प्रकाशितवाक्य 5 - Sirmouri

सिल बंद कताबे अरह् छ़ैल़्टा

¹ जुण्जा सिंगाँस्हणों गाशी बऐठी रूवा थिया, मुँऐ तेस्के सुँऐं हाथो दी ऐक कताब देखी, जू भीत्री अरह् बाऐरी लिखी अंदी थी, अरह् सात्त सिलो लाऐयों तिनू बंद करी थई थी।

² तबे मुँऐ ऐक बलवान स्वर्गदूत्त भे देखा, जेने जूराल़ा ऐजा प्रचार करी लुवा थिया, के “ईयों कताबे खुल्णों वाल़ा; अरह् ईन्दें की सिलो च़ूड़्णों ज़ूगा कुँण असो?”

³ परह् ना स्वर्गो दा अरह् ना धर्ती गाशी, अरह् ना कुँऐं धर्ती शा ऊदा पताल़ो दा, कुऐं भे ईयों कताबे खुल्णों ज़ूगा, अरह् ना ईयों कताबे दी नंजर-झ़ैठ पाँणों ज़ूगा निक्ल़ी।

⁴ तबे हाँव सिंण्की-सिंण्कियों रूदा लागा, किन्देंखे के तियों कताब खुल्णों वाल़ा, अरह् तिन्दी नंजर-झ़ैठ पाँणों ज़ूगा कुँऐं ने भेटी।

⁵ ईन्दें गाशी ईनू अगुऐ मुँझ्शो ऐकी ऐ मुँखे बुलो, “रूऐ ने; देख्ह, यहूदा के बंष-गड़ी का सेजा शेर जू दाऊद को मुँल़ाऊँण असो, तियों कताबे खुल़्णी अरह् तिन्दें की सिलो च़ूड़्णों ज़ूगा सेजा ही जींत्ती रूवा।”

⁶ तबे मुँऐ तेसी सिंगाँस्ण अरह् चारों जींव अरह् तिनू अगुऐ के बीचो दा, जेष्णाँ ऐक काटा अंदा छ़ैल़्टा खड़ा देखा। तेस्के सात्त शिंगों अरह् सात्त आखी थी; ऐजी पंण्मिश्वर की सात्ते आत्त्मा असो, जुण्जी संईसारी की बादी धर्ती गाशी डियाल़ी गई थी।

⁷ तेने आऐयों तेस्के सुँऐं हाथो शी जू सिंगाँस्हणों गाशी बऐठी रूआ थिया, सेजी कताब ऊँडी करी।

⁸ जबे तेने सेजी कताब ऊँडी करी पाऐ, तअ सेजे चारे जींव अरह् च़ौबीष के च़ौबीष अगुऐ तेसी छ़ैल़्टे के सहाँम्णें लाँम्बे पसरे। तिनके ऐकी नाँव के हाथों दी रंणशिंगे-कनाँल़ी थी, अरह् धूप, जू पबित्र लोगों की प्रार्थना ऐ असो; से भरे अंदे सुन्नें के बैलुऐ थिऐ।

⁹ से ऐजो नुंवों गीत्त गाँदे लागे: “तू ईयों कताबे कर्णो खे, अरह् ईन्देकी सिलो खुल्णों ज़ूगा असो, किन्देंखे के तुँऐं कुरबाँण हऐयों आप्णें लह्ऊँ शी ऐक नाँम कुल़-बंष अरह् भाषा बुली अरह् लोग अरह् हर जात्ती मुँझ़्शे पंण्मिश्वर खे लोग मोले-खरीदियों लुऐ;

¹⁰ अरह् तिनू अमाँरें पंण्मिश्वर की सेवा खे: ऐक राज्य अरह् याजक बंणाऐं; अरह् से संईसारी धर्ती गाशी राज कर्ले।”

¹¹ जबे मुँऐ देखो, तअ तेसी सिंगाँस्ण अरह् तिन्दे के जींव अरह् तिनू अगुऐ के चौऊँ ढबे बैजाऐ स्वर्गदूत्त का रोल़ा शुँणाँ, जिनकी गिनती लाख्ह् अरह् करोड़ो की थी,

¹² सेजे स्वर्गदूत्त जुराल़ों ऐजो गीत्त गाँदें रूऐ: “सेजा छ़ैल़्टा, जेसी कुरबाँण करा गुवा, पराकर्म, बोलबाला, ज्ञान, शक्त्ति, आदर, बड़ियाऐ, स्त्तुति का हंक-अधिकार असो।”

¹³ तेष्णीं ही मुँऐं बादी संईसारी-स्वर्गो दी, ईयों धर्ती थाँई पताल़ो दी, संमुन्द्रो अरह् तिन्दी बंसी अंदी बादी सिर्जी-बंणाई अंदी चींजो दी, अरह् सब-कुछ जुण्जो किऐ तिन्दो असो, तिनू ऐजो बुल्दे शुँणों: “छ़ैल्टे का अरह् सिंगाँस्हणों गाशी बईठा अंदा असो, स्त्तुति, आदर, बड़ियाऐ, अरह् हंक-अधिकार, सदा-सदा हंदा रंह्!”

¹⁴ अरह् चारे जींव ऐ आमीन बुलो, अरह् तिनू अगुऐ लाँम्बे पसरियों तिनकी आरार्धना करी।