2 कुरिन्थियों 5 - सिरमौरी नौवाँ नियमअमारा स्वर्गीय घोर 1 जिथुकै आमुवा पौता औसौ, कै इथै धोरती पांदी अमारा शोरीर ऐक तोम्बू कै जैशणा औसौ, जिथमुंजी आमु रोऊं। जोबै आमै मौरुगै तौ आमु पौरमेशवर कै ढौबौशा स्वर्ग दा ऐक ऐशणा घोर भैटदा, जू आदमी कौ बाणैयोंदौ घोर ना आथी पौरौ ऐजा शोरीर स्वर्ग दा हमैशा तौड़ी बौणेयौंदा रौंदा। 2 इथमुंजी तौ आमै लैलयोऊं औरौ बौड़ी लालसा राखु; कै आमु ऐक ऐशणा शोरीर दैंव जू अमारै स्वर्गीय घौरौ कै जैशणा हौंदा। 3 कै जोबै आमु सैजा स्वर्गीय शोरीर भैटला, तौ आमै बिना शोरीर कै ना रौंदै। 4 औरौ आमै ऐसी शोरीर दै रौयौ जू तोम्बू कै जैशणै पौरैशानी कै बौझ कै धैनै दौबेयौ लेलयांदै रौंव; जिथुकै आमै इनु सांसारिक शोरीरो खै छोड़णा ना चोऊं, पौरौ आमै चोऊं कै पौरमेशवर आमु स्वर्गीय शोरीर दैंव, ताकि ऐजै शोरीर जू मौरे जांदै सै सौदा कै जिन्दगी लैई बौदलै जांदै। 5 पौरमेशवरे आमु नौवें शोरीर कारिए तैयार कौरे राए, तैणै आमु बयाने दै पवित्र आत्मा बै दैय राए। ऐजा बयाना सैजा वादा औसौ, जैसीखै पौरमेशवर बाद मै आमु कारिए पूरा बै कौरदा। 6 इथकारिए आमुए सौदा ही पौरमेशवर पांदी भोरोशा राखु। आमै ऐजौ जाणुए कै आमै जांव तौड़ी ऐसी शोरीरो दै औसौ, तांव तौड़ी आमु प्रभु शै दूर, प्रदेश दै रोऊं। 7 जोबै आमै इयौं दुनिया दै रोऊं, तौ आमै आपणै बिशवाश लैई प्रभु कै पाछैदै चालु, ना कै तैसी दैखैयो। 8 इथकारिए आमु निशोंक रोऊं, औरौ जोबै अमारै मौत हौंदै तौ प्रभु कै साथै रौणौ हौजौ बै बौढ़ेयौ सौमझदै। मसीह का न्याय आसन 9 इयौं बौजैह शै अमारै मन कै इछा ऐजै औसौ, कै चाहै आमै तैसकै साथै स्वर्ग दै रोऊं चाहै आमै इयौं धोरती पांदी रोऊं, पौरौ आमु प्रभु खै खुशी कौरदै रोऊं। 10 जिथुकै जौरुरी औसौ, कै आमु सौबी का मसीह कै दवारा न्याय हौंदा, कै हरेक आदमी आपणै-आपणै भले बुरै कामौ का जू तैणै शोरीरो कै दवारा कौरे राए, तिथका बौदला पांव। पौरमेशवर शै मैल-मिलाप कै सेवा 11 इथकारिए प्रभु का डौर मानैयौ आमु सौचाई पांदी बिशवाश कौरणौ कारिए बिन्ती कौरु औरौ पौरमेशवर जाणौए कै आमु सौथीखै का औसौ; औरौ मैरै आशा ऐजै औसौ, कै तुऐं आपणै दिल शै आमुखै सौथीखै जाणौ। 12 आमै तोबै बै आपणै तारीफ तोंवारै सामणै ना कौरु यानी आमै आपणै बारै मुंजी तुऔं गर्व कौरणौ का मौका दियु, कै तुऐं तिनुखै जोवाब दैय सौकौ, जू मन पांदी नी, यानी बायरी दिखावटी बातौ पांदी घमण्ड कौरौ। 13 जै कुणिए बौल़ौ कै आमै पागल औसौ, तौ पौरमेशवर कै खातिर औसौ, औरौ जै कोमल औसौ, तौ तोंवारै खातिर औसौ। 14 जिथुकै मसीह का प्यार आमुखै मोजबूर कौरे दैंव; इथकारिए कै आमु ऐजा पौता औसौ, कै ऐक आदमी सौबी लोगौ कै खातिर मौरे गौआ, इथकारिए सौबै लोग मौरे गौवै। 15 औरौ इथकारिए मसीह सौबी कै खातिर मौरा, कै जू जियुंदै औसौ, सै आगै शै आपी खै खुश कौरणौ कारिए ना जियौं पौरौ तिनुकै मसीह कारिए जीणु चैंई। मसीह तिनकै खातिर मौरा औरौ पिता पौरमेशवरे तैसीखै जियुंदी कौरा। मसीह दी नोऐं दुनिया 16 इथकारिए ऐबै आमुए आदमी कै नज़र शै कोसी का न्याय ना कौरु। हां ऐक सौमय थिया, जोबै आमुए मसीह खै आदमी कै नज़र शै दैखा, पौरौ ऐबै आमु ऐशै ना कौरु। 17 इथकारिए जै कुणिए मसीह दा बिशवाश कौरौ तौ तैणै मसीह दा नौवाँ स्वभाव पाए राए: पुराणा स्वभाव बीती गौआ; औरौ दैखौ, सैजौ सौबै नौंओ हौए गौ। 18 औरौ सौबै बातौ पौरमेशवर कै ढौबौशी औसौ, जैणै मसीह कै दवारा आमु आपणै धोरे पाछु लाए राए, औरौ तैणै आमु तैसकै औरौ ओकी कै बीच शान्तै कायम राखणौ का काम दैय राए। 19 यानी पौरमेशवरे सौबी लोगौ कै खातिर बाट बाणै लौए थै कै जू किछै मसीहे कौरे राए तैसकै दवारा शान्तै कायम कौरे सौकौ, औरौ लोगौ कै पापौ कै दोष तिनु पांदी ना लैई, औरौ पौरमेशवरे शान्तै कै बारै मुंजी तैसकै सौंदेश खै बांटणौ का काम आमु दैय राए। 20 इथकारिए आमु मसीह कै राजदूत औसौ; पौरमेशवर तैसकै सौंदेश खै अपनाणौ कारिए अमारै दवारा बिन्ती कौरौ: आमै मसीह कै ढौबौशी बिन्ती कौरु, कै पौरमेशवर कै साथै शान्तै कायम कौरे पांव। 21 मसीह जू पाप शै अणजाण थिया, पौरमेशवरे अमारै पापौ कारिए मसीह खै दोषी ठैहरोऊवा, ताकि आमै पौरमेशवर कै नज़र दै धरमी बौणै जोऊं जिथुकै मसीहे अमारै पापौ कै सौजा आपी पांदी लौए। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation