प्रकाशितवाक्य 8 - Sirmouri

सात्तवीं सिल सात्तवीं मुँहर अरह् सुन्नें को धनीयारो

¹ जबे छ़ैल़्टे ऐ सात्तवीं सिल खुली, तअ स्वर्गो दो आधे घाण्टे तोड़ी शंणप्ट हुओं।

² तबे मुँऐ तिनू सात्ते स्वर्गदूत्त देखे, जू पंण्मिश्वर के सहाँम्णें खह्ड़े रंह्, अरह् तिनखे सेजी सात्त रंणशिंगें-कनाँल़ी देई गई।

³ तबे ऐक ओका स्वर्गदूत्त सुन्नें को धनीयारे लऐयों आया, अरह् बैदी पूजों कैई खह्ड़ा हुवा; अरह् बैदी पूजों कैई बैजाऐ धूप दिया गुवा, के सब पबित्र लोगो की प्रार्थनाओं आरी सुन्नें की तियों बैदी पूजों गाशी, जू सिंगाँस्ण के सहाँम्णें असो, तिन्खे चढ़ाव।

⁴ तेसी धूप का धूवाँ पबित्र लोगो की प्रार्थनाओं आरी स्वर्गदूत्त के हाथै पंण्मिश्वर के सहाँम्णें पंऊँऐचीं गुवा।

⁵ तबे स्वर्गदूत्त ऐ धनियाँरो लऐयों तिन्दी बैदी पूजों की आग भरी अरह् धर्ती गाशी पाऐ दिती; अरह् गर्जन-गूँह्ज अरह् बिजल़ाव अरह् भूईचल़ों हंदे लागे।

सात्त रंणशिंगें-कनाँल़ी

⁶ तबे सेजे सात्त स्वर्गदूत्त जिन कैई सात्त रंणशिंगें-कनाँल़ी थी, तिनू बजाँदे तैयार हुऐ।

⁷ आगले स्वर्गदूत्ते रंणशिंगें-कनाँल़ी फूकरी, अरह् लह्ऊँ वाल़े शोरू अरह् आग पय्दा हऐ, अरह् धर्ती गाशी पाऐ दिती, अरह् धर्ती का च़ीज़ा हिस्सा जल़ी गुवा, अरह् डाल़ भे च़ीज़ा हिस्सा जल़ी गुऐ, अरह् बादो होरो घास भे जल़ी गुवो।

⁸ दुज़े स्वर्गदूत्ते रंणशिंगें-कनाँल़ी फूकरी, तबे ऐशो जाँणों के आगी लई भभ्का अंदा टिम्बा संमुन्द्रो दा पाया; अरह् संमुन्द्रो का ऐक च़ीज़ा हिस्सा लह्ऊँ बंणों,

⁹ अरह् सुमद्रो का ऐक च़ीज़ा हिस्सा जींव मँरी गुऐ, अरह् ऐक च़ीज़ा हिस्सा जहाँज नष्ट हऐ गुऐ।

¹⁰ च़ीज़े स्वर्गदूत्ते रंणशिंगें-कनाँल़ी फूकरी, अरह् ऐक बड़ा तारा जू डाव जेष्णाँ बल़ों थिया, से स्वर्गो शा च़ूटा, अरह् नंदियों के ऐकी च़ीज़े हिस्से पाँणी के फट्वाँणी गाशी पड़ा,

¹¹ तेसी तारे को नाँव नाँगदौना असो; अरह् च़ीज़ा हिस्सा पाँणी नाँगदौना जेष्णों कड़ूवो बंणों, अरह् बैजाऐ आदमी तैथू कड़ूवें पाँणी लई मँरी गुऐ।

¹² चौऊथे स्वर्गदूत्ते रंणशिंगें-कनाँल़ी फूकरी, अरह् सुर्जो का ऐक च़ीज़ा हिस्सा, अरह् चाँद के च़ीज़े हिस्से दो, अरह् तारे का भे ऐक च़ीज़ा हिस्से दी तैष्णी ही कठ्णाँई आई, ऐथै तोड़ी के तिनके ऐक च़ीज़े हिस्से दो ईनाँरो पड़ो, अरह् देसो के ऐक च़ीज़े हिस्से दो, पियाँषों ने रंही, अरह् तैष्णों ही रात्ती खे भे हुवो।

¹³ जबे मुँऐ हजो देखो, तअ अस्माँनों के बीच दा, ऐक बाज ऊड़ादे अरह् जुराल़ो ऐजो बुल्दे शुंणों, के “सेजे च़ीन स्वर्गदूत्त जिनको फुकर्णो हेभी हजो असो, धर्ती के रंहणों वाल़े गाशी हाऐ! हाऐ! हाऐ!”