इब्रानियों 10 - सिरमौरी नौवाँ नियम

जानवर का बलिदान काफी ना आथी

¹ मूसाए जू कानून दैय राए थिए सै सिरफ तिनु आछी चीज़ौ कै ऐक सोही ना लागणोवाल़ै तस्वीर औसौ जू भविष्‍य दी आणौवाल़ी औसौ, ऐजै असलियत ना आथी। इथकारिए कानून कै मानणौ वाल़ै लोग हर साल ऐक जैशणै बलिदान चौ‌ढ़ांव, पौरौ ऐजै बलिदान तिनु लोगौ खै कौलोंई बै सिध्द ना बाणै सौकौ जू पौरमेशवर कै आराधना कौरणौ कारिए तैसकै नेड़िक आंव।

² जै मूसा कै कानून तिनु सोही कौरे सौकदै, तौ बलिदान चौढ़ाणै बोन्‍द हौए जांदै। औरौ आराधना कौरणौवाल़ै सौथीखै आपणै पापौ शै शुध्द हौए जांदै औरौ सै आगै खै पापौ का दोष महसूस नी कौरदै।

^3-4 पौरौ जानवरो कै बलिदान का लोऊ पापौ खै दूर ना कौरे सौकौ। बल्कि, हर साल ऐजौ लोगौ खै तिनकै पापौ खै याद दियांव जू तिनुऐ कौरे राए।

मसीह का बलिदान पूरा

^5-6 इथकारिए जोबै मसीह दुनिया दा ओऊवा, तौ तैणै पौरमेशवर खै बौल़ौ, तू बलिदान औरौ भैंट ना चांए; सैजा बलिदान जू जानवरो खै पूरी तरह शै जौल़ायौ खै चौढ़ाया जांव औरौ बलिदान जू पापौ कै माफी कारिए भैंट चौढ़ाया जांव, सै ताखै खुशी ना कौरौ। पौरौ तुऐं मुखै बलिदान हौणौ कारिए ऐक आदमी बौणणौ दिया।

⁷ तोबै मसीहे पौरमेशवर खै बौल़ौ, हांव तैरी इछा पूरी कौरणौ कारिए इथै औसौ, “दैख! हांव इथै औसौ। मैरै बारै मुंजी ऐजी बात किताब दै लैखै राए।”

⁸ मूसा का कानून शिखांव कै बलिदान औरौ भैंट पापौ की बौजैह शै चौढ़ाए जाणौ चैंई। पौरौ मसीहे इनु बातौ का जिक्र किथु कौरा औरौ बौल़ौ कै पौरमेशवर तिनु ना चांव?

^9-10 औरौ बाद दो तैणै ऐशै बौल़ौ, “ओए रै पौरमेशवर, हांव तैरी इछा पूरी कौरदा ओऊवा।” औरौ पौरमेशवर कै इछा कै हिसाब शै, यीशु मसीहे आपणै शोरीर खै सिरफ ऐकै बैई बलिदान कै रुप दा चौढ़ाए दिया औरौ इथलैई पौरमेशवरे आमु पवित्र बाणै राए। ऐशैखैई, मसीह आगलै कौरार कै बलिदानों खै हौटाए दैंव ताकि सै दूजा सौमझौता शुरु कौरे सौकौ।

¹¹ हरेक यहूदी पुरोहित हर रौज वेदी कै सामणै खौड़ा रौंव औरौ लोगौ कै पापौ खै दूर कौरणौ कारिए नियमौ खै पूरा कौरौ। सै लगातार ऐक जैशणै बलिदानों खै चौढ़ादा रौंव जू कौलोंई बै तैसी आदमी कै पापौ खै दूर ना कौरे सौकौ, जू तैणै कौरे राए।

¹² पौरौ अमारै महायहूदी पुरोहित यीशु मसीहे अमारै पापौ कै माफी कारिए आपी खै हमैशा कारिए सिरफ ऐक बलिदान कै रुप दा चौढ़ाए दिया। औरौ ऐबै सै पिता पौरमेशवर कै सोऐं ढौबौ सिंहासन पांदी आदर कै ठाँव दा हमैशा कारिए बौठै गौआ।

^13-14 औरौ मसीहे आपणै शोरीर खै सिरफ ऐकै बैई बलिदान कै रुप दा पौरमेशवर खै दैय राए औरौ इथ बौजैह शै तैसकै लोगौ कै पवित्र कौरे राए औरौ सैजै लोग सौथीखै हमैशा कारिए धरमी बौणै गौवै। औरौ ऐलो सै तिथै औसौ, औरौ इंतजार कौरे लौआ जांव तौड़ी कै तैसकै सौबै दुशमनो खै पौरमेशवर हराए नै दैंव औरौ तैसकै लातो तौड़ी कौरे दैंव।

¹⁵ औरौ पवित्र आत्मा बै आमु ऐजौ बौतांव कै ऐजौ साचौ औसौ। पौरमेशवर कै तैसी वादै कै याद कौरौ जिथका जिक्र मोऐं आगै कौरे राए थिया जिथमुंजी तैणै बौल़ौ,

¹⁶ “तोबै प्रभु बौल़ौ कै, जू नोऐं कौरार हांव तिनु दूसौ कै बाद इस्राएल कै लोगौ कै साथै कौरदा, सैजै ऐजै औसौ कै हांव आपणै नियम-कानूनो खै तिनकै दिलो दा लिखदा, औरौ हांव तिनकै विवेक दा पांदा।”

¹⁷ पौरमेशवर ऐजौ बै बौल़ौए कै, “हांव तिनकै पापौ खै, औरौ तिनकै बुरै कामौ खै औटेयौ कौलोंई याद ना कौरदा।”

¹⁸ औरौ पौरमेशवर अमारै पापौ खै माफ कौरौ, तौ ऐबै कुणजाई बै ओका बलिदान दैणौ कै जौरुरत ना आथी।

हिम्मत कै साथै पौरमेशवर तौड़ी जाणौ

¹⁹ इथकारिए, बिशवाशी भाईयों, यीशुए आपणा लोऊ ऐक बलिदान कै रुप दा दैय दिया। इथलैई आमै स्वर्ग कै सौबीदै पवित्र ठाँव दै बिना डौर कै जाए सौकु।

²⁰ ऐक बलिदान कै रुप दा मौरेयौ, मसीहे स्वर्ग कै पवित्र तोम्बू कै पर्दे शै हौयौ हौटा औरौ नोऐं बाट बाणै दै जिथलैई आमु जिन्दगी भैटदै।

²¹ औरौ आमुकैंई ऐशणा महायहूदी पुरोहित औसौ जू पौरमेशवर कै घोरो पांदी राज कौरौ।

²² अमारै दिल कै मसीहे आपणै लोऊ लैई पवित्र कौरे राए ताकि आमै जाणै सौकु कै ऐबै आमु दै कुणजै गौलती ना आथी। अमारै शोरीर खै शुध्द पाणी लैई धौयौ आमु तैयार कौरे राए। इथकारिए बिशवाशी भाईयों, आमु आपणै पूरै मन औरौ ऐशणै बिशवाश कै साथै पौरमेशवर कै नेड़िक ओऊं। जू ऐबै हिली ना सौकौ

²³ ऐबै आमै बिना कोसी शक कै आपणी तियौं आशा दै अटल रोऊं, जिथुकै आमै पौरमेशवर पांदी तैसकै वादै खै पूरा कौरणौ कारिए भोरोशा कौरे सौकु।

²⁴ आव आमै ऐकी-दुजैआरी प्यार औरौ आछी चीज़ौ कै कामौ खै कौरणौ कारिए ऐकी-दूजै खै हिम्मत दैया कौरौ।

²⁵ आव आमै पौरमेशवर कै आराधना कौरणौ कारिए कौठा हौणा बंद ना कौरौ जैशै किछै लोगै कौरे लो। जैशैकै कैतरै कै भोवार औसौ, पौरौ आमु ऐकी दूजै खै हिम्मत औरौ चैतावणी दैणी चैंई, खास कौरेयौ ऐबै कै जोबै कै प्रभु कै औटेयौ पाछु आणौ कौ दूस नेड़िक आन्दौ लागै रौ।

²⁶ जिथुकै सुसमाचार कै सौचाई खै जाणणौ कै बाद, जै आमु जाणै बौझेयौ पाप कौरु, तौ ऐशणा कुणजाई बलिदान बाकी ना आथी जू अमारै पापौ खै दूर कौरे सौकौ।

²⁷ पौरौ तिनुखै डौर कै साथै पौरमेशवर कै न्याय का औरौ बैजाए भोबकैयौंदी आग कै उमीद कौरणै पौड़दै जू तिनु नाश कौरे दैंदै जिथुकै सै पौरमेशवर का विरोध कौरौ।

²⁸ कुणजाई बै आदमी जू मूसा कै कानून का पालन ना कौरौ थिया, सै दो या तीन आदमी कै गवाही पांदी, बिना दया कै मारै दिया जांव थिया।

²⁹ जै मूसा कै कानून कै हिसाब शै ऐशणै सौजा थै, तौ तैसी आदमी कै सौजा बैजाए बौड़ै हौंदै जू पौरमेशवर कै बैटै कै ना अपनांव। तैणै पौरमेशवर कै बैटै खै आपणै लातो तौड़ी कौरे दिया, जिथुखै तैणै तैसका आदर ना कौरी। तैणै मसीह कै तैसी लोऊ कै पवित्र ना मानी जिथलैई पौरमेशवरे तैसी पवित्र बाणणौ कारिए नोऐं कौरार शुरु कौरे। तैणै पवित्र आत्मा का आदर ना कौरी जिथलैई तैणै अनुग्रह पौऊवा।

³⁰ जिथुकै आमु जाणुए कै पौरमेशवरे बौल़ौ, “बौदला लोणा मैरा काम औसौ, हांव आपी बौदला लोन्दा।” औरौ तोबै ऐजौ कै, “प्रभु आपणै लोगौ का न्याय कौरदा।”

³¹ जियुंदी पौरमेशवर कै हाथौ लैई सौजा पाणै बैजाए खतरनाक बात औसौ।

³² तिनु पाछलै दूसौ कै बारै मुंजी सुंचौ जोबै तुऐं आगलै बैई मसीह कै बारै मुंजी जाणै राए थियु। याद कौरौ कै तुऐं कैशै बिशवाश लायक बौणैयौंदे रौवै चाए इथकारिए तुऔं बैजाए दुख सैहणा पौड़ौ।

³³ कौलोंई-कौलोंई तौ ऐशै हौं, कै तुऐं नेंदैया औरौ कौल़ेश सौंयदै बैई तमाशा बौणै, औरौ कैई बार तुऐं आपणी इछा शै तिनु लोगौ मुंजी शामिल हौए गौवै जिनकै बैज्जती हौंव थी औरौ जिनुवारी बुरा बर्ताव हौंव थिया।

³⁴ तुऐं कैदी कै दुख दै बै दुखी हुवे औरौ आपणै जायदात बै खुशी सै लुटणौ दै; जिथुकै तुऐं जाणौए कै तुऔं कैई ऐबै बै सैजी चीज़ौ औसौ जिथका वादा पौरमेशवरे कौरे राए थिया, जू कै बैजाए आछौ औसौ औरौ जू हमैशा बौणेयौंदी रौंदी।

³⁵ इथकारिए आपणै बिशवाश खै ना छोड़ेया चाहै किछै बै हौए जालो तोबै तुऔं पौरमेशवर कै ढौबौशा ऐक बौड़ा इनाम भैटदा।

³⁶ ऐबै तुऔं सब्र कै साथै सैहन कौरणौ कै जौरुरत औसौ, तोबैई तुऐं पौरमेशवर कै इछा कै पूरै कौरदै औरौ तुऔं सैजी सौबै चीज़ौ भैटदी जिथका वादा पौरमेशवरे कौरे राए।

³⁷ जैशैखै पवित्र शास्त्र दो लैखै राए: पौरमेशवर बौल़ौ, “ऐबै बैजाए दैणिक सौमय रौए गौआ जोबै कै आणौवाल़ा आन्‍दा औरौ देर ना कौरदा।

³⁸ औरौ मैरै सैजै लोग जू बिशवाश शै धरमी बौणै रौवै सै जियुंदी रौंदै। औरौ जै सै पौरमेशवर पांदी भोरोशा कौरणा छोड़े दैंव, तौ हांव सौथीखै तिनुदा खुशी ना हौंदा।”

³⁹ पौरौ आमै तिनु लोगौ मुंजी ना आथी जू पौरमेशवर पांदी भोरोशा कौरणा छोड़े दैंव औरौ जिनकै जिन्दगी नाश हौए जांव। पौरौ आमै तिनु लोगौ मुंजीदै औसौ जू आपणा बिशवाश बाणैयौंदा राखौ।