Karin Magana 23 - Sabon Rai Don Kowa 2020

Faɗi 7

¹ Sa’ad da ka zauna domin cin abinci da mai mulki, ka lura sosai da abin da yake gabanka,

² ka kuma sa wuƙa a maƙogwaronka in kai mai ci da yawa ne.

³ Kada ka yi marmarin abincinsa mai daɗi gama wannan abinci ruɗu ne.

Faɗi 8

⁴ Kada ka gajiyar da kanka don ka yi arziki; ka kasance da hikimar dainawa.

⁵ Da ƙyiftawar ido a kan wadata ta ɓace, gama tabbatacce sukan yi fikafikai sukan tashi sama kamar gaggafa.

Faɗi 9

⁶ Kada ka ci abincin mai rowa, kada ka yi marmarin abincinsa mai daɗi;

⁷ gama shi wani irin mutum ne wanda kullum yana tunani game da tsadar abincin. Zai ce maka, “Ci ka sha,” amma zuciyarsa ba ta tare da kai.

⁸ Za ka yi amai ɗan abin da ka ci dukan daɗin bakinka kuwa zai tafi a banza.

Faɗi 10

⁹ Kada ka yi magana da wawa, gama zai yi wa maganar hikimarka ba’a.

Faɗi 11

¹⁰ Kada ka kawar da shaidar iyaka ta dā ko ka ɗiba gonar marayu,

¹¹ gama mai Kāriyarsu yana da ƙarfi; zai kuwa yi magana dominsu.

Faɗi 12

¹² Ka mai da hankali ga umarni ka kuma kasa kunne ga kalmomin sani.

Faɗi 13

¹³ Kada ka bar yaro ba horo; in ka yi masa horo da sanda, ba zai mutu ba.

¹⁴ Ka hukunta shi da sanda ka ceci ransa daga mutuwa.

Faɗi 14

¹⁵ Ɗana, in zuciyarka mai hikima ce, to, zuciyata za tă yi murna;

¹⁶ cikin cikina zai yi farin ciki in leɓunanka suna maganar abin da yake daidai.

Faɗi 15

¹⁷ Kada ka bar zuciyarka tă yi ƙyashin masu zunubi, amma kullum tsoron Ubangiji za ka yi kishi.

¹⁸ Tabbatacce akwai sa zuciya ta nan gaba dominka, kuma sa zuciyarka ba za tă zama a banza ba.

Faɗi 16

¹⁹ Ka saurara, ɗana, ka zama mai hikima, ka kafa zuciyarka a hanyar da take daidai.

²⁰ Kada ka haɗa kai da waɗanda suke shan ruwan inabi da yawa ko masu haɗama kansu da abinci,

²¹ gama bugaggu da ruwan inabi da masu yawan ci sukan zama matalauta, gama jiri yakan yi musu sutura da tsummoki.

Faɗi 17

²² Ka kasa kunne ga mahaifinka, wanda ya ba ka rai, kada kuwa ka rena mahaifiyarka sa’ad da ta tsufa.

²³ Ka saye gaskiya kada kuwa ka sayar da ita; ka nemi hikima, horo da fahimi.

²⁴ Mahaifin adali yana da farin ciki sosai; duk wanda yake da ɗa mai hikima yakan ji daɗinsa.

²⁵ Bari mahaifinka da mahaifiyarka su yi murna; bari wadda ta haife ka tă yi farin ciki!

Faɗi 18

²⁶ Ɗana, ka ba ni zuciyarka bari kuma idanunka su kiyaye hanyoyina,

²⁷ gama karuwa rami ne mai zurfi mace marar aminci matsattsiyar rijiya ce.

²⁸ Kamar ’yan fashi, takan kwanta tana jira tana kuma ninka rashin aminci a cikin maza.

Faɗi 19

²⁹ Wa yake wayyo? Wa yake baƙin ciki? Wa yake neman fada? Wa yake gunaguni? Wa yake da raunuka ba dalili? Wa yake da jan idanu?

³⁰ Waɗanda suke daɗe suna shan ruwan inabi, waɗanda suke neman ƙoƙon damammen ruwan inabi.

³¹ Kada ka ƙyifce ido a ruwan inabi sa’ad da ya yi ja, sa’ad da yana da kyan gani a cikin ƙwarya, sa’ad da yana gangarawa sumul a maƙogwaro!

³² A ƙarshe yana sara kamar maciji da kuma dafi kamar gamsheƙa.

³³ Idanunka za su riƙa gane-gane, zuciyarka kuma za su riƙa tunani abubuwa masu rikitarwa.

³⁴ Za ka zama kamar wanda yake barci a tsakiyar tekuna, kwance a sama itacen jirgin ruwa.

³⁵ Za ka ce “Sun buge ni, amma ban ji ciwo ba! Sun daddoke ni, amma ba na jin zafinsa! Yaushe zan farka don in ƙara shan wani?”