इब्रानियों 12 - सिरमौरी नौवाँ नियमधीरज कै बुलाहट 1 इथकारिए, जैशैकै बौहितै सारै लोगौ कै जीवन शै बिशवाश कै बारै मुंजी गवाहियाँ भैटी, जू ऐक बौड़ी भीड़ कै जैशणी अमारै चोऊ ढौबै घैरेयौंदी औसौ, तौ आव, आमै हरेक रुकणौवाल़ै चीज़ौ औरौ उलझाणौवाल़ै पाप खै दूर कौरेयौ, तैसी बाटौ पुंडे चालौ जिथपांदी आमु चालणौ चैंई। 2 आव आमै बिशवाश कै कर्ता औरौ सिध्द कौरणौवाल़ै यीशु खै बारै मुंजी सुंचदै रौं। तैणै तैसी आनन्द कारिए जू भविष्य दा तैसकै आगै राख राए थिया, लज्जा कै किछै फिकर नी कौरी, औरौ सै क्रूस का दुख सैयौ मौरे गौआ औरौ सौबीदै बौड़ै सिंहासन पांदी पौरमेशवर कै सोऐं ढौबौ बौठै गौआ। पौरमेशवर कि डांट 3 यीशु कै उदारण कै बारै मुंजी, कै तैणै तिनु पापी कारिए कैतरा दुख सोऊवा जू तैसीआरी ऐतरै नफरत कौरौ थिए, तैणै इथकारिए दुख सोऊवा, ताकि तुऐं निराश हौयौ हिम्मत नै छोड़े दैंव। 4 इबी तौड़ी बुराई कै ताकतो कै खिलाफ तोंवारा संघर्ष इशैक हद तौड़ी ना सैहणौ पौड़ी जिथै लोग तुऔं मारै दैंव। 5 औरौ तुऐं तिनु हौंसला वाल़ै वचनो कै बिसरै गौवै जू पौरमेशवरे आपणै नानड़िया कै रुप दै तुऔं बौल़ै राए थिए, “ओए रै मैरै बैटै, जोबै प्रभु तुऔं खै ऐजा ऐहसास दियांव कै तुऐं गौलत कौरे राए तौ तैसी पांदी ध्यान दैव औरौ जोबै सै तुऔं डांटौ तौ हिम्मत नै हारैया। 6 जिथुकै प्रभु जैसी आरी प्यार कौरौ, तैसीखै डांट बै लांव, औरौ जैसी सै आपणा बैटा मानौ, तैसीखै सै छिटै कै बै मारो।” 7 जोबै कै तुऐं सुधरणौ कारिए पौरमेशवर कै डांट खै सैय लौए तौ याद राखौ कै पौरमेशवर तुऔं ओलाद कै जैशणै मानौ। तिथु ऐक पिता कै सौजा सौमझेयौ सैय पाव; जिथुकै पौरमेशवर तुऔं ओलाद जाणैयौ तोंवारै साथै बर्ताव कौरौ, सोबी कै बापू आपणी ओलाद का सुधार कौरौ। 8 जै तुऔं खै डांट नी लाए जांव तौ तुऐं पौरमेशवर कै साची ओलाद ना आथी। 9 तैशैखैई जोबै कै दुनिया दै अमारै पिता बै आमु कै ताड़ैया कौरौ थिए, औरौ आमै तिनका आदर कौरा, तौ आमु आपणै स्वर्ग कै पिता का कैतरा जादा आदर कौरणा चैंई औरौ जोबै सै आमु सुधारौ तोबै आमु तैसकी बात मानेयो जीवन बीताणा चैंई। 10 ऐसी दुनिया दै अमारै पिता जू तिनु सोही लागौ थियु तिथकै हिसाब शै आमु डांटौ थिए, पौरौ पौरमेशवर अमारै फायदै कारिए कौरौ, ताकि आमु बै तैसकै जैशणै पवित्र बौणै जांव। उपदैश औरौ चैतावणी 11 जोबै आमु सौजा दैय जांव, तौ तैसी सौमय डांट आछी ना लागौ, पौरौ बुरै लागौ, पौरौ बाद मै, जोबै आमु इथलैई शिख लोंव, तोबै आमु शान्तै भैटौ, जिथुकै आमै तोबै सोही तरीकै लैई जीणु शुरु कौरौ। 12 इनु सौबी बातौ कै बौजैह शै मौज़बूत बौणौ औरौ आपी खै खुश कौरौ। 13 औरौ इथै-तिथै दैखणौ कै बजाय, तुऐं तियौं सीधै बाटौ पांदी जाव जू यीशु कै धोरे लोय जांव, ताकि अमारै बीच मुंजी जू लोग आत्मिक रीति शै कमजोर औसौ, सै भौटकै नी जांव पौरौ तिनका बिशवाश मोजबूत हौए जांव। 14 सौबीआरी मैल-मिलाप राखौ, औरौ ऐक पवित्र जीवन जिणौ कै कौचिश कौरणै चैंई जिथकै बिना कुणिए प्रभु खै कौलोंई बै ना दैख सौकौ। 15 औरौ चौकश रौया, ऐशै ना हौंव कै, कुणिए पौरमेशवर कै अनुग्रह शै अनजान रौए जांव, औरौ कुणिए तोंवारै बीच मुंजी पौरैशानी खौड़ै कौरौ। ऐशणा आदमी तुऔं मुंजी बैजाए लोगौ कै बर्बाद कौरे सौकौ। 16 ऐशै ना हौंव, कै कुणिए आदमी गौलत काम कौरणौवाल़ै या तुऔं मुंजीदै अब्राहम कै पौतै एसाव साए अधरमी नै हौंव, जिथुकै सै पहलौठा बैटा थिया, इथकारिए तैसीकैईं खास पद हौणौ का औधिकार थिया। पौरौ तैणै तैसी औधिकार का आदर ना कौरी औरौ इथकारिए तैणै आपणै नानड़ै भाई याकूब खै इथु ऐक बैई कै खाणौ कारिए बैकै दियु। 17 तुऐं जाणौ तौ औसौए, बाद दी तैणै आपणै पिता कै आशीष चाए, जू तैसी ना भैटी, औरौ आशु बौवायौ-बौवायौ सै आशीष चांव थिया पौरौ तोबै बै जू किछै तैणै आगै कौरे राए थियु तिथु सै औटेयौ बौदलै ना सौकी। 18 तुऐं सीनै धारो कै जैशणै ठाँव पांदी ना आए रैई, जिथु दैखी औरौ छोऐं सौकौ थिए। इथै भौपकीयौंदे आग या काल़े बादल़ या तूफान ना आथी, औरौ तैसी सौमय लोग ऐक ऐशणैई ठाँव पांदी थिए जोबै पौरमेशवरे तिनु आपणी कानून दियै। 19 तुऐं तुरही कै आवाज़ कै धोरे ना आए रैई, औरौ बौलणोवाल़ै कै ऐशणै शब्द कै धोरे ना आई जिनकै शुणणौवाल़ै बिन्ती कौरे, कै ऐबै आमुआरी हौजौ बातौ नै कौर। 20 तिनुऐ ऐशै इथकारिए बौल़ौ जिथुकै सै इयौं आज्ञा खै ना सैय सौकी कै जोबै पौरमेशवरे तिनुखै बौल़ौ, “जै कुणिए बै जानवर धारो खै छुओं, तौ तिथपांदी बै पथराव कौरे जांव।” 21 औरौ सैजा दर्शन ऐशणा डौराणा थिया, इथै तौड़ी कै मूसाए बै बौल़ौ, “हांव बैजाए डौरु औरौ कामणियुए।” 22 पौरौ तुऐं सिय्योन धारो कै धोरे आए रौवै, जिथै स्वर्गीय यरूशलेम शहर औसौ, जू जियुंदी पौरमेशवर का शहर औसौ औरौ लाखों स्वर्गदूत आनन्द कौ तैयार मौनांव। 23 तुऐं पौरमेशवर कै पहलौठै कै कलीसिया दै आए रौवै, जिनकै नांव स्वर्ग दै लैख राए। तुऐं आपी पौरमेशवर कै धोरे आए रौवै, जू सौबी लोगौ पांदी न्याय कौरौ। तुऐं स्वर्ग दै धरमी लोगौ की आत्माओं कै धोरे आए रौवै जिनु ऐबै सिध्द बाणै राए। 24 तुऐं यीशु कै धोरे आए रौवै जू पौरमेशवर औरौ लोगौ मुंजी नोऐं कौरार कै बीचवैई कौरौ, औरौ छिड़कैयौंदे लोऊ कै धोरे आए रौवै, हाबिल कै लोऊए न्याय कै मांग कौरे पौरौ मसीह का लोऊ पापौ कै माफी कारिए बौवाया गौआ। 25 चौकश रौव, औरौ तैसी पौरमेशवर कै मानौ जू तुऔंआरी बातौ कौरौ, जिथुकै इस्राएल कै लोग जोबै दुनिया पांदी थिए तौ पौरमेशवर कै सौजा शै ना बौचै सौकी, इथकारिए ऐजौ अमारै खातिर हौजौ बै बुरु हौंदौ जै आमै तैसी पौरमेशवर कै बात शुणणौ शै मौना कौरे दियु जू आमु स्वर्ग शै चैतावणी दैंव। 26 जोबै पौरमेशवरे सीनै धारो पौरैशौ बौल़ौ तौ तैसकै आवाज़ै धोरती खै हिंजाल़ै दै पौरौ ऐबै तैणै ऐजा वादा कौरे राए, “एकबेई औटेयौ, हांव सिरफ धोरती खै ही नी पौरौ गौयण खै बै हिलाए दैन्दा।” 27 औरौ ऐजै आवाज़ एकबेई औटेयौ इयौं बातौ खै दिखांव, कै सौबै बाणैयौंदी चीज़ौ हिंजाल़ी जांदी, औरौ हौटाए जांदी; ताकि जू चीज़ौ हिलाए ना जांव, सैजी हमैशा बौणेयौंदी रौंदी। 28 इयौं बौजैह शै आमु जू राज भैटौ, तिथु हिंजाल़ी ना सौकौ, आव आमै धन्यवादी बौणु, जिथलैई आमै भोक्ती, औरौ डौर कै साथै, पौरमेशवर कै ऐशणै आराधना कौरे सौकौ जिथलैई सै खुश हौंव। 29 जिथुकै जोबै अमारा पौरमेशवर सौजा दैंव तौ सै ऐक बौड़ै आग कै जैशणा औसौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation