रोमियों 16 - Sirmouri

आप्णी ढबे शा धन्यबाद

¹ हाँव तुँओं शी आप्णी बऐणी फीबे खे, जू अमाँरी बईण अरह् किंख्रिया की कलीसिया की सेविका असो, तियों खे हाँव तुँओं शी डालो करू

² के जेष्णाँ पबित्र लोगो का स्वागत् हुवा चेंई, तेष्णा ही तियाँरा भे प्रभू दा स्वागत् करह्, तैष्णी ही माँनों; अरह् जियों कोसी बातो दी तियाँरे तुँवारी जरूरत असो, तियाँरी साऐता-मंद्द करह्, किन्देंखे के से भे भहिते की मतल्व मेरी भी मदत्तगार कर्णो वाल़ी असो।

³ बंईण प्रिस्का अरह् तियारा घरवाल़ा भाऐ अक्विला खे जू मसीया यीशू दे मेरे साजी असो, तिन्खे नमंष्कार।

⁴ तिन्ऐ मेरे प्राँण खे आप्णी ही जियाँन खतरे दी पाँऐ दिती; अरह् सिर्फ हाँव ही ने, परह् गऐर यहूदी की बादी कलीसिया भे तिनका धन्यबाद करह्।

⁵ तियों कलीसिया खे भे नमंष्कार, जू तिनके घर दी असो। मेरे प्यारे इपैनितुस खे, जू मसीया खे आसिया का आगला फल़ असो, नमंष्कार।

⁶ मरियम खे, जिऐं तुँओं खे बैजाऐ मेंह्न्त करी, नमंष्कार।

⁷ अन्द्रुनीकुस अरह् यूनियास खे जू मेरे कुड़्बे के असो, अरह् मेरी गईलो कय्द हुऐ थिऐ, अरह् प्रभू यीशू के खास-चेलै मुझी माँने-गीणें असो, अरह् मुँह शे आगे मसीही बंणें थिऐ, नमंष्कार।

⁸ अम्पलियातुस खे, जुण्जा प्रभू दा मेरे प्यारा असो, नमंष्कार।

⁹ उरबानुस खे, जू मसीया दा अमाँरा साजी असो, अरह् मेरा प्यारा इस्तखुस खे नमंष्कार।

¹⁰ अरिस्तुबुलुस खे, जू मसीया दा साच्चा-पाका नींक्ल़ा, नमंष्कार। अरिस्तुबुलुस के घराने खे नमंष्कार।

¹¹ मेरे कुड़्बे के हेरोदियोन खे, नमंष्कार। नरकिस्सुस के घराने के जू लोग प्रभू दे असो, तिनखे नमंष्कार।

¹² त्रूफेना अरह् त्रूफोसा खे जू प्रभू दी मेह्न्त कर्दी रंह्, नमंष्कार। प्यारे पिरसिस खे, जेने प्रभू दी बैजाऐ मेह्न्त करी, नमंष्कार।

¹³ रूफुस खे, जू प्रभू दा चूणाँ-छाँटा अंदा असो, अरह् तेस्की माँ खे, जू मेरी भे माँ असो, दुई खे नमंष्कार।

¹⁴ असुंक्रितुस अरह् फिलगोन अरह् हिर्मेंस अरह् पत्रुबास अरह् हिर्मास अरह् तिनकी गईलो के भाऐ बंईणों खे नमंष्कार।

¹⁵ फिलुलुगुस अरह् यूलिया अरह् नेर्युस अरह् तिनकी बऐणें, अरह् उलुम्पास अरह् तिनकी गईलो के बादे पबित्र लोगो खे, नमंष्कार।

¹⁶ आपु मुँझी पबित्र खुप्टी देऐयों नमंष्कार करह्। तुँओं खे मसीया की बादी कलीसिया की ढबे शी नमंष्कार।

आखरी अज्ञाँ

¹⁷ ऐबे हे भाऐ बंईणों, हाँव तुँओं खे ढाल-अरज करू के जू लोग तियों शिक्क्षा के बिरूध असो, जुण्जी तुँओं भेटी रंई, फूट पाँणों खे अरह् ढैस-ठूकर का कारण बंणों, तिनू ताड़ी पाव, अरह् तिन्शे दुर्के रूऐ।

¹⁸ किन्देंखे के ऐष्णे लोग अमाँरे प्रभू मसीया के ने, परह् आप्णे पेटो के सेवा करह्; अरह् लट-पटी बातो लई सिधे-साधे मंन के लोग बह्काऐ दियों।

¹⁹ तुवाँरे अज्ञाँ माँन्णों की चर्चा बादे लोगो मुझी फऐली रंऐ, ईन्देंखे हाँव तुँआरे बारे दा आँनन्द करू परह् हाँव ऐशो चहाँऊ, के तुँऐं भलाई खे बुद्धी-मान, परह् बुराई खे भोल़े बंणे अंदें रूऐ।

²⁰ शाँण्त्ति का पंणमिश्वर शैतान तुँवारी लातो थाँई शिघा घिंज्णों खे पाँदा। अमाँरे प्रभू यीशू मसीया की कृपा तुँओं गाशी हंदी रंह्।

²¹ मेरा साजी तीमुथियुस का, अरह् मेरे कुड़्बे के लूकियुस अरह् यासोन अरह् सोसिपत्रुस का तुँओं खे नमंष्कार।

²² मुखे पत्री के लिखणों वाल़े तिरतियुस का, प्रभू दा तुँओं खे, नमंष्कार।

²³ गयुस जू मेरी अरह् कलीसिया का पाऊँणाई कर्णो वाल़ा असो, तेस्का तुँओं खे नमंष्कार। इरास्तुस जू नगर का भडारी असो, अरह् भाऐ क्वारतुस का तुँओं खे नमंष्कार।

²⁴ हमारे प्रभू यीशू मसीया की कृपा तुँओं सोभी आरी हों (आमीन)

²⁵ ऐबे जू तुँओं मेरी खुषख्बरी मतल्व प्रभू यीशू मसीया के शिक्क्षा के प्रचार के मुँताबिक शे पाक्के करी सको, तेसी भेद् के प्रकाष के मुँताबिक जू ज़ूगौ शा चुप्पी रूआ,

²⁶ परह् ऐबे पर्गट हऐयों ज़ूगौ के पंणमिश्वर की अज्ञाँ शे जू ऋषियों की कताबे के जाँणें सोभी जात्तियों खे बुली गई, के से बिश्वाष शे अज्ञाँ माँनणों वाल़े हऐ ज़ाँव,

²⁷ तेसी ही सिर्फ ऐक बुद्धीमाँन पंणमिश्वर की यीशू मसीया के जाँणें; ज़ूगौ-ज़ूगौ तोड़ी बड़ियाऐं हंदी रंह्। आमीन।