1 कुरिन्थियों 4 - सिरमौरी नौवाँ नियममसीह कै बिशवाश लायक भण्डारी 1 ठीक तौ ऐजौ हौन्दौ कै लोग आमु यीशु मसीह कै सेवक औरौ पौरमेशवर कै भण्डारी सौमझौ, जिनु सुसमाचार कै छिपैयौंदे सौचाई खै सौमझणौ का काम सौंपै राए। 2 जैसी भण्डारी का काम सौंपै राए, तैसीयादै ऐजै उमीद कौरे जांव कै सै बिशवाश लायक हौं। 3 मुखै इयौं बातौ लैई कुणजाई फर्क ना पौड़ौ कै हांव तोंवारै दवारा या कोसी आदमी कै औधिकार लैई जांचा जोऊं। 4 जिथुकै मैरा विवेक मुखै कोसी बातौ दा दोषी ना ठोहरांव, पौरौ इथलैई हांव बैकसूर ना ठौरु, जिथुकै मैरा पोरखणै वाल़ा प्रभु औसौ। 5 इथकारिए जांव तौड़ी प्रभु ना आंव, तांव तौड़ी कोसी का न्याय ना कौरौ: सै सीधै तरीकै शै तिनु सौबी विचारो खै बौतांदा जू लोगौ कै धोरे औसौ जिथकै बारै मुंजी ओका कुणिए ना जाणौ। सै तिनु मकसदो खै प्रकट कौरदा जू तिनकै दिलो दै औसौ। तोबै पौरमेशवर कै ढौबौशै हरेक आदमी कै तारीफ हौन्दै। मसीह कारिए मूर्ख 6 ओए रै बिशवाशी भाईयों, मोऐं आपणा औरौ अपुल्लोस का उदारण इथकारिए दिया, ताकि तुऐं आमु शै ऐजौ शिखौ कै पवित्र शास्त्र दो जू लैख राए, तिथदै आगै नी बौढ़ौ। ऐजौ आछौ ना आथी कै तुऐं ऐक अगुवे कै इज्जत कौरौ औरौ दूजै कै बैज्जती कौरौ। 7 कोसीए बै तुऔं खै ओकी कै तुलना दा बौड़ा दर्जा ना दैय रैई। तुऔं कैई जू बै वरदान औसौ, सैजै तुऔं पौरमेशवरे दैय राए। तुऔं घमण्ड कौरणौ का कुणजाई औधिकार ना आथी। 8 तुऐं सौमझौ कै तुऔं कैई आत्मिक रुप शै जौरुरत कि सौब चीज़ौ औसौ। तोंवारै जाणियौ कै तुऔं कैई आगै ही सौबै खास तागत औसौ जू पवित्र आत्मा लोगौ कै दैंव। तुऐं सुंचौए कै तुऐं अमारै बिना राजाओं कै जैशणै शासन कौरणा शुरु कौरे राए मुखै खुशी हौंदै जै तुऐं सौथीखै राजाओं कै जैशणै शासन कौरणा शुरु कौरे दैंदै ताकि आमु बै तोंवारै साथै शासन कौरे सौकु। 9 मैरै ऐशै जाणै रौ कै पौरमेशवरे आमु चोणेयौंदे चैलै खै विजय यात्रा दै मौत कै सौजा भैटैयौंदे कोयदी कै जैशणै सौबी दै आखरी ठाँव पांदी राखै राए। आमै सारै दुनिया कै लोगौ कै सामणै औरौ स्वर्ग कै स्वर्गदूतौ कै सामणै तमाशा बौणै गौवै। 10 लोग आमु मूर्ख मानौ जिथुकै आमु मसीह कै बारै मुंजी उपदैश दियु, पौरौ तुऐं गौलती शै सुंचौए कै तुऐं बैजाए बुध्दिमान मसीह औसौ। बैजाए लोग मानौए कै आमुकैंई औधिकार ना आथी। पौरौ तुऐं गर्व शै बौल़ौए कै तुऔं कैई पौरमेशवर कै शौकतै औसौ। लोग अमारा आदर ना कौरौ पौरौ सै तोंवारा आदर कौरौ। 11 ऐलो कै दूसौ तौड़ी भूखै-प्यासै औरौ पुराणै फाटेयौंदे लुस्कै दै औसौ, औरौ घूसै बै खोऊं आमुकैंई घोर बै ना आथी। 12 औरौ आपणै ही हाथौ कै काम कौरेयौ मैहनत कौरु। लोग आमु बुरु बौल़ौ, आमु तिनु आशीष दियु; सै सतांव औरौ आमु सैहन कौरु। 13 सै बदनाम कौरौ, आमु तिनुवारी नम्रता शै बात कौरु इथै तौड़ी कै ऐबै बै लोग अमारा आदर ना कौरौ; सै बौल़ौए कै अमारै कुणजै कीमत ना आथी। चैतावणी 14 हांव तुऔं बैज्जित कौरणौ कारिए ऐजी बातौ ना लिखु, पौरौ मैरा मकसद तुऔं आज्ञा कै मानणा शिखाणौ औसौ जिथुकै तुऐं मैरै नानड़िया कै जैशणै औसौ जिनु हांव सौथीखै प्यार कौरु। औरौ तुऔं कै चौकश कौरु। 15 भले ही तुऔं कैई पालन कौरणौ कारिए औरौ बाट दिखाणौ कारिए मसीह दै हज़ारो शिक्षक हौंव, तोबै बै हांव ही तोंवारै पिता कै जैशणा औसौ, जू तोंवारै खातिर सुसमाचार लायौ ओऊवा, जिथकै बौजैह शै तुऔं मसीह यीशु पांदी बिशवाश हौआ। 16 इथकारिए हांव तुऔं कैईंदै बिन्ती कौरु, कै तुऐं मुं जैशणा मसीह दा आपणा जीवन जियौ। 17 इथकारिए मोऐं तीमुथियुस खै जू प्रभु यीशु दा मैरा प्यारा औरौ बिशवाश लायक बैटा औसौ, तोंवारै धोरे भैजै राए, सै तुऔं याद दियांदा कै मसीह का चैला हौणौ कै नातै हांव कैशै काम कौरु औरौ कैशैखै जीवन जियुं जैशैकै हांव हर कलीसिया दी शिक्षा दियु। 18 तोंवारै बीच मुंजी किछै लोग सुंचौए कै हांव तुऔंआरी भैटिंदा ना ओऊवा, औरौ इथकारिए सै घमण्डी हौए गौवै। 19 पौरौ प्रभु चांव तौ हांव तोंवारै धोरे तावल़ा ही आन्दा, औरौ तोबै ना सिरफ इनु अभिमानियो कै शिक्षा, पौरौ तिनकै शौकतै खै बै जाणै पांदा। 20 जिथुकै पौरमेशवर का राज्य लोगौ कै जीवन दी तिनकी बातौ लैई नी बल्कि तिनकै कामौ लैई दैखिणा चैंई। 21 तुऐं का चांव कै जोबै हांव ओऊं, तौ का कौरु? जै तुऐं इबी बै आपणै बुरै तरीकै खै ना रौकै रैई, तौ हांव तुऔं बोड़ी फटकार लांदा। पौरौ जै तुऐं आपणै बुरै तरीको का पालन कौरणा बंद कौरे राए, तौ हांव तोंवारै प्रति सब्र औरौ प्यार शै काम कौरदा। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation