1 कुरिन्थियों 6 - सिरमौरी नौवाँ नियमआपी मुंजीदा झोगड़े का निपटारा 1 जै तुऔं मुंजीदै कोसी ऐकी खै कोसी ओकी बिशवाशी कै खिलाफ मुकदमा हौंव, तौ तुऔं कोसी अदालत दो नी जाणौ चैंई। तुऔं खै आपणी कलीसिया दा मसीहियों शै आपणै मामलै का फोयसला कौरणौ कारिए बौलणौ चैंई कै तुऔं मुंजी कुण सोही औसौ। 2 निशोंक हौयौ तुऐं जाणौए कै भविष्य दै पौरमेशवर कै लोग इयौं दुनिया कै लोगौ का न्याय कौरदै। इथकारिए, तुऐं निशोंक हौयौ ऐजौ बौताणौ दै काबिल औसौ कै तुऔं मुंजीदै कुण तोंवारै नानड़ै शै नानड़ै झोगड़े दै सोही औसौ। 3 तुऔं पौता औसौए कै भविष्य दै आमै स्वर्गदूतौ का बै न्याय कौरदै, तौ निशोंक हौयौ आमु ऐसी जीवन कै साधारण बातौ का न्याय कौरे सौकु। 4 जै ऐशणै मामलै सामणै आंव, तौ तोंवारा न्याय तिनु लोगौ दवारा ना निपटाए जाणा चैंई जू बिशवाशी लोगौ दवारा आदर कै लायक ना सौमझै जांव। 5 ऐजौ बौलेयौ तुऔं खै बैज्जित कौरणा ही मैरा मकसद औसौ। का तोंवारै बीच मुंजी ऐशणा बुध्दिमान आदमी बै ना आथी, जू बिशवाशियौं कै झोगड़े सुलझाए सौकौ? 6 इथै तौ ऐकी बिशवाशीए ओकी खै अदालत दा खिंची लौआ सै बै बायरै वाल़ौ कै सामणै। 7 हकीकत ऐजै औसौ कै तोंवारै बीच मुकदमे औसौ इथका मतलब औसौ कै तुऐं मसीह कै जैशणा बिल्कुल बै बर्ताव ना कौरे लैई इथकै जौगैह तुऔं कै ऐजौ कौरणौ चैंई थियु कै ओकी कै बुराई कै सैहन कौरदै औरौ आपणा नुकसान हौणौ दैंदै। 8 इथकारिए, तुऐं गौलत कौरे लौ औरौ धौखा दैय लौआ, औरौ सैजौ बै आपणै साथी बिशवाशी कै साथै। 9 तुऐं जौरुर जाणौ, कै अन्यायी लोग पौरमेशवर कै राज्य कै वारिस ना हौंदै? कुणिए तुऔं धौखै लैई ऐजौ सुंचणौ पांदी मोजबूर नी कौरौ कै तुऐं बुरै कामौ खै कौरे सौकौ औरौ तोबै बै पौरमेशवर कै लोग औसौ। ना वेश्यगामी, ना मूर्तिपूजा कौरणौवाल़ै, ना सैजी बैटमाणिशौ जू आपी मुंजी नाजायज रिशतै राखौ, ना लुचै, ना सैजै मर्द जू आपी मुंजी नाजायज रिशतै राखौ। 10 ना चोर, ना लोभ कौरणौवाल़ै, ना पियक्कड़, ना गाल़ी दैणौवाल़ै, ना अन्धेर कौरणौवाल़ै पौरमेशवर कै राज्य कै वारिस ना हौंदै। 11 तुऔं मुंजीदै किछै लोग ऐशणै बै थिए पौरौ ऐबै प्रभु यीशु मसीह कै नांव लैई औरौ अमारै पौरमेशवर कै आत्मा लैई तोंवारै पापौ खै धोए राए, औरौ तुऔं पवित्र औरौ धरमी बाणै। शोरीर औरौ आत्मा लैई पौरमेशवर कै महिमा 12 तुऐं बौल़ै सौकौ कै मुखै सौबै चीज़ौ खै कौरणौ कै इजाज़त दैय राए जिथुकै हांव मसीह का औसौ पौरौ सौबै चीज़ौ लाभ कै नी आथी, मुखै सौबी चीज़ौ खै कौरणौ कै इजाज़त औसौ पौरौ हांव ना चोऊं कै किछै बै मुखै काबू कौरौ। 13 जैशै भोजन अमारै शोरीरो कारिए औरौ शोरीर भोजन कारिए औसौ, पौरौ पौरमेशवर इथुकै औरौ तिथुकै दुईनै खै नाश कौरदा, शोरीर गौलत सौमबंध राखणौ कारिए ना आथी, औरौ आमु आपणै शोरीर का इस्तैमाल तिनु कामौ कारिए कौरणा चैंई जू प्रभु चांव। अमारा शोरीर प्रभु का औसौ। 14 इथकै अलावा, अमारा शोरीर खास औसौ, जिथुकै जैशैखै पौरमेशवरे प्रभु यीशु खै मौरेयौंदे मुंजीदा जियुंदी कौरणौ कारिए आपणै अनौखी शौकतै का इस्तैमाल कौरा तैशैखैई सै आमु बै मौरेयौंदे मुंजीदा जियुंदी कौरदा। 15 तुऐं जौरुर जाणौ कै तोंवारा शोरीर मसीह कै अंग औसौ। का ऐकी आदमी खै आपणै शोरीरो कै जू मसीह का औसौ, औरौ इथुकै वेश्या कै दैणा चैंई? ना! कौलोंई बै नी! 16 तौ तुऔं पौता हौणा चैंई कै जू कुणिए बै वेश्या कै साथै सौमबंध राखौ, सै वेश्या कै साथै ऐक शोरीर बौणै जांव। जिथुकै पवित्र शास्त्र दु लैखै राए, “दुईनै ऐक शोरीर हौंदै।” 17 जू प्रभु दा बौणेयौंदा औसौ तैसकै आत्मा औरौ यीशु कै आत्मा ऐक साथै होए जांव। 18 गौलत सौमबंध कौलोंई नी राखैया कुणजाई ओका पाप सीधै तरीकै शै शोरीर खै नुकसान ना कौरौ। जैशै ऐजा पाप कौरौ। गौलत सौमबंध राखणौ वाल़ा आपणै ही शोरीर कै खिलाफ पाप कौरौ। 19 तुऐं जौरुर जाणौ कै तोंवारा शोरीर सैजा पवित्र मन्दिर औसौ, जिथै पवित्र आत्मा रौंव। औरौ पवित्र आत्मा जू तुऔं पौरमेशवर कै ढौबौशा भैटी रौआ, सैजा तुऔं दा बौसेयौंदा औसौ औरौ तुऐं आपणै ना आथी पौरौ पौरमेशवर कै औसौ। 20 पौरमेशवरे यीशु मसीह का जीवन दैयौ तुऔं छुटकारा दैय राए इथकारिए आपणै शोरीर कै दवारा पौरमेशवर कै महिमा कौरौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation