Zabura 65 - Sabon Rai Don Kowa 2020

Zabura 65

Don mai bi da kaɗe-kaɗe. Zabura ta Dawuda. Wata waƙa.

¹ Yabo ya dace da kai, ya Allah, a Sihiyona; a gare ka za mu cika alkawuranmu

² Ya kai wanda yake jin addu’a a gare ka dukan mutane za su zo.

³ Sa’ad da zunubai suka sha ƙarfinmu, ka gafarta laifofinmu.

⁴ Masu albarka ne waɗanda ka zaɓa ka kawo kusa don su zauna a filayenka! Mun cika da abubuwa masu kyau na gidanka, na haikalinka mai tsarki.

⁵ Ka amsa mana da ayyuka masu banmamaki na adalci, Ya Allah Mai Cetonmu, begen dukan iyakar duniya da kuma na tekuna masu nesa,

⁶ wanda ya yi duwatsu ta wurin ikonka, bayan ka kintsa kanka da ƙarfi,

⁷ wanda ya kwantar da rurin tekuna, rurin raƙumansu, da kuma tumbatsar al’ummai.

⁸ Waɗanda suke zama can da nesa sukan ji tsoron manyan ayyukanka; inda safe ke haskaka yamma kuma ta shuɗe kakan sa a yi waƙoƙin farin ciki.

⁹ Kana kula da ƙasa kana kuma yi mata banruwa; kana azurta ta a yalwace. Rafuffukan Allah sun cika da ruwa don su ba mutane hatsi, don haka ne ka ƙaddara.

¹⁰ Ka kwarara ta da ruwa ka kuma baje kunyoyinta; ka sa ta yi laushi da yayyafi ka kuma albarkaci tsire-tsirenta.

¹¹ Saboda alherinka, ya Allah, an sami kaka mai albarka, amalankenka kuwa sun cika har suna zuba.

¹² Makiyayan hamada sun cika har suna zuba; tuddai sun rufu da murna.

¹³ Wurin dausayin kiwo sun rufu da garkuna kwari kuma sun cika da hatsi; suna sowa don farin ciki.