इब्रानियों 7 - सिरमौरी नौवाँ नियम

मलिकिसिदक महापुरोहित

¹ ऐजा मलिकिसिदक शालेम शहर का राजा थिया औरौ सौबिदा बौड़ा पौरमेशवर का पुरोहित थिया। मलिकिसिदक अब्राहम कै तौलौ भैटा जौल़ौ सै राजाओं खै हरायो पाछु जांदा लागै रौआ थिया औरौ तैसी आशीष दी।

² औरौ अब्राहमै तैसी तिनु सौबी चीज़ौ का देशवाँ भाग दिया जू तैणै आपणै दुशमनो कैईंदा लूटी राए थिया। मलिकिसिदक कै नांव का मतलब औसौ। न्याय कै साथै शासन कौरणौवाल़ा राजा औरौ शालेम कै राजा का मतलब औसौ शान्तै का राजा।

³ पवित्र शास्त्र दै तैसकै माँ-बापू, औरौ पुराणिया या तैसकै जन्म या तैसकै मौत कै बारै मुंजी किछै बै ना लैखै रैई। सै सौदा कारिए ऐक महा पुरोहित औसौ। इथकारिए सै पौरमेशवर कै बैटै कै जैशणा औसौ।

⁴ ऐबै इथपांदी ध्यान कौरौ कै मलिकिसिदक कैशणा महान थिया, जैसीखै पुराणिया अब्राहमै युद्ध पौरैशौ जू किछै लूटी राए थियु, तिथका देशवाँ हिस्सा दिया।

⁵ सैजै मर्द जू लेवी कै पीढ़ी कै थिए औरौ जू पुरोहित औसौ, तिनुखै मूसा कै कानून शिखांव कै इस्राएल देश कै औकै लोगौ, यानी तिनकै आपणै लोगौ कैई जू औसौ तिथमुंजी दा देशवाँ हिस्सा लोणा चैंई। पौरौ सैजै पुरोहित औरौ औकै लोग भाईयों कै जैशणै औसौ जिथुकै सै सौबै अब्राहम कै पीढ़ी कै औसौ।

⁶ पौरौ ऐजा मलिकिसिदक जू लेवी कै पीढ़ी का बै ना थी अब्राहम कैईंदा देशवाँ हिस्सा लौआ, औरौ अब्राहम सैजा थिया जैसी पौरमेशवर का वादा भैटी रौआ थिया, तोबै बै मलिकिसिदकै तैसी आशीष दी।

⁷ आमै निशोंक हौयौ जाणु कै जू आशीष दैंव सै आशीष पाणौ वाल़ै दा बौड़ा हौंव।

⁸ पुरोहितो खै हर चीज़ का देशवाँ हिस्सा भैटौ, पौरौ सै आदमी हौणौ कै नातै मौरे जांव। मलिकिसिदक सौबै ठुँ का देशवाँ हिस्सा पोऊवा, पौरौ पवित्र शास्त्र आमु बौतांव कै सै इबी बै जियुंदी औसौ।

^9-10 तौ आमु ऐजौ बै बौल़ै सौकु, कै लेवी जू लोगौ कैईंदा देशवाँ हिस्सा लोंव थिया, सै अब्राहम कै पीढ़ी का थिया। इथकारिए जोबै अब्राहम मलिकिसिदक शै भैटिया औरौ तैसीकै देशवाँ हिस्सा दिया, तौ आमु ऐजौ बौल़ै सौकु कै लेवीए बै अब्राहम कै दवारा मलिकिसिदक कै देशवाँ हिस्सा दिया।

ऐक नोऐं पुरोहित कै जौरुरत

¹¹ लोगौ खै तिनु पुरोहितो कै योजना कै आधार पांदी मूसा कै कानून दैय राए जू लेवी गोत्र कै हारून दै आए रौवै थिए, पौरौ लोग तियौं योजना कै दवारा सिद्ध ना बोणै सौकौ। इथकारिए ऐक ओका पुरोहित कै आणौ कै जौरुरत थी, ऐक ऐशणा पुरोहित जू हारून कै जैशणा ना आथी पौरौ मलिकिसिदक कै जैशणा थिया।

¹² जिथुकै जोबै पुरोहितो कै मंडली दा बौदलाव हौंव, तौ मूसा कै कानून खै बै बोदल़ना जौरुरी औसौ।

¹³ आमुए ऐजी बातौ मसीह कै बारै मुंजी बौल़ै लोई, जू ऐक औकै गोत्र का थिया। तैसी गोत्र मुंजीदै कोसीए बै ऐक पुरोहित कै रुप दै वेदी पांदी सेवा ना कौरे रैई थी।

¹⁴ सौबै जाणौए, कै अमारा प्रभु यीशु यहूदा कै पीढ़ी का औसौ औरौ मूसाए यहूदा कै कोसी बै पीढ़ी कै पुरोहित बाणणौ कै बारै मुंजी किछै ना बौतैई औरौ ना ही यहूदा कै कोसी पीढ़ी मुंजीदा कुणिए बै पुरोहित ना बौणी थी।

¹⁵ ऐबै आमै हौजौ बै जादा स्पष्ट हौयौ सौमझै सौकु कै मूसा कै कानून औरौ पुरोहितो खै बौदलै राए, जिथुकै अमारा महायहूदी पुरोहित जू इबी आए रौआ, सै मलिकिसिदक कै जैशणा औसौ।

¹⁶ यीशु कोसी खास आदमी यानी लेवी कै पीढ़ी हौणौ कै नियमौ औरौ शर्तो खै पूरु कौरणौ कै दवारा पुरोहित ना बौणी। पौरौ सै जीवन कै अमर हौणौ कै अनौखी शौकतै लैई पुरोहित बौणै गौआ।

¹⁷ जिथुकै पौरमेशवरे तैसकै बारै मुंजी पवित्र शास्त्र दो बौल़ै राए, “तू मलिकिसिदक पुरोहित कै जैशणा सौदा कारिए महायहूदी पुरोहित बौणै गौआ।”

¹⁸ मूसा कै कानून सैजौ ना कौर सौकी जू इनु कौरणौ चैंई थियु, ऐजै कानून कुणजैई काम कै ना आथी, इनु बौदलै राए।

¹⁹ इथकारिए मूसा कै कानून कोसी बात खै सिध्द ना कौरी, औरौ तिनु कानून कै ठाँव पांदी आमु ऐक ऐशणै आछी आशा औसौ, जू यीशु मसीह दी औसौ, जिथकै दवारा आमु पौरमेशवर कै नेड़िक जाए सौकु।

नौवें महायहूदी पुरोहित कै महानता

²⁰ औरौ इथकै अलावा जोबै पौरमेशवरे यीशु खै पुरोहित कै रुप दा चोणे राए तौ तैणै ऐक शौं खाए।

²¹ लेवी कै पीढ़ी तौ बिना शौं कै पुरोहित बाणै गौवै, पौरौ यीशु शौं कै साथै पौरमेशवर कै ढौबौशा चोणे गौआ, जैणै तैसकै बारै मुंजी बौल़ौ, “हांव पौरमेशवर जू ऐजी शपथ खोऊं, औरौ हांव आपणै फोयसलै शै ना पौछतांदा कै तू सौदा कारिए पुरोहित बौणै गौआ।”

²² इथकारिए यीशु सैजा औसौ जू आमु कै ऐक बड़िया कौरार कै पूरै हौणौ कै बौजैह बौणौ।

²³ इथै यीशु मसीह कै पुरोहित कै ऐक ओकी बात औसौ तिनुमुंजी दै हरेक पुरोहित कै मौत हौए गौए औरौ इयौं बौजैह शै सै आपणा काम जारी ना राखै सौकी।

²⁴ पौरौ यीशु सौदा रौंव; इथ बौजैह शै ओका कुणिए बै तैशैखै पुरोहित ना बौणदा जैशै सै औसौ।

²⁵ इथकारिए जू यीशु कै दवारा पौरमेशवर कै धोरे आंव, सै तिनकै पूरी-पूरी मोक्ति कौरी सौकौ, जिथुकै सै तिनु कारिए बिन्ती कौरणौ खै हमैशा जियुंदी औसौ।

²⁶ यीशु तैशणा महायहूदी पुरोहित औसौ जैसकी आमु जौरुरत औसौ। सै पवित्र औसौ, औरौ बिना पापवाल़ा, शुध्द, औरौ पापियों कै प्रभाव शै दूर रौंव, औरौ तैसी स्वर्ग दा बै ऊबा उठाए राए।

²⁷ औरौ सैजै महायहूदी पुरोहित जू हारून कै पीढ़ी कै थिए तिनु साए यीशु खै जौरुरी ना आथी कै हर रौज औगौड़ियौ आपणै पापौ औरौ तोबै लोगौ खै पापौ कारिए बलिदान चौढ़ांव, जिथुकै यीशु आपी खै बलिदान चौढ़ायौ तैणै ऐकैई बैई सौबै लोगौ कै पापौ कारिए आपी खै बल़ि चौढ़ाए दिया।

²⁸ जिथुकै मूसा कै कानून तौ कमजोर आदमी खै महायहूदी पुरोहित खै चुणो, पौरौ सैजी शौं जू मूसा कै कानून कै बाद आई तियैं पौरमेशवर कै बैटै खै महायहूदी पुरोहित कै रुप दा चुणा। सै हमैशा कारिए अमारै खातिर सिध्द महायहूदी पुरोहित बौणै गौआ।