2 थिस्सलुनीकियों 1 - सिरमौरी नौवाँ नियमजाणकारी 1 ऐजै चिट्ठी पौलुस, सीलास औरौ तीमुथियुस कै ढौबौशी औसौ। ऐजै चिट्ठी थिस्सलुनीका शहर कै कलीसिया खै लैखै राए, जू अमारै पिता पौरमेशवर औरौ प्रभु यीशु मसीह शै जोड़ेयौंदे औसौ। 2 आमै प्रार्थना कौरु कै अमारै पिता पौरमेशवर औरौ प्रभु यीशु मसीह कै ढौबौशा तुऔं पांदी अनुग्रह हौंव औरौ तुऔं शान्तै भैटौ। न्यांव को दूस 3 ओए रै बिशवाशी भाईयों, तोंवारै बारै मुंजी आमु कै लगातार पौरमेशवर का धन्यवाद कौरणा चैंई, ऐशै कौरणौ ठीक बै औसौ इथकारिए प्रभु यीशु मसीह पांदी तोंवारा बिशवाश बैजाए बौढ़दा जांव, औरौ तुऐं सौबै लगातार ऐकी दुजैआरी जादा शै जादा प्यार कौरौ। 4 इथकारिए आमै पौरमेशवर कै कलीसिया दै तोंवारै बारै मुंजी घमण्ड कौरु, भलैई, तुऐं परीक्षाओं शै हौयौ जांव, तोबै बै धीरज कै साथै सैहन कौरौ औरौ तुऐं ऐबै बै यीशु मसीह पांदी बिशवाश कौरौ। 5 औरौ पौरमेशवर ऐसी सताव का इस्तैमाल आपणै न्याय खै दिखाणौ कारिए औरौ तुऔं आपणै राज्य कै लायक बाणणौ कारिए कौरदा, जैसी कारिए तुऐं दुख बै उठाए राए। 6 जिथुकै पौरमेशवर सौदा धार्मिकता शै न्याय कौरदा, सै तिनु लोगौ पांदी दुख लांदा जिनुवै तुऔं कै दुख दैय राए। 7 सै तुऔं चैन दैंदा जिनुवै ऐबै दुख लौआ सैय, औरौ आमु कै बै। चैन दैंदा जोबै प्रभु यीशु आपणै शौकतीशाली स्वर्गदूतौ कै साथै स्वर्ग शै आन्दा लागै रौआ औरौ आग कै लोपटो शै घैरैयौंदा हौंदा। 8 जू पौरमेशवर खै ना पौछेयाणौ, औरौ जू अमारै प्रभु यीशु मसीह कै बारै मुंजी सुसमाचार कै स्वीकार ना कौरौ सै तिनुकै सौजा दैंदा। 9 सैजै लोग सौदा कारिए प्रभु शै जौई हौए जांदै औरौ तैसकै महिमामय शौकतै दै शामिल ना हौंदै। औरौ जू लोग तैसकै शौकतै कै तैज शै दूर हौए रौवै सै तिनु लोगौ खै सौदा कै विनाश कै दवारा सौजा दैंदा। 10 ऐजी बातौ तौलौ हौंदी जौल़ौ प्रभु यीशु मसीह तिनु पवित्र लोगौ कै दवारा महिमा पाणौ कारिए पाछु आन्दा जू तैसी पांदी बिशवाश कौरौ। औरौ हैरान हौयौ बिशवाशी लोग प्रभु कै दैखदै। औरौ तैसी दूसै तुऐं तिनु लोगौ मुंजी तैसकै महिमा कौरदै, जिथुकै तुऐं तैसी पांदी बिशवाश कौरे राए थिया। 11 आमै लगातार तुऔं कारिए प्रार्थना बै कौरु, ताकि पौरमेशवर तुऔं तैसी जीवन कै लायक बाणै दैंव जिथु जिणौ कारिए तैणै तुऔं बौएदै राए। औरौ पौरमेशवर तुऔं खै सौबै भोलाए कै काम कौरणौ कै इछा औरौ बिशवाश शै सौबी कामौ खै आपणै अनौखी शौकतै शै पूरु कौरौ। 12 आमै ऐजै प्रार्थना कौरु कै लोग तुंआरी बौजैह शै अमारै प्रभु यीशु मसीह कै नांव कै महिमा कौरौ औरौ तुऐं बै आदर पांदै जिथुकै तुऐं तैसकै औसौ। ऐजौ सौबै अमारै पौरमेशवर औरौ प्रभु यीशु मसीह कै अनुग्रह शै हौंदौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation