Zabura 123 - Sabon Rai Don Kowa 2020

Zabura 123

Waƙar haurawa.

¹ Na tā da idanuna gare ka, gare ka da kursiyinka yake cikin sama.

² Kamar yadda idanun bayi suna duban hannun maigidansu, kamar yadda idanun baiwa suna duban hannun uwargijiyarta, haka idanunmu suna duban Ubangiji Allahnmu, sai ya nuna mana jinƙansa.

³ Ka yi mana jinƙai, ya Ubangiji, ka yi mana jinƙai, gama mun jimre da reni mai yawa.

⁴ Mun jimre da wulaƙanci daga masu girman kai, reni mai yawa daga masu fariya.