गलातियौं 6 - सिरमौरी नौवाँ नियमसौबी कै साथै भौलाए कौरौ 1 ओए रै बिशवाशी भाईयों, जै कोसी आदमीए कुणजाई पाप कौरे राए। तौ तुऐं जू पवित्र आत्मा कै अगुवाई शै चालौ, तैसी प्यार शै सोही बाटो पांदी पाछु लाणौ कारिए तैसकै मौदद कौरौ। ध्यान राखौ कै कोदी आपी ही तैसी पाप दै नै पौड़ै जांव। 2 तुऐं ऐकी-दूजै कै भार खै साझा कौरौ। ऐशैखैई तुऐं सैजौई कौरदै, जू मसीह चांव कै तुऐं कौरौ। 3 जै कुणिए सुंचौए कै सै ऐक बौड़ा अगुवा औसौ, जोबै कै सै सौथीखै ना आथी, तौ सै आपी धौखै दा रौंव। 4 हरेक आदमी आपणै खुद कै कामौ खै जांचो कै का सै आछै औसौ या आथी ना। जै तैणै आछै काम कौरे राए, तौ सै आपणै कामौ पांदी घमण्ड कौरे सौकौ। 5 जिथुकै आमु मुंजीदै हरेक खै खुद कै कामौ कै जुमैवारै लोणे चैंई। 6 सैजै लोग जिनु पौरमेशवर कै वचन मुंजी दु शिखाए राए, तिनु जू किछै बै तिनुकैईं औसौ तिनु लोगौ कै साथै साझौ कौरणौ चैंई जू तिनु शिखांव। 7 आपी खै धौखा नै दैव, जिथुकै कुणिए बै कौलोंई बै पौरमेशवर खै मूर्ख ना बाणै सौकौ, जिथुकै आदमी जू बौए दैंव, सैजौ ही काटदा। 8 जिथुकै जू आदमी सैजौ कौरौए जू तैसका पापी स्वभाव चांव, सै दैखदा कै ऐजौ तैसी कारिए मौत लोयो आन्दौ। पौरौ जू आदमी पौरमेशवर कै आत्मा कै इछा खै पूरी कौरौ सै दैखदा कै आत्मा तैसी सौदा कै जिन्दगी दैंदा। 9 आमु भले काम कौरणौ दै पाछु ना रौं तौ जै आमै कौलोंई हार ना मानु, तौ पौरमेशवर शै आपणै सौमय पांदी इनाम पांदै। 10 इथकारिए जिथै तौड़ी मौका भैटौ, आमु सौबी लोगौ खै साथै भोलाए कौरणी चैंई; खास तौर शै साथी बिशवाशी कै साथै। आखरी चैतावणी औरौ शुभकामनाएँ 11 मोऐं तुऔं आपी आपणै हाथौ लैई बौड़ै आक्षरौ दो लैखै राए। 12 जू लोग ओकी यहूदी लोगौ कै खुश कौरणा चांव, सैजैई तुऔं खतना कौरवाणौ कारिए जोर लांव। सै ऐजौ सिरफ इथकारिए कौरौ ताकि लोग तिनु ऐजा प्रचार कौरणौ कै बौजैह शै ना सतांव कै मसीह क्रूसो पांदी मौरा। 13 इथै तौड़ी कै सै खतना कौरेयौंदे यहूदी बिशवाशी बै मूसा कै सौबै कानून का पालन ना कौरौ, पौरौ सै चांव कै तोंवारा खतना कौरा जांव ताकि सै औकै यहूदी लोगौ कै सामणै घमण्ड शै ऐजौ बौताए सौकौ कै तोंवारा खतना तिनकै बौजैह शै हौआ। 14 जै हांव घमण्ड कौरु, तौ हांव सिरफ इयौं बातौ पांदी घमण्ड कौरदा कै अमारा प्रभु यीशु मसीह अमारै खातिर क्रूसो पांदी मौरा। जैसकै दवारा दुनिया मैरी नज़र दी औरौ हांव दुनिया कै नज़र दा क्रूसो पांदी चौढ़ाए गौआ। 15 जिथुकै ना खतना औरौ ना खतनारहित किछै माइनै ना राखौ, पौरौ पौरमेशवर कै दवारा ऐक नौवाँ आदमी बाणै जाणा ही माइनै राखौ। 16 जू लोग ऐसी नियम का पालन कौरौ पौरमेशवर तिनु सौबी लोगौ पांदी दया कौरौ औरौ सै शान्तै शै रौंव। सैजैई पौरमेशवर कै दवारा चोणेयौंदे लोग औसौ। 17 औगौड़ियौ कै मुखै दुख ना दौ, जिथुकै मैरै शोरीर पांदी जू दाग औसौ सैजै दिखांव कै हांव यीशु का ऐक चोणेयौंदा चैला औसौ। 18 ओए रै बिशवाशी भाईयों, हांव प्रार्थना कौरु कै प्रभु यीशु मसीह का अनुग्रह तुऔं सौबी कै साथै रौंव। आमीन। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation