प्रेरितो कै काम 13 - सिरमौरी नौवाँ नियम

बरनबास औरौ शाऊल कै भैजणै

¹ अन्‍ताकिया शहर कै कलीसिया दै कैई पौरमेशवर कै बातौ बौताणौवाल़ै औरौ उपदैशक थिए; जैशै बरनबास औरौ शमौन तैसकौ औकौ नांव नीगर थियु; जिथका मतलब औसौ काल़ा आदमी औरौ लुकियुस कुरेनी औरौ चौथाई देश कै राजा हेरोदेस का दूधभाई मनोहम औरौ शाऊल।

² जोबै तिनुऐ उपवास कै साथै प्रभु की आराधना कौरे लोए थै, तौ पवित्र आत्माए बौल़ौ, “मुं कारिए बरनबास औरौ शाऊल कै मैरै सेवा कौरणौ कारिए जौई कौरौ जिथकारिए मोऐं तिनु बौयदै राए।”

³ तोबै तिनुऐ उपवास औरौ प्रार्थना कौरेयौ औरौ तिनु पांदी हाथ राखैयौ तिनु पौरमेशवर का काम कौरणौ कारिए भैजै।

पौलुस की आगलै प्रचार यात्रा

⁴ इथकारिए शाऊल औरौ बरनबास पवित्र आत्मा कै भैजैयौंदे अन्‍ताकिया शहर शै सिलूकिया शहर कै बंदरगाह तौड़ी हौटै; औरौ तिथैदै जहाजो पांदी बौठेयौ साइप्रस टापू पांदी सलमीस बंदरगाह कै हौटै।

⁵ औरौ सलमीस दै पौंचेयौ, पौरमेशवर का वचन यहूदी लोगौ कै यहूदी सभा-घोरो दा शुणौऊवा; यहून्ना जैसीखै मरकुस बै बौल़ौ तिनकी मौदद कौरणौ कारिए तिनकै साथै थिया।

⁶ इथकै बाद तिनुऐ पूरै टापू दै ऐकी नगर शै ओकी नगर कै यात्रा कौरे औरौ आखरी दै सै पाफुस शहर पौऊंचै। तिथै तिनु बार-यीशु नांव का ऐक जादूगर भैटा, जू यहूदी औरौ झूठा पौरमेशवर कै बातौ बौताणौवाल़ा थिया।

⁷ सै राज्यपाल सिरगियुस पौलुस कै साथी थिया, जू बुध्दिमान आदमी थिया, तैसी राज्यपाले बरनबास औरौ शाऊल कै आपणै धोरे बौएदैयौ पौरमेशवर का वचन शुणाणा चोऊवा।

⁸ (बार-यीशु कै नांव का मतलब एलीमास औसौ) पौरौ एलीमास जादूगरे, तिनका सामणा कौरेयौ राज्यपाल खै यीशु पांदी बिशवाश कौरणौ शै रोकणा चोऊवा।

⁹ तोबै शाऊले जैसकौ नांव पौलुस बै औसौ, पवित्र आत्मा शै भौरेयों एलीमास जादूगर कै ढौबौ टकटकी लायौ दैखौ औरौ बौल़ौ

¹⁰ “ओए रै सौबै कपट औरौ सौबै चतुराई शै भौरेयौंदे शैतान कै सन्‍तान, सारै धार्मिकता कै बौयरी, का तू प्रभु कै सीधै बाटौ खै बांगै कौरणा ना छोड़दा?

¹¹ ऐबै दैख प्रभु ताखै सौजा दैणौवाल़ा औसौ, औरौ तू किछै दूस तौड़ी आन्धा रौंदा, औरौ सुरज कै ना दैखदा।” तोबै तौलोंई धुंधल़ो औरौ इनारौ तैसी पांदी छाए गौ, औरौ सै उंढा-पुंडा जोंदा लागा, ताकि कुणिए तैसका हाथ पाकड़ेयो तैसकै मौदद कौरौ।

¹² तोबै राज्यपाले जू किछै हौए रो थियु, दैखैयो औरौ प्रभु कै उपदैश सै हैरान हौयौ तैणै प्रभु यीशु पांदी बिशवाश कौरा।

पिसिदिया जिले कै अन्‍ताकिया शहर दा पौलुस का उपदैश

¹³ पौलुस औरौ तैसकै साथीए पाफुस शहर शै समुन्द्री यात्रा शुरु कौरे औरौ सै पंफूलिया प्रदेश कै पिरगा शहर दै पौंचै गौवै, औरौ यहून्ना जैसीखै मरकुस बै बौल़ौ तिनु छोड़ेयौ यरूशलेम शहर कै हौटै गौआ।

¹⁴ औरौ पिरगा शहर शै औगौड़ियौ बोढ़यो गलतिया प्रदेश कै पिसिदिया जिले कै नेड़िक अन्‍ताकिया शहर दै पौऊंचै। औरौ विशांव कै दूसै यहूदी सभा-घोरो दै जायौ बौठ गौवै।

¹⁵ मूसा कै कानून औरौ पौरमेशवर कै बातौ बौताणौवाल़ै कै किताबो शै पोढ़णो कै बाद यहूदी सभा-घोरो कै ठोगड़े तिनकै धोरे ब्यौरा भैजा, “ओए रै भाईयों, जै लोगौ कै उपदैश कारिए तोंवारै मनो दै कुणजै बात औसौ तौ बौल़ौ।”

¹⁶ तोबै पौलुस खौड़ै हौयौ हाथौ लैई चुपी रौणौ का इशारा कौरेयौ सौमझौऊवे की मेसो रौंव, “ओए रै इस्राएल देश औरौ पौरमेशवर सै डोरणौवाल़ै, बैगानै यहूदी शुणौ

¹⁷ इनु इस्राएल देश कै लोगौ कै पौरमेशवरे अमारै पुराणियो खै चोणे राए, औरौ जोबै ऐजै लोग मिस्र देश दै प्रदेशी हौयौ रौंव थिए, तौ तिनकी बढ़ोतरी कौरे, औरौ बौड़ी शौकतै शै तिनुखै निकाल़ैयो लियोऊवे।

¹⁸ औरौ सै लमसम चाल़ीश सालो तौड़ी रेगिस्थान दै तिनुकै बरदाश कौरदा रौआ, जोबै की तिनुऐ बार-बार तैसकी आज्ञा ना मानी।

¹⁹ औरौ कनान देश दी सात जाति का नाश कौरेयौ तिनका देश लमसम साढ़े चार सौ सालो दी इनुखै विरासत दैय दी।

²⁰ अमारै पुराणियाए तिनकै पुराणिया कै मिस्र देश दै पौंऊचणौ तौड़ी लमसम चार सौ पचाश साल बाद कनान पांदी औधिकार कौरणा शुरु कौरा; पौरमेशवर कै बातौ बौताणौवाल़ै शमूएल तौड़ी इस्राएल कै लोगौ पांदी राज कौरणौ कारिए पिता पौरमेशवरे नेता चोणे दियै।

²¹ जोबै शमूएल इबी तौड़ी तिनका नेता ही थिया, इथकै बाद तिनुऐ ऐक राजा मांगा; तोबै पौरमेशवरे बिन्‍यामीन कै गोत्रो मुंजीदा ऐक आदमी यानी कीश कै बैटै शाऊल खै तिनु पांदी राजा बाणा। तैणै चाल़ीश सालो तौड़ी इस्राएल कै लोगौ पांदी शासन कौरा।

²² तोबै पौरमेशवरे शाऊल खै पद शै हटायो तैसकै ठाँव पांदी दाऊद खै राजा बाणा; जैसकै बारै मुंजी तैणै गवाही दी, ‘मुखै ऐक आदमी, यिशै का बैटा दाऊद, मैरै मन कै हिसाब शै भैट गौआ। सैजाई मैरै सौबै इछा पोरे कौरदा।’

²³ तैसकै वंश मुंजीदा पौरमेशवरे आपणै वादै कै हिसाब शै इस्राएल देश कै धोरे ऐक उध्दार कौरणौवाल़ा, यानी यीशु कै भैजा।

²⁴ जैसकै आणौ शै औगौड़ियौ यूहन्नाए सौबी इस्राएल देश कै लोगौ खै ऐजा प्रचार कौरा कै आपणै पापौ खै मानैयौ पाप कौरणा छोड़े दैव औरौ पौरमेशवर कै ढौबौ फिरैयौ बपतिस्मा लोणो कै जौरुरत औसौ।

²⁵ औरौ जोबै यूहन्ना आपणै सेवा पोरे कौरणौ पांदी थिया, तौ तैणै बौल़ौ, तुऐं मुखै का सौमझौ? हांव मसीह ना आथी! पौरौ दैखौ, मैरै बाद ऐक आणौवाल़ा औसौ, सै मुं दा बै जादा महान औसौ, हांव इथ लायक बै ना आथी कै तैसकै जूते कै तशमै खोले सौकु।”

²⁶ “ओए रै भाईयों, तुऐं जू अब्राहम कै सन्‍तान औसौ; औरौ तुऐं जू पौरमेशवर सै डोरणौवाल़ै बैगानै यहूदी औसौ, पौरमेशवरे तोंवारै धोरे उध्दार का सौंदेश भैज राए जू लोगौ खै बौचांव

²⁷ यरूशलेम शहर कै लोगै औरौ तिनकै नेताए यीशु मसीह कै ना पौछेयाणी औरौ तिनुऐ पौरमेशवर की बातौ बौताणौवाल़ै कै तिनु वचनो खै ना सौमझी, जिनु सै हर विशांव कै दूसै पोढ़ो थिए। इथकारिए तिनुऐ तैसी दोषी ठैहरोऊवा औरौ ऐशैखैई पौरमेशवर कै बातौ बौताणौवाल़ै कै वचनो खै पूरै कौरे।

²⁸ तिनुऐ मारणौ कै लायक कुणजाई दोष तैसदा ना पाई, तोबै बै राज्यपाल पिलातुस शै बिन्ती कौरे, कै सै मारै दिया जांव।

²⁹ औरौ जोबै तिनुऐ सैजौ सौबै कौरौ जू पवित्र शास्त्र तैसकै बारै मुंजी बौल़ौ, तिनुऐ तैसी ऐकी क्रूसो पांदी किलो लायौ मारै दिया औरौ क्रूसो पांदी दा उतारेयो कब्रो दा राखा।

³⁰ पौरौ पौरमेशवरे तैसी मौरेयौंदे मुंजीदा जियुंदी कौरा,

³¹ औरौ सै तिनु जू तैसकै साथी गलील जिले शै यरूशलेम शहर दै आए रौवै थिए, बौहितै दूसौ तौड़ी आपणै चैलै खै दैखिंदा रौआ; लोगौ कै सामणै ऐबै जिनुवै तैसी दैखा सैजैई तैसकै गवाह औसौ।

³² औरौ आमुए तुऔं तैसी कौरार कै बारै मुंजी जू पौरमेशवरे अमारै पुराणिया शै कौरे राए थै, ऐजा सुसमाचार शुणौऊं,

³³ कै पौरमेशवरे यीशु खै मौत शै जियुंदी कौरेयौ, सैजी कौरार अमारै सन्‍तान कारिए पोरे कौरे; जैशै भजन संहिता दो बै लैख राए, पौरमेशवरे मसीह कै बारै मुंजी बौतौऊ, ‘तू मैरा बैटा औसौ; ऐलो दा उबा हांव तैरा पिता बौणै गौआ।’

³⁴ औरौ तैसकै इयौं बातौ लैई मौरेयौंदे मुंजीदै जियुंदी हौणौ कै बारै मुंजी बै, कै सै कौलोंई नी शौड़ौ, पौरमेशवरे ऐजौ बौल राए, ‘हांव दाऊद पांदी कै पवित्र औरौ अटल आशीष तुऔं पांदी कौरदा।’

³⁵ दाऊद ऐजै बात औकै भजन संहिता दै बौल़ौ, ‘तू आपणै पवित्र जन कै शौड़णो ना दैंदा।’

³⁶ जिथुकै राजा दाऊद तौ पौरमेशवर कै इछा कै हिसाब शै आपणै सौमय दै सेवा कौरेयौ मौरे गौआ, औरौ आपणै पुराणिया आरी मिलै गौआ, औरौ शोड़े बै गौआ। इथलैई आमै जाणै पोऊँ कै दाऊद राजाए आपणै बारै मुंजी ना बौल़ै रैई थी।

³⁷ पौरौ यीशु जैसीखै पौरमेशवरे मौरेयौंदे मुंजीदा जियुंदी कौरा, सै शोड़ी ना।

³⁸ इथकारिए, ओए रै भाईयों; तुऐं जाणै पाव कै यीशु कै दवारा पापौ कै माफी का सुसमाचार तुऔं दैय राए।

³⁹ औरौ जिनु बातौ शै तुऐं मूसा कै कानून कै दवारा निर्दोष ना ठौहरै सौकौ, तिनु सौबी बातौ दा हरेक बिशवाश कौरणौवाल़ा यीशु कै दवारा निर्दोष ठौहरौ।”

⁴⁰ इथकारिए चौकश रौव ऐशै नी हौं, कै जू पौरमेशवर कै बातौ बौताणौवाल़ै कै किताबो दौ लैख राए, तुऔं पांदी बै आए जांव:

⁴¹ “ओए रै नेंदैया कौरणौवाल़ौ, दैखौ, औरौ हैरान हौं, औरौ मिट जाव; जिथुकै हांव तोंवारै दूसौ दा ऐक काम कौरु; ऐशणा काम, कै जै कुणिए तुऔं शै तैसखै चौर्चा कौरौ, तौ तुऐं कौलोंई बै बिशवाश ना कौरदै।”

अन्‍ताकिया शहर दै पौलुस औरौ बरनबास

⁴² जोबै पौलुस औरौ बरनबास सभा-घोरो शै निकल़दै लागै रौवै थिए, तौ लोग तिनु शै बिन्ती कौरदै लागै कै आगलै विशांव कै दूसै आमु ऐजी बातौ हौजौ शुणाया।

⁴³ औरौ जोबै सभा-घोरो शै सौबवे हौटै गौवै तौ यहूदी नेता औरौ यहूदी मत दै आएयौंदे भोक्‍तो मुंजीदै भौरिशै पौलुस औरौ बरनबास कै पौछौड़ियौ हौए गौवै; औरौ तिनुऐ तिनुआरी बातौ कौरेयौ सौमझाए, कै पौरमेशवर कै अनुग्रह दै बौणैयौंदे रौव।

⁴⁴ आगलै विशांव कै दूसै नगर कै जादातर सौबै लोग पौरमेशवर का वचन शुणणौ कारिए कौठै हौए गौवै।

⁴⁵ पौरौ यहूदी नेता भीड़ खै दैखैयो ज़लन लैई भोरै गौवै, औरौ नेंदैया कौरेयौ पौलुस कै बातौ कै खिलाफ दै बौलदै लागै।

⁴⁶ तोबै पौलुस औरौ बरनबासे निडर हौयौ बौल़ौ, “जौरुरी थियु, कै पौरमेशवर का वचन औगौड़ियौ तुऔं शुणाया जांदा; पौरौ जोबै तुऐं तैसी नकारै दिया, औरौ आपी खै सौदा कै जिन्दगी कै लायक ना ठोहरांव, तौ ऐबै, आमु बैगानै यहूदी कै धोरे जांदै।

⁴⁷ जिथुकै प्रभुए आमु ऐजै आज्ञा दैय राए, ‘मोऐं तुऔं बैगानै यहूदी कारिए पेयाशो ठोहराए राए, ताकि तुऐं दुनिया कै हर जौगैह लोगौ खै उध्दारकर्ता कै बारै मुंजी बौतांव।’ ”

⁴⁸ ऐजौ शोणेयो बैगानै यहूदी खुश हुवे, औरौ पौरमेशवर कै वचन कै बौड़ाए कौरदै लागै, औरौ जैतरै सौदा कै जिन्दगी कारिए ठैहराए राए, तिनुऐ बिशवाश कौरा।

⁴⁹ तोबै प्रभु का वचन तैसी सारै देशो दा फौयल़दा लागा।

⁵⁰ पौरौ यहूदी नेताए भोक्‍त औरौ पौरमेशवर का डौर मानणोवाल़ी बैटमाणिशौ खै औरौ नगर कै खास लोगौ कै उकसोऊवे, औरौ पौलुस औरौ बरनबास कै खिलाफ तरकीब बाणैयौ तिनु आपणै इलाके शै बायरै निकाल़ै दियै।

⁵¹ तोबै पौलुस औरौ बरनबास तिनकै सामणै आपणै लातो कै धूल झाड़ेयौ जिथका ऐजा मतलब औसौ कै पौरमेशवरे तिनु नकारै राए औरौ तिनु सौजा दैंदा औरौ सै इकुनियुम शहर कै हौटै गौवै।

⁵² औरौ चैलै अन्‍ताकिया शहर दै खुशी शै औरौ पवित्र आत्मा शै भोरदै रौवै।