Zabura 76 - Sabon Rai Don Kowa 2020

Zabura 76

Don mai bi da kaɗe-kaɗe. Tare da kayan kiɗi masu tsirkiya. Zabura ta Asaf. Waƙa ce.

¹ A cikin Yahuda an san Allah; sunansa da girma yake a cikin Isra’ila.

² Tentinsa yana a Salem mazauninsa yana a Sihiyona.

³ A can ya kakkarya kibiyoyin wuta, garkuwoyi da takuban, makaman yaƙi. Sela

⁴ Darajarka tana da haske, fiye da darajar tuddai waɗanda suke cike da namun jeji masu yawa.

⁵ Jarumawa sun zube kamar ganima sun yi barcinsu na ƙarshe; ba ko jarumi guda da zai iya ɗaga hannuwansa.

⁶ A tsawatawarka, ya Allah na Yaƙub, doki da keken yaƙi suka kwanta ba motsi.

⁷ Kai kaɗai ne za a ji tsoro. Wane ne zai iya tsayawa sa’ad da ka yi fushi?

⁸ Daga sama ka yi shelar hukunci, ƙasa kuwa ta ji tsoro ta kuwa yi tsit,

⁹ sa’ad da kai, ya Allah, ka tashi don ka yi shari’a, don ka cece dukan masu shan wahala a ƙasar. Sela

¹⁰ Tabbatacce fushinka a kan mutane kan jawo maka yabo, waɗanda suka tsira daga fushinka za su zama kamar rawaninka.

¹¹ Ku yi alkawari wa Ubangiji Allahnku ku kuma cika su; bari dukan ƙasashen maƙwabta su kawo kyautai ga Wannan da za a ji tsoro.

¹² Ya kakkarya ƙarfin masu mulki; sarakunan duniya suna tsoronsa.