1 कुरिन्थियों 16 - सिरमौरी नौवाँ नियमयरूशलेम शहर कै कलीसिया कारिए दान 1 ऐबै यरूशलेम शहर दै पौरमेशवर कै लोगौ कारिए जू पौयसै तुऐं कौठै कौरेयौ, दैणै चांव तौ जैशै मोऐं गलातिया प्रदेश कै कलीसियाओं खै पौयसै कै बारै दै बौताए राए थियु तुऐं बै तैशैखैई कौरौ। 2 हर औयतवारे कै दूसै तुऔं मुंजीदै हरेक आपणै आमदणी कै हिसाब शै किछै आपी कैई राखैया कौरौ, कै मैरै आणौ पांदी चन्दा ना कौरणा पौड़ौ। 3 तोबै, जोबै हांव तिथै रौंदा तौ हांव तिनु लोगौ कै भैजदा, जिनु तुऐं भरोसेमंद आदमियों कै रुप दै चोणे राए थिए, कै सैजै पौयसै यरूशलेम शहर खै नियौ। हांव तिनकै साथै ऐक चिट्ठी बै भैजै दैंदा कै तिथै कै बिशवाशियौं शै तिनकै जाण पौछेयाण कौराए सौकु। 4 जै तोंवारै जाणियौ कै मैरौ जाणौ आछौ औसौ तौ सै मैरै साथै जांदै। पौलुस कै यात्रा का कार्यक्रम 5 औरौ हांव मकिदुनिया प्रदेश जाणौ कै बाद तोंवारै धोरे आन्दा, जिथुकै मैरै मकिदुनिया प्रदेश हौयौ जाणौ जौरुरी औसौ। 6 हौए सौकौ कै हांव तोंवारै साथै लाम्बै सौमय तौड़ी रोऊं या शायद पूरै जाड़ै कै मौसम दा, औरौ औटेयौ जिथै बै हांव जोऊं, तौ तुऐं मुखै मैरी यात्रा पांदी भैजै सौकौ। 7 जै ऐजै पौरमेशवर कै इछा हौंव तौ हांव एघोड़ी कै भैटिणौ कै बजाय बाद मै लाम्बै सौमय तौड़ी रौणौ कारिए आन्दा। 8 पौरौ हांव पिन्तेकुस्त कै त्यौहार तौड़ी इफिसुस शहर दा रौंदा। 9 जिथुकै इबी बै इथै बैजाए लोग औसौ जू पौरमेशवर का वचन शुणणा चांव, औरौ मैरौ इथै रौणौ बैजाए जौरुरी औसौ। हालांकि बौहितै लोग औसौ जू मैरा विरोध कौरौ। 10 जै तीमुथियुस तोंवारै धोरे कुरिन्थुस शहर दा आंव तौ तैसका आपी मुंजी स्वागत कौरेया, जिथुकै सै मैरै जैशणा प्रभु का काम कौरौ। 11 इथकारिए कुणिए बै तैसकी बैज्जती नी कौरेया, पौरौ शान्तै शै मैरै धोरे भैजी दैया; जिथुकै मोऐं तैसका इंतजार कौरे लौआ, कै सै बिशवाशियौं कै साथै आंव। 12 औरौ बिशवाशी भाई, अपुल्लोस कैईंदी मोऐं बिन्ती कौरे राए कै तोंवारै धोरे बिशवाशी भाईयों कै साथै जांव; पौरौ तैणै ऐसी सौमय जाणौ कै किछै बै इछा ना कौरी, पौरौ जोबै सोही सौमय हौला तोबै आए जाला। आखरी आदैश 13 चौकश रौया, लगातार बिशवाश दै बौणैयौंदे रौया, हिम्मत वाल़ै बौणौ, पौरमेशवर कै साथै आपणै रिशतै कै मोजबूत राखौ। 14 सौबै ठुँ प्यार शै कौरेया। 15 ओए रै बिशवाशी भाईयों, तुऐं स्तिफनास औरौ तैसकै परिवार कै जाणौए, कै सै अखाया प्रदेश कै आगलै आदमी थिए जिनुवै मसीह पांदी सौबिदा आगै बिशवाश कौरा औरौ संत लोगौ कै सेवा कै खातिर तैयार रौवै। 16 इथकारिए हांव तुऔं कैईंदी बिन्ती कौरु कै ऐशणै अगुवे कै आज्ञा का पालन कौरौ यानी सौबी कै जू कड़ी मैहनत कौरौ औरौ जू ऐशणी साची भोक्ती कै साथै सेवा कौरौ। 17 औरौ हांव स्तिफनास औरौ फूरतूनातुस औरौ अखइकुस कै आणौ शै खुशी औसौ, जिथुकै तिनुऐ सैजी मौदद कोरी लौए जू मौदद तुऐं दूर शै इबी ना कोरी सौकौ। 18 औरौ मैरै मन खै मोजबूत कौरे राए ठीक तैशैखैई जैशै सै तोंवारै खातिर बै कौरदै जोबै सै तोंवारै धोरे पाछु आन्दै। तुऔं तिनकै जैशणै लोगौ कै तारीफ कौरणै चैंई। सौबी बातौ का निचोड़ 19 एशिया प्रदेश कै कलीसियाओं कै बिशवाशियौं कै ढौबौशा तुऔं खै नमशकार; अक्विला औरौ तैसकै घोरवाल़ी प्रिस्का औरौ सैजी कलीसिया जू तिनकै घोरे भैटियो, तिनुकै बै प्रभु दा बौहुत-बौहुत नमशकार। 20 इथै कै सौबै बिशवाशी तुऔं खै नमशकार कौरौ। हाथ जौड़ेयौ ऐकी दूजै कै नमशकार कौरेया। 21 हांव पौलुस तुऔं खै आपणै हाथौ लैई नमशकार लिखु: जै कुणिए प्रभु आरी प्यार ना राखौ तौ सै शरापित औसौ। 22 ओए रै अमारै प्रभु, आए जा! 23 हांव प्रार्थना कौरु कै प्रभु यीशु का अनुग्रह तुऔं पांदी हौंदा रौंव। 24 तुऔं सौबी खै मैरा प्यार जू मसीह यीशु कै साथै एकजुट रौंव। आमीन। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation