प्रेरितो कै काम 21 - सिरमौरी नौवाँ नियम

यरूशलेम शहर कै यात्रा

¹ जोबै आमुए इफिसुस शहर कै बुड़ेईको खै विदा कौरे, तौ समुन्द्री जहाज कै यात्रा शुरु कौरे, तौ सीधै बाटो शै कोसी टापू दै आए, औरौ दूजै दूसै रुदूस टापू दै औरौ तिथैदै आमै पतरा टापू दै पौऊंचै।

² औरौ ऐक जहाज फीनीके प्रदेश कै जांदी बैई भैटौ, औरौ आमुए तिथपांदी चौढ़ेयौ यात्रा शुरु कौरे।

³ जोबै अमारै डैरै ढौबौ साइप्रस टापू दैखिया, तौ आमु तिथु छोड़ेयौ सीरिया प्रदेश कै ढौबौ बौढ़दै गौवै औरौ सूर नोगर दै पौऊंचै जिथुकै तिथै जहाज शै समान उतारणो थियु।

⁴ औरौ चैलै खै भैटियो आमै तिथै साती दूसौ तौड़ी रौवै, तिनुऐ पवित्र आत्मा कै शिखाए पौलुस शै यरूशलेम शहर कै ना जाणौ कै बिन्ती कौरी।

⁵ साती दूसौ कै बाद जोबै तिथैदै अमारै जाणौ का सौमय ओऊवा, तौ आमुए तिथैदै चालै पौड़ै, औरौ सौबी बैटमाणिशौ औरौ नानड़िया समैंत तिनिए आमु नगर कै बायरै तौड़ी पोऊंचाए औरौ आमुए किनारे पांदी घुंडू नियुड़ाएयो प्रार्थना कौरे।

⁶ तोबै ऐकी दूजै सै विदा हौयौ, आमै तौ जहाजो पांदी बौठै औरौ सै आपणै-आपणै घोरो खै हौटै।

⁷ सूर नोगर दै यात्रा शुरु कौरेयौ आमु पतुलिमयिस नोगरो दै पौऊंचै, औरौ आपणै बिशवाशी भाईयों खै नमशकार कौरेयौ तिनकै साथी ऐक दूस रौवै।

⁸ दूजै दूसै आमु तिथैदै हांडेयो कैसरिया शहर दै आए, औरौ फिलिप्पुसे सुसमाचार प्रचारक कै घोरे जायौ तैसकै धोरे रौआ, सै तिनु साती मर्दो मुंजीदा ऐक थिया, जैसीखै यरूशलेम शहर दै चोणेयौंदे चैलै विधवाओं कै दैखभाल कारिए चोणे राए थिया।

⁹ तैसकी चार कुंवारी बैटी थी; जू पौरमेशवर की बातौ बौतांव थी।

¹⁰ जोबै आमु तिथै बौहितै दूस हौए गौवै, तौ अगबुस नांव का ऐक पौरमेशवर की बातौ बौताणौवाल़ा यहूदिया प्रदेश शै ओऊवा।

¹¹ तैणै अमारै धोरे आयौ पौलुस का सापा कौरा, औरौ आपणै हाथ लात बांनैयौ खै बौल़ौ, “पवित्र आत्मा ऐजौ बौल़ौ, कै जैसी आदमी का ऐजा सापा औसौ, तैसीखै यरूशलेम शहर दै यहूदी लोग ऐशैखैई बांनदै, औरौ बैगानै यहूदी कै हाथौ दा दैय दैंदै।”

¹² जोबै आमुए ऐजी बातौ शुणी, तौ आमुए औरौ तिथै खै लोगै पौलुस कैईंदै बिन्ती कौरे कै, यरूशलेम शहर खै नी जाया।

¹³ पौरौ पौलुसे जोवाब दिया, “तुऐं ऐजौ का कौरौ, कै रुए-रुयो मैरा मन तौड़ौ? हांव तौ प्रभु यीशु कै नांव कारिए यरूशलेम शहर दा सिरफ बानणो कारिए ही नी पौरौ मोरणो कारिए बै तैयार औसौ।”

¹⁴ जोबै सै ना मानी तौ आमु ऐजौ बौलेयौ खै चुप्पी हौए गौवै, “प्रभु कै इछा पोरे हौए जांव।”

¹⁵ किछै दूसौ कै बाद आमुए तैयारी कौरी औरौ यरूशलेम शहर खै हौटै गौवै।

¹⁶ कैसरिया नोगर पौरैशै बै किछैक चैलै अमारै साथी चालै, औरौ आमु मनासोन नांव कै ऐकी आदमीए आपणै घोरे नियै, जू साइप्रस टापू का रौणौवाल़ा थिया, सै सौब दै आगलै चैलो मुंजीदा ऐक थिया, औरौ आमै तैसी कागे टिके।

यरूशलेम शहर दो पौलुस को आणौ

¹⁷ जोबै आमु यरूशलेम शहर दै पौऊंचै, तौ बिशवाशी भाई बौड़ै खुशी कै साथै आमुआरी भैटियै।

¹⁸ दूजै दूसै पौलुस आमु नियौ याकूब कै धोरे हौटा, जिथै सौबै अगुवे कौठै थिए।

¹⁹ तोबै तैणै तिनु नमशकार कौरेयौ, जू-जू काम पौरमेशवरे तैसकै सेवा कै जरिए बैगानै यहूदी लोगौ मुंजी कौरे राए थिए, ऐक-ऐक कौरेयौ सौबै बौतौऊ।

²⁰ तिनुऐ ऐजौ शोणेयो पौरमेशवर कै महिमा कौरे, तोबै तैसीखै बौल़ौ, “ओए रै भाई, तू जाणै, कै यहूदी लोगौ मुंजीदै कैईंयौं हजार लोगै बिशवाश कौरा; औरौ सौबवे मूसा कै कानून खै मानौए।

²¹ औरौ तिनु यहूदी बिशवाशियौं खै तैरै बारै मुंजी बौतौऊं कै तू बैगानै यहूदी लोगौ मुंजीदै रौणौवाल़ै यहूदी लोगौ खै मूसा कै कानून छोड़े दैणौ कै बात शिखांए औरौ बौल़ौ कै ना आपणै नानड़िया का खतना कौराया औरौ ना यहूदी भोवारो पांदी चालैया।

²² तौ हौजौ का कौरणौ चैंई? लोग जौरुर शुणदै कै तू इथै आए रौआ।

²³ इथकारिए जू आमै ताखै बुलू, सैजौ कौर। अमारै इथै चार आदमी औसौ, तिनु तियौं मनत कै पोरे कौरणै जू तिनुऐ पौरमेशवर कै सामणै मानै राए।

²⁴ तिनु लोयो तिनकै साथी आपी खै शुद्ध कौरणौ का भोवार पूरा कौर; औरौ तिनुखै खर्चा दै, कै सै खुल़मुंडी बाणौ। तोबै सौबै लोग जाणै पांदै, कै जू बातौ तिनुऐ तैरै बारै मुंजी शौणै रैई, तिंदै किछै बै सौचाई ना आथी, पौरौ तू आपी बै मूसा कै कानून खै मानैयौ तिथकै हिसाब शै चालै।

²⁵ पौरौ तिनु बैगानै यहूदी लोगौ कै बारै मुंजी जिनुवै बिशवाश कौरे राए, आमुए ऐजा फोएसला कौरेयौ तिनुखै ऐजौ बौताणौ कारिए ऐक चिट्ठी लिखयो भैजै दै कै सै सैजौ खाणौ नै खांव जू लोगै मूर्तो कै आगै चौढ़ाए राए औरौ गल़ा घोटेयौंदे गोरु को मांस नै खाया, औरौ गौलत सौमबंध बाणणौ शै दूर रौया।

²⁶ दूजै दूसै पौलुसे तिनु आदमी कै साथै जायौ आपी खै शुद्ध कौरा, औरौ सै मन्दिर दा हौटा, ऐजौ बौताणौ कारिए की शुद्धि कै दूस कोबे खत्म हौंदै, औरौ तिनुमुंजी दै हरेक कारिए बलिदान कोबे चौढ़ाए जांदै।”

मन्दिर दै पौलुस की गिरफ्तारी

²⁷ जोबै सैजै सात दूस पूरै हौणौ पांदी थिए, तौ एशिया प्रदेश कै यहूदी लोगै पौलुस खै मन्दिर दा दैखैयो सौबी लोगौ खै उकसाए, औरौ पौलुसो कै उंढा थामा औरौ लैरौ मारदै लागै।

²⁸ “ओए रै इस्राएल देश कै लोगौ, मौदद कौरौ; ऐजा सैजाई आदमी औसौ, जू लोगौ खै, औरौ मूसा कै कानून खै, औरौ ऐसी ठाँव कै खिलाफ दो हर जौगैह सौबी लोगौ खै शिखांव, इथै तौड़ी कै बैगानै यहूदी लोगौ खै बै मन्दिर दै लायौ तैणै ऐसी पवित्र ठाँव कै अपवित्र कौरे राए।”

²⁹ तिनुऐ ऐशै इथकारिए बौल़ौ जिथुकै तिनुऐ इफिसुस शहर का रौणौवाल़ा त्रुफिमुस कै पौलुस कै साथै नोगर दा दैखा थिया, औरौ सौमझौ थिए कै पौलुसे तैसी मन्दिर दा लियोऊवा।

³⁰ तोबै सौबी नोगर दै हलचल मोचै गौए, औरौ लोग दौड़ैयौ कौठै हुवे, औरौ पौलुसो खै थाम्बैयौ मन्दिर कै बायरै लोशयो लियोऊवा, औरौ तौलोंई दवार बोन्‍द कौरे दियै।

³¹ जोबै सै तैसी मारै दैणा चांव थिए, तौ सैनिक गुट कै ठोगड़े खै खबर पौंचै कै यरूशलेम शहर दै बौहितै सारै लोगौ मुंजी हलचल मोचै रोए।

³² तोबै सै तौलोंई सैनिकौ औरौ सूबेदारो खै नियौ तिनकै धोरे दौड़ैयौ ओऊवा; औरौ लोगै सैनिक गुट कै ठोगड़े खै औरौ सैनिकौ खै दैखैयो पौलुस खै मारणा-पिटणा छोड़े दिया।

³³ तोबै सैनिक गुट कै ठोगड़े पौलुस कै नेड़िक आयौ तैसी पाकड़ा, औरौ दो शांगुल़ो लैई बानणो कै आज्ञा दैयौ पूछदा लागा, “ऐजा कुण औसौ, औरौ ऐणै का राए कौरे?”

³⁴ पौरौ भीड़ौ मुंजीदै कुणिए किछै औरौ कुणिए किछै लैरौ मारदै रौवै औरौ जोबै हलचल कै मारै ठीक सौचाई ना जाणै सौकी, तौ तैसी कटगरेह दै लोए जाणौ कै आज्ञा दी।

³⁵ जोबै सै पौइड़ी पांदी पोऊंचा, तौ ऐशै हौं, की भीड़ौ कै दबाव की बौजैह शै सैनिकौ खै तैसी टिपयौ निणा पौड़ा।

³⁶ जिथुकै लोगौ कै भीड़ ऐजौ लैरौ मारैयौ तैसकै पौछौड़ियौ पौड़ै, “तैसीखै मारै दैव।”

³⁷ जोबै सैजै पौलुस खै कटगरेह दा लोय जाणौ पांदी थिए, तौ तैणै सैनिक गुट कै ठोगड़े खै बौल़ौ, “का मुखै आज्ञा औसौ कै हांव तांव कैंई किछै बुलू?” तैणै बौल़ौ, “का तू यूनानी भाषा जाणै?

³⁸ का तू तैसी मिस्र देश का ना आथी, जू इनु दूसौ कै औगौड़ियौ सरकार कै खिलाफ विद्रोह कौरेयौ चार हजार लोगौ खै हथियार समैंत शुनशान जौगैह दा लोय गौआ?”

³⁹ पौलुसे बौल़ौ, “ना हांव ऐक यहूदी आदमी औसौ! हांव किलिकिया प्रदेश कै मशहूर शहर तरसुस का रौणौवाल़ा औसौ। औरौ हांव तांव कैईंदै बिन्ती कौरु, कै मुखै लोगौआरी बात कौरणौ दै।”

⁴⁰ जोबै तैणै आज्ञा दै, तौ पौलुसे पोइड़ी पांदी खौड़ै हौयौ लोगौ खै हाथौ लैई चुपी रौणौ कारिए इशारा कौरा। जोबै सै चुपी हौए गौवै, तौ सै इब्रानी भाषा दा बौलदा लागा: