2 कुरिन्थियों 4 - सिरमौरी नौवाँ नियम

सुसमाचार कौ पेयाशो

¹ इथकारिए जोबै आमु पांदी ऐशणै दया हौए, कै पौरमेशवर कै सौंदेश कै प्रचार कौरणौ कै सेवकाई भैटी, तौ आमु हिम्मत ना छुडु़।

² पौरौ आमुए शर्मनाक औरौ गुप्‍त कामौ खै छोड़े राए, औरौ ना चलाकी शै चालाकी कौरो, औरौ ना पौरमेशवर कै वचन दै मिलावट कौरु, पौरौ आमु पौरमेशवर कै सामणै सिरफ साचौ शिखोऊं। पौरमेशवर कै सामणै हर आदमी गवाही दैय सौकौ कै ऐजौ साचौ औसौ।

³ चाहै लोग तैसी सुसमाचार खै ना सौमझै सौकौ जू आमु प्रचार कौरु, तौ ऐजौ नाश हौणौवाल़ौ ही कारिए तिनदु छिपैयौंदो औसौ।

⁴ ऐसी दुनिया कै ईशवर शैतानै तिनु अबिशवाशियौं कै बुध्‍दि खै बंद कौरे राए, इथकारिए सै मसीह कै औरौ तैसकै महिमा कै बारै मुंजी सौंदेश कै ना सौमझै सौकौ जू पौरमेशवर कै जैशणा औसौ।

⁵ जिथुकै आमै आपी खै नी, पौरौ मसीह यीशु का प्रचार कौरु, कै यीशु मसीह प्रभु औसौ औरौ तैसकै बारै मुंजी ऐजौई बौल़ौ, कै आमै यीशु की बौजैह शै तोंवारै सेवक औसौ।

⁶ इथकारिए कै पौरमेशवरे बौल़ौ, “इनारै मुंजीदौ पेयाशो चौमकौ,” औरौ पौरमेशवरे पेयाशै कै जैशणै अमारै मन दै सौमझ दै, ताकि आमु पौरमेशवर कै महिमा खै दैख सौकु जू यीशु मसीह दै प्रकट हौंव।

माटी कै बासणौ दौ धन

⁷ पौरौ ऐबै अमारै मन दै ऐजौ पेयाशो चौमकै रौ, पौरौ आमु आपी माटी कै तिनु नाजुक बासणौ कै जैशणै औसौ जिनुमुंजी ऐजा बौड़ा खजाना भोरै रौआ, कै ऐजै अनौखी शौकतै अमारी ढौबौशी नी, यानी पौरमेशवर ही कै ढौबौशी रौंव।

⁸ आमु सौबी पौरैशानी लैई घैरैयौंदे औसौ, पौरौ कौलोंई हार ना मानु। आमै पौरैशान तौ रोऊंए, पौरौ कौलोंई निराश ना होऊं।

⁹ आमै सताए तौ जोऊं; पौरौ छोड़े ना जोऊं, बैजाए दुख पांव, पौरौ नाश ना हौं।

^10-11 आमै सौदा तिनु चीज़ौ खै आपणै शोरीरो दै महसूस कौरु जू यीशुए महसूस कौरी जोबै सै मौरा, ताकि जू काम आमै आपणै शोरीर लैई कौरु तिथकै दवारा लोग यीशु कै जीवन कै दैख सौकौ। जिथुकै आमु जीतै ज़ी हमैशा यीशु की बौजैह शै मौत कै खतरै दै औसौ कै यीशु का जीवन अमारै नाश हौणौ वाल़ै शोरीरो दा प्रगट हौंव।

¹² तौ इथका मतलब ऐजा औसौ कै आमै लगातार मौत का सामणा कौरे लौआ पौरौ इथका नतीजा ऐजा औसौ कै तुऔं सौदा कै जिन्दगी भैटदै।

¹³ पौरौ आमै प्रचार कौरणा जारी राखा जिथुकै आमु दा ऐशणा बिशवाश औसौ जैशै पवित्र शास्त्र दो लैख राए, कै “मोऐं पौरमेशवर पांदी बिशवाश कौरा, इथकारिए मोऐं बौल़ौ।” ऐशैखैई आमै बै बिशवाश कौरु, इथकारिए बुलूए।

¹⁴ जिथुकै आमै जाणुए, जैणै प्रभु यीशु खै मौरेयौंदे मुंजीदा जियुंदी कौरा, पौरमेशवर आमु बै यीशु कै साथै रौणौ कारिए जियुंदी कौरदा औरौ तुऔं लोगौ कै साथै आमुखै बै आपणै पौरमेशवर कै सामणै खौड़ा कौरदा।

¹⁵ जिथुकै सौबै दुख जू आमुए सैहन कौरे तोंवारै खातिर औसौ, ताकि पौरमेशवर कै अनुग्रह कै दवारा जादा शै जादा लोगौ खै पौता चालै जांव कै पौरमेशवर कैतरा दयालु औसौ, औरौ पौरमेशवर कै महिमा कारिए धन्यवाद औरौ स्तुति कौरौ।

¹⁶ इथकारिए आमै हिम्मत ना छुडु़; जोबै कै अमारा शोरीर नाश बै हौंदा जांव, तोबै बै अमारै भीतरो का आत्मा हर रौज नौवाँ हौंदा जांव।

¹⁷ जिथुकै अमारै ऐसी सौमय कै पौरैशानी नानड़ी औसौ औरौ बैजाए लाम्बै सौमय तौड़ी ना रौंदी। जिथुकै इथका नतीजा सौदा कै महिमा हौंदी जू तिनु सौबी दी बैजाए जादा हौंदै जिथकै बारै मुंजी आमै सोंचै बै ना सौकु।

¹⁸ औरौ आमै तौ दैखैयोंदी चीज़ौ खै नी पौरौ अनदैखी चीज़ौ खै दैखदै रोऊं, जिथुकै दैखैयोंदी चीज़ौ दैणिक ही दूसौ की औसौ, पौरौ अनदैखी चीज़ौ सौदा बौणेयौंदी रौंव।