2 कुरिन्थियों 2 - सिरमौरी नौवाँ नियमआपणै प्यार का दावा कौरणा 1 मोऐं आपणै मन दौ ऐजौ ठाणै दियु थियु कै औटेयौ तोंवारै धोरे आयौ खै तुऔं दुख नै दियु। 2 जिथुकै जै हांव तुऔंखै उदास कौरु, तौ तोंवारै अलावा मुखै खुशी दैणौवाल़ा कुणिए ना बौचै रैई सिरफ तुऐं ही औसौ जिनु मोऐं दुखी कौरे राए। 3 औरौ मोऐं ऐजै बात तुऔं इथकारिए लिखै राए कै कोदी ऐशैखै ना हौंव कै मैरै आणौ शै, जिनुलेई मुखै आनन्द भैटणा चैंई, हांव तिनुदा उदास रौंव; जिथुकै मुखै तुऔं सौबी पांदी इयौं बातौ का भोरोशा औसौ, कै जू मैरा आनन्द औसौ, सैजाई तुऔं सौबी का बै औसौए। 4 बौड़ै कौल़ेशौ, औरौ मन कै कोष्ट लैई, मोऐं बैजाए आशु बौवाएयौ तुऔं चिट्ठी लैखै राए, इथकारिए नी, कै तुऐं उदास हौंव पौरौ इथकारिए कै तुऐं तैसी बौड़ै प्यार खै जाणै सौकौ, जू मुखै तुऔंआरी औसौ। पापी खै माफी 5 औरौ जै कुणिए आदमीए उदास कौरे राए, जैसी आदमीए इयौं पौरैशानी खै पोयदा कौरे राए तैणै मुं दै जादा चोट सौबी खै पोऊंचाए राए। सैजा सौथीखै बैजाए बुरा औसौ, आमु इनु बातो कै जादा बोढ़ावा ना दैणा चैंई। 6 ऐशणै आदमी कारिए ऐजै सौजा जू तुऔं मुंजीदै काफी बिशवाशीयै दैय राए, सैजै काफी औसौ। 7 इथकारिए इदु ऐजौ आछौ औसौ कै तैसका अपराध माफ कौरौ औरौ हौंसला दैंव, ऐशै ना हौंव कै ऐशणा आदमी आपणै बिशवाश कै पूरी तरह शै छोड़े दैंव। 8 इयौं बौजैह शै हांव तुऔं कैईंदी बिन्तै कौरु कै तैसीखै बौतांव कै तुऐं सौथीखै तैसीआरी प्यार कौरौ। 9 जिथुकै मोऐं इथकारिए बै लैख राए थियु कै तुऔं खै पोरखै पोऊँ, कै तुऐं मैरै नियमौ कै मानैया कौरदै, कै ना। 10 जैसकौ तुऐं किछै माफ कौरौ तैसी हांव बै माफ कौरु, जिथुकै जोबै मुखै माफ कौरणौ कै जौरुरत हौंव, तौ हांव तोंवारै फायदै कारिए मसीह कै औधिकार कै साथै ऐशै कौरु। 11 ताकि शैतान अमारै हालातो का फायदा नी उठाए सौकौ, जिथुकै आमै जाणुए कै सै हमैशा आमु पाप कौरणौ कारिए लुभाणो कै तरीको कै तरकीब बाणौ। मकिदुनिया शहर कै जाणौ 12 जोबै हांव मसीह का सुसमाचार शुणाणौ खै त्रोआस शहर दा ओऊवा, औरौ प्रभुए मुखै सुसमाचार प्रचार कौरणौ कै महान मौकै दियै। 13 बिशवाशी भाई तीतुस कि औरौ शै तोंवारै ढौबौशा कुणजाई समाचार ना पोऊंची, जिथुकै आमै इबी तौड़ी भैटी ना रोई, इथकारिए त्रोआस शहर कै बिशवाशियौं शै बिदा हौयौ हांव तीतुस कै जूणौ कारिए मकिदुनिया शहर खै हौटै गौआ। मसीही सेवक जीवन कै खुशबू 14 पौरमेशवर का धन्यवाद हौं, जू मसीह कै साथै अमारै सौमबंध कै बौजैह बौणौ, सै हमैशा अमारै साथै जांव औरौ आमु जीत दियांव। इथका मतलब औसौ कै आमु जिथै बै जोऊं, आमै सुसमाचार का ऐलान कौरु ताकि सौबै लोग पौरमेशवर कै जाणौ औरौ शुणौ। 15 जिथुकै आमै पौरमेशवर कारिए मसीह दवारा जोल़ाए गौए धूप कै जैशणै औसौ। अमारै दवारा प्रचार कौरेयौंदा सौंदेश सौबी लोगौ दै फौएलीयौंदे खुशबू कै जैशणा औसौ, जू उध्दार पाणौ वाल़ै औरौ जू नाश हौणौवाल़ै लोगौ कै बीच बिखरोए। 16 कैतरै कारिए तौ मौरणौ कै बौजैह शै मौत कै गन्ध, औरौ कैतरै कारिए जीवन कै बौजैह शै जीवन कै खुशबू, औरौ सौथीखै, कुणिए बै आपी शै ऐसी खुशबू खै फौयलाणौ कै लायक ना आथी। 17 जिथुकै आमै तिनु बौहितौ कै जैशणै नी, जू धन कारिए पौरमेशवर कै वचन का प्रचार कौरौ, पौरौ आमु पौरमेशवर कै वचन का प्रचार सौचाई औरौ मसीह कै औधिकार कै साथै कौरु, ऐजौ जाणदै बैई कै पौरमेशवरे आमु दैखै लौवै। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation