1 तीमुथियुस 2 - सिरमौरी नौवाँ नियमसौबी कारिए प्रार्थना 1 हांव बिन्ती कौरु कै, बिन्ती, प्रार्थना, निवेदन, औरौ धन्यवाद, सौबी आदमी कारिए कौरणै चैंई। 2 राजाओं कारिए औरौ तिनु सौबी लोगौ कारिए प्रार्थना कौरौ जू औधिकार दै औसौ ताकि सै आमु शान्तै औरौ सुरक्षा शै रौणौ दै मौदद कौरौ ताकि आमै पौरमेशवर कै आराधना कौरे सौकु औरौ ओकीआरी सौदा सोही बर्ताव राखु। 3 सौबी लोगौ कारिए ऐशैखै प्रार्थना कौरणी सोही औसौ, औरौ अमारा उध्दारकर्ता पौरमेशवर इयौं स्वीकार कौरौ। 4 सै चांव कै सौबै बौचै जांव औरौ सच कै ज्ञान खै जाणौ। 5 जिथुकै सिरफ ऐकैई पौरमेशवर औसौ, औरौ सिरफ ऐकैई आदमी औसौ जू पौरमेशवर औरौ लोगौ कै बीच मुंजी मैल मिलाप कौरवाए सौकौ यानी सै यीशु मसीह औसौ, जू ऐक आदमी कै रुप दा पौयदा हौआ। 6 मसीहे पाप औरौ मौत कै शौकतै शै सौबी लोगौ खै आज़ाद कौरणौ कारिए आपी खै बलिदान कौरा। तैसकै मौत कै दवारा, पौरमेशवरे सोही सौमय पांदी सबूत दिया कै सै सौबी लोगौ खै बौचाणा चांव। 7 इयौं बौजैह शै, पौरमेशवरे मुखै सुसमाचार का प्रचारक औरौ ऐक चोणेयौंदा चैला हौणौ कारिए चोणे राए। तैणै मुखै बैगानै जाति कै लोगौ कै बिशवाश का साचा सौंदेश शिखाणौ कारिए चोणे राए। मोऐं झूठु ना बौल़ै लैई; पौरौ मोऐं साचौ लो बौल़ै। कलीसिया दै बैटमाणिशौ औरौ मौरदो खै नियम 8 हांव चोऊं कै हर जौगैह सभाओ दै सैजै मर्द जू पवित्र जीवन जियौं, आपणै हाथौ खै टिपयौ, बिना खीजै औरौ बिना बैहस कै प्रार्थना कौरेया कौरौ। 9 ऐशैखैई, हांव चोऊं कै बैटमाणिशौ बै आपणै लुस्कै लैई आपणै शोरीर कै पूरै तौर तरीकै शै खौटयौ राखौ, बजाय ऐशणै लुस्कै बाम्बैयौ कि मर्द तिनकै ढौबौ बैहकै जांव। ना कै लुभावनै तरीको शै बाल बाणैयौ आपणी ढौबौ तिनका ध्यान बौटांव औरौ ना ही सूनु, मौतियो औरौ बौहितै मौंगै लुस्कै लैई बै तिनका ध्यान बौटांव, 10 इथकै बजाय, तिनु ओकी लोगौ कारिए भले काम कौरेयौ आपी कै सुन्दर बौणणौ चैंई। जिथुकै पौरमेशवर कै भोक्ती कौरणौवाल़ी बैटमाणिशौ कै ऐजौई कौरणौ ठीक औसौ। 11 जोबै मर्द लोग बिशवाशियौं खै शिखांव, तोबै सौबी बैटमाणिशौ कै चुपचाप औरौ बैजाए इज्जत कै साथै रौयौ, शुण्णु औरौ शिखणु चैंई। 12 हांव बुलूए, कै बैटमाणिशौ खै मौरदो कै शिक्षा दैणी या तिनु पांदी हुकम चलाणौ कै रजामंदी ना आथी। जोबै तुऐं आराधना कारिए कौठै हौंव तौ बैटमाणिशौ खै चुपी रौणौ चैंई। 13 मोऐं ऐशै इयौं बौजैह शै बौल़ै लो जिथुकै पौरमेशवरे आगै (मर्द) आदम कै औरौ बाद मै हावा (बैटमाणिश) कै बाणै। 14 औरौ तोबै, ऐजै बैटमाणिश थै जियौं खै सांपै धौखा दिया, ना कै आदम खै सांप कै दवारा। औरौ ऐशैखै हव्वाए पौरमेशवर कै आज्ञा तौड़ै। 15 पौरौ पौरमेशवर बैटमाणिशौ खै नानड़िया कै जन्म दैणौ कै दवारा बौचाए दैंदा, जै तियौं दा ऐक शुध्द मन औसौ औरौ सै मसीह दै आपणै बिशवाश दै डगमगाव ना, तियौं ओकीआरी बिना शर्त कै प्यार कौरणा जारी राखणा चैंई, औरौ ऐक बिना दोष का जीवन बाणैयौ राखणा चैंई। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation