गलातियौं 5 - सिरमौरी नौवाँ नियम

मसीह दै आज़ादी

¹ मसीहे आमु मूसा कै कानून का पालन कौरणौ शै आज़ाद कौरे राए। ताकि आमै हौजौ कौलोंई बै तिनु मूसा कै कानून कै गुलाम नी बौणु। इथकारिए आपणै आज़ादी कै पाकड़ेयौ राखौ औरौ आपी कै औटेयौ गुलाम नी बौणणौ दैंव।

² हांव पौलुस, जू तुऔं कैई बौलदा लाग रौआ, तिथुकै ध्यान शै शुणौ! जै तुऐं पौरमेशवर कै नज़र दै धरमी बौणणौ कारिए खतना कौराले, तौ मसीहे जू तुऔं कारिए कौरे राए, तिथकै किछै कीमत ना रौंदै।

³ मोऐं तुऔं औटेयौ चैतावणी दैय लौए कै जू आदमी इयौं उमीद लैई खतना कौरांव कै पौरमेशवर कै नज़र दै धरमी बौणै सौकौ, तौ तैसी मूसा कै कानून दी दैययौंदी हरेक आज्ञा कै मानणी पौड़दी।

⁴ तुऐं जू मूसा कै कानून का पालन कौरणौ कै दवारा धरमी बौणणा चांव, तुऐं मसीह शै आपणा सौमबंध तौड़ै पाए औरौ पौरमेशवर कै अनुग्रह खै गवांए दिया।

⁵ हांव ऐशै बौल़ै सौकु जिथुकै आमु पवित्र आत्मा पोरे आशा दियांव कै पौरमेशवर आमु धरमी कै रुप दै अपनाए राए जिथुकै आमै मसीह पांदी बिशवाश कौरु।

⁶ जै तुऐं मसीह यीशु कै चैलै औसौ तौ इयौं बातौ लैई किछै फर्क ना पौड़ौ कै तोंवारा खतना हौए रौआ कै ना हौए रैई। पौरौ बैजाए खास बात ऐजी औसौ कै आमु मसीह पांदी बिशवाश कौरु औरौ पौरमेशवर औरौ ओकी लोगौ कै प्रति प्यार राखु।

प्यार लैई मूसा कै कानून कौ पूरु हौणौ

⁷ तुऐं तौ आपणै आत्मिक जीवन कै दौड़ दै कामकै दौड़ै रौवै थिए। कुणै तुऔं आगै बौढ़णौ शै रौकै कै तुऐं सच कै नी मानौ?

⁸ ऐशणी शिक्षा पौरमेशवर कै ढौबौशी ना आंव, जैणै तुऔं आपणी संतान हौणौ कारिए चोणे राए।

⁹ याद राखौ! जैशै दैणिक शा खमीर सौबी बाटैयौंदे आटै दा फोयलै जांव, तैशैखैई दैणिक शै झूठी शिक्षा बौहितै लोगौ कै भौटकाए दैंव।

¹⁰ पौरौ हांव पौरमेशवर पांदी बिशवाश कौरु कै तुऐं ओकी लोगौ कै बातौ खै ना अपनांदै, पौरौ मैरी बातौ का पालन कौरदै। पौरौ जू तोंवारै दिमाक खै बैचैन कौरौ, सै कुणिए बै किथु ना हौंव पौरमेशवर कै दवारा सौजा पांदै।

¹¹ ओए रै बिशवाशी भाईयों, हांव प्रार्थना कौरु कै खतना जौरुरी ना आथी, औरौ इयौं बौजैह शै मुखै यहूदी लोगौ कै दवारा सताया जाणा जारी औसौ, जै हांव मसीह कै मौत कै बारै मुंजी प्रचार कौरणौ कै बजाय ऐजा प्रचार कौरु कै लोगौ का खतना हौणा चैंई तौ हांव यहूदी लोगौ कारिए बैज्जती कै बौजैह ना हौंदा।

¹² आछौ हौंदौ, कै जू तोंवारै दिमाक कै बैचैन कौरौ, सैजै आपी खै हिजड़ै ही बौणाए दैंदै।

¹³ ओए रै बिशवाशी भाईयों तुऔं पौरमेशवर कै दवारा आज़ाद हौणौ कारिए चोणे राए इथकारिए ऐबै तुऔं मूसा कै कानून का पालन नी कौरणा चैंई। पौरौ आपणी शोरीर कै इछाओं कै पूरा कौरणौ का मौका नी दैंव। पौरौ आपणी आज़ादी का इस्तैमाल प्यार शै ऐकी दूजै कै सेवा कौरणौ कारिए कौरौ।

¹⁴ जिथुकै सौबी मूसा कै कानून का निचोड़ इयौं ऐक आज्ञा दा बौताए राए कै तू आपणै पड़ोसी आरी तैशणा प्यार कौर जैशणा आपी आरी कौरे।

¹⁵ पौरौ जै तुऐं लगातार ऐकी दुजैआरी लोड़दै रौंव औरौ ऐकी दूजै खै पौरैशान कौरदै रौंव तौ चौकश रौया, तुऐं आपी खै बोरबाद कौरे दैंदै।

पवित्र आत्मा दवारा संचालन

¹⁶ पौरौ हांव बुलू, पवित्र आत्मा खै तुऔं खै काबू दै कौरणौ दौ। तोबै तुऐं सैजौ ना कौरदै जिथका तोंवारा पापी स्‍वभाव लालसा कौरौ।

¹⁷ जिथुकै अमारी पाप वाल़ी इछाएं पवित्र आत्मा कै खिलाफ औसौ, पौरौ पवित्र आत्मा पाप वाल़ै इछाओं कै खिलाफ औसौ। ऐजी दुईनै तागते लगातार ऐकी दुजैआरी लोड़ो, इथकारिए आमु सौदा तिनु आछै कामौ कै कौरे सौकु जू आमु कौरणा चोऊं।

¹⁸ पौरौ जै तुऐं पवित्र आत्मा कै काबू दै हौयौ चालौ तौ मूसा कै कानून कै अधीन ना रौं।

¹⁹ ऐजौ साफ औसौ कै पापी स्‍वभाव का-का कौरौ। यानी गौलत सौमबंध, गौंदै काम, बेशर्मी वाल़ै काम,

²⁰ मूर्तिपूजा, जादू टोना, बैर झोगड़ा, तिनु चीज़ौ खै पाणौ कै लालसा जू ओकी लोगौ कैंई औसौ, गुस्सा, विरोध, फूट, गुटबाजी,

²¹ औरौ ऐकी दुजैआरी ज़लन औरौ शराबीपन औरौ सैजै ऐशणै औकै सौबै बुरै काम कौरौ। मोऐं तुऔं चैतावणी दैय लौए जैशै आगै बै तुऔं चैतावणी दैय राए थै कै ऐशणै-ऐशणै काम कौरणौवाल़ै पौरमेशवर कै राज्य कै संतान ना हौंदै।

²² सैजै गुण जू पौरमेशवर कै आत्मा कै दवारा पौयदा हौंव, ऐजै औसौ प्यार, आनन्द, शान्तै, धीरज, औरौ दया, भोलाए, बिशवाश,

²³ नम्रता औरौ संयम औसौ; ऐशणा कुणजाई कानून ना आथी जू ऐशणी बातौ का विरोध कौरौ।

²⁴ औरौ जोबै लोग मसीह यीशु आरी सौमबंध राखौ तौ सै आपणै पापी स्‍वभाव कै दवारा ना चालौ। ऐजै ऐशणै औसौ जैशै तिनका स्‍वभाव मानौ क्रूस पांदी चौढ़ाए राए।

²⁵ जिथुकै पवित्र आत्माए आमु ऐक नौवाँ जीवन दैय राए, इथकारिए ऐबै आमु आपणै जीवन कै हरेक बातौ दै पवित्र आत्मा का कैहणा मानणा चैंई।

²⁶ आमु घमण्‍ड नै कौरणा चैंई, आमु ऐकी दूजै शै पौरैशान नी हौणौ चैंई, औरौ आमु ऐकी दूजै शै ज़लन नै राखणै चैंई।