2 कुरिन्थियों 13 - सिरमौरी नौवाँ नियम

आखरी चैतावणी

^1-2 पवित्र शास्त्र दो ऐजौ लैखै राए, “कै हरेक झोगड़ा दु या तीन गवाह कै गवाही लैई सौलझै जाणा चैंई।” मोऐं आगै ही तिनु लोगौ खै चैतावणी दैय पाए जोबै हांव आगैई दूजी यात्रा कै सौमय तिथै थिया। ऐबै हांव औटेयौ तिनु औरौ ओकी सौबी खै इयौं चिट्ठी दी चैतावणी दियु, जैशैखै मोऐं आगै कौरे राए थियु। ऐबै हांव तिजाल़ियों तोंवारै धोरे आणौवाल़ा औसौ औरौ जै तिनुऐ इबी बै पाप कौरणै ना छुड़ी, तौ कुणिए बै सौजा शै ना बौचदै।

³ हांव ऐजौ बुलू जिथुकै तुऐं सबूत मांगै लौआ, कै मसीह मुं दा बौलांव, जोबै मसीह तुऔं सुधारौ, तौ सै तोंवारै खातिर कमजोर ना आथी, पौरौ तुऔं मुंजी शौकतीशाली औसौ।

⁴ सौथी कै सै कमजोरी कै हालत दा क्रूसो पांदी चौढ़ाया तौ गौआ, तोबै बै पौरमेशवर कै शौकतै शै जियुंदा औसौ, आमै बै तौ तैशणै ही कमजोर औसौ जैशै मसीह थिया; पौरौ पौरमेशवर कै अनौखी शौकतै लैई आमु तुऔंआरी बर्ताव कौरणौ कारिए तैसकै साथै जियुंदी रौंदै।

⁵ आपी खै पोरखौ, कै बिशवाश दै औसौए कै ना; आपी खै पोरखौ, ऐजौ दैखणौ कारिए कै तोंवारा बिशवाश साचा औसौए कै ना, का तुऐं आपणै बारै मुंजी ऐजौ ना जाणौ, कै यीशु मसीह तुऔं दा औसौए? नही तौ तुऐं बैकार निकल़ै रौवै।

⁶ पौरौ मैरी आशा औसौ, कै तुऐं जाणै पांदै, कै आमै बैकार ना निकल़ै रैई।

⁷ औरौ आमै आपणै पौरमेशवर कैईंदै प्रार्थना कौरु कै तुऐं कुणजै बुराए ना कौरौ; चाहै तोंवारै ऐजौ जाणियौ कै आमै साची चोणेयौंदे चैलै ना आथी, तौ बै आमु तुऔं कारिए प्रार्थना कौरु कै कुणजाई गौलत काम कौरे बिना, तुऐं सिरफ आछै ही काम कौरौ।

⁸ जिथुकै आमै सच कै खिलाफ किछै ना कौरे सौकौ, पौरौ सौचाई कारिए ही कौरे सौकु।

⁹ जोबै आमै कमजोर औसौ, औरौ तुऐं बिशवाश दै औसौ, तौ आमै खुशी रोऊं, औरौ ऐजी प्रार्थना बै कौरु, कै तुऐं बिशवाश दै मोजबूत हौए जांव।

¹⁰ इयौं बौजैह शै मोऐं तुऔं ऐजी बातौ लैख लोई, इदा आगै कै हांव तोंवारै धोरे ओऊं ताकि तुऔं सौजा दैयौ मुखै आपणै औधिकार खै दिखाणौ कै जौरुरत ना पौड़ौ जू प्रभुए मुखै दैय राए। जिथुकै हांव तोंवारै औधिकार का इस्तैमाल तोंवारै बिशवाश खै मोजबूत कौरणौ कारिए कौरणा चोऊं ना कै नाश कौरणौ कारिए।

शुभकामनाएँ औरौ आर्शीवाद

¹¹ इथकारिए ओए रै बिशवाशी भाईयों, खुशी रौंव; मोजबूत बौणदै जाव; मैरी सलाह कै शुणौ; ऐकैई मन राखौ; मैल-मिलाप शै रौव, औरौ प्यार औरौ शान्तै का दाता पौरमेशवर तोंवारै साथै हौंदा।

¹² मसीह प्यार शै ऐकी दूजै खै नमशकार कौरौ।

¹³ सौबै पवित्र लोग तुऔं खै नमशकार बौल़ौ।

¹⁴ प्रभु यीशु मसीह का अनुग्रह औरौ पौरमेशवर का प्यार औरौ पवित्र आत्मा का साथ तुऔं सौबी कै साथै हौंदा रौंव।