Zabura 30 - Sabon Rai Don Kowa 2020

Zabura 30

Zabura ce. Wata waƙa. Don keɓewar haikali. Ta Dawuda.

¹ Zan girmama ka Ya Ubangiji, gama ka tsamo ni daga zurfafa ba ka bar abokan gābana sun yi farin ciki a kaina ba.

² Ya Ubangiji Allahna, na yi kira gare ka don taimako ka kuwa warkar da ni.

³ Ya Ubangiji, ka dawo da ni daga kabari; ka kiyaye ni daga gangarawa zuwa cikin rami.

⁴ Ku rera ga Ubangiji, ku tsarkakansa; ku yabi sunansa mai tsarki.

⁵ Gama fushinsa na ɗan lokaci ne amma alherinsa har matuƙa ne; mai yiwuwa a yi kuka da dare amma farin ciki kan zo da safe.

⁶ Sa’ad da nake lafiya, na ce, “Ba zan jijjigu ba.”

⁷ Ya Ubangiji, sa’ad da ka yi mini alheri, ka sa katangar dutsena ya tsaya daram; amma sa’ad da ka ɓoye fuskarka, sai in cika da tsoro.

⁸ A gare ka, ya Ubangiji, na yi kira; a gare ka Ubangiji na yi kukan neman jinƙai.

⁹ “Wace riba ce a hallakata, a kuma gangarawa ta zuwa cikin rami? Ƙura za tă yabe ka ne? Za tă iya yin shelar amincinka?

¹⁰ Ka ji, ya Ubangiji, ka kuwa yi mini jinƙai; Ya Ubangiji, ka zama taimakona.”

¹¹ Ka mai da kukata ta zama rawa; ka tuɓe rigar makokina ka sa mini na farin ciki,

¹² don zuciyata za tă iya rera gare ka ba kuwa za tă yi shiru ba. Ya Ubangiji Allahna, zan yi maka godiya har abada.