶ तोबै तुऐं बौलदै, ‘कै आमुए तैरै साथै खोऊं पियुं औरौ तुऐं अमारै बाज़ारो दै उपदैश बै दिए।’

²⁷ पौरौ सै बौलदा, हांव तुऔं खै बुलू, ‘हांव ना जाणु कै तुऐं कुकै दै आए रौवै। ओए रै कुकर्म कौरणौवाल़ै, तुऐं सौबै मैरै सामणै दै दूर हौए जाव।’

²⁸ तिथै रुणु औरौ दांद चाकणै हौंदौ, जौल़ौ तुऐं अमारै पुराणिया अब्राहम औरौ इसहाक औरौ याकूब औरौ सौबी पौरमेशवर कै बातौ बौताणौवाल़ै खै पौरमेशवर कै राज्य दै बौठैयौंदे, औरौ आपी खै बायरै निकाल़दै बैई दैखलै।

²⁹ पूरब औरौ पश्‍चिम; उतर औरौ दक्षिण दै तोबै पूरै दुनिया शै लोग आलै, औरौ पौरमेशवर कै राज्य कै दावत मुंजी शामिल हौंदै।

³⁰ ऐजौ जाणै पाया, जू इबी आपी खै खास सौमझौ, सै बाद मै खास ना सौमझै जांदै, औरौ जू आपी खै खास ना सौमझौ सै खास सौमझै जांदै।”

हेरोदेस कै दुशमनी

³¹ तैसी सौमय किछै फरीसी लोगै आयौ तैसी बौल़ौ, “इथैदा आगु जा, जिथुकै हेरोदेस राजा ताखै मारणा चांव।”

³² तैणै तैसी बौल़ौ, “जाऐबा तैसी आदमी खै जू ऐक सियाल़ी कै जैशणा चलाक औसौ बौल़ै दै, कै दैख हांव ऐलो औरौ दोतियो दुष्टआत्मा कै निकाल़दा औरौ बीमारों कै ठीक कौरदा, औरौ तिजै दूसै हांव आपणा काम पूरा कौरदा।

³³ तोबै बै ऐलो औरौ दोतियो औरौ पोरशोए हांडणौ जौरुरी औसौ, जिथुकै ऐक पौरमेशवर कै बातौ बौताणौवाल़ै कै सिरफ यरूशलेम शहर दा ही मारा जांदा।”

यरूशलेम शहर कारिए शोग

³⁴ “ओए रै यरूशलेम शहर कै लोगौ! तुऐं तिनु पौरमेशवर कै बातौ बौताणौवाल़ै कै मार दियै, जू पुराणै सौमय दै रौंव थिए, औरौ तिनु लोगौ खै पाथरो शै मारै दिए, जिनु तोंवारै धोरे छाड़ै राए थिए। किशैक बैई मोऐं ऐजौ चोऊ, कै जैशै मुरगी आपणै नानड़िया कै आपणै पाखौ तौड़ी रोखवाल़ी कारिए कौठै कौरौ, तैशैखैई हांव बै तैरै नानड़िया कै कौठै कौरु, पौरौ तुऐं ऐजौ ना चैंई।

³⁵ दैखैया, तोंवारा मंदिर तुऔं कारिए उजाड़ छोड़ दैंव औरौ हांव तुऔं बुलू, जौल़ौ तुऐं बौलल़ै कै तुऐं औकियो बैई मुखै दैखलै, धन्‍य औसौ सैजा जू प्रभु कै नांव पांदी आंव।”