मरकुस 11 - Sirmouri

प्रभू यीशू यरूशलेम दे जीतियों हुटे

¹ जबे प्रभू यीशू अरह् तिनके चैले यरूशलेम के नंजीक, जैतून धारंह् गाशी बेतफगे अरह् बैतनिय्याह कैई आऐ, तअ प्रभू ऐ आप्णे चैले मुँझ्षे दो झुणे ऐशे बुलियों भेजे।

² “पाईले गाँव दे ज़ाव, अरह् तेथै ज़ाँदे ही ऐक गाद्ड़ू तुँओं भेंटलो, जेथू गाशी ऐतलो तोड़ी कुँऐं ने बऐठी रंई, से बाँनों अंदो हलो, अरह् तेथू तुँऐं खुलियों ईथे आँणों।

³ जे तुँओं शो कुँऐ पुछो, के ऐजो का कर्लो? तअ बुले, के ‘प्रभू के ऐतकी जरूरत असो’, अरह् से शट ही तेथू ईथे डेयाल़ीं देला।”

⁴ तबे सेजे दुईनें चैले हुटियों तेथू गाद्ड़ू बाऐर द्वारों कैई खुँडें दो बाँनों अंदो दे:खो, अरह् से तेथू खुल्दे लागे।

⁵ तेथै खल़ी अंदे किऐ लोगो मुँझ शो ऐकी ऐ बुलो, “कियों रे, तुऐं ऐथू गाद्ड़ू कैई खुली लो?”

⁶ चैले तिनखे सेजो ही बुलो, जेष्णों प्रभू यीशू ऐ तिनखे अज्ञाँ देऐ थऐ थी; तबे तिनू लोगे तिनू ज़ाँणों दित्ते, अरह् तिनू कुणिऐं ने रूकी,

⁷ तबे तिनू चैले ऐ सेजो गाद्डू खुलियो, प्रभू यीशू मसीया कैई आँणों, अरह् तेथू गाद्ड़ू की पिठी गाशी, तिन्ऐ आप्णे खोट्णों पाँऐ, अरह् प्रभू गाद्ड़ू गाशी बऐठी गऐ।

⁸ कंऐं लोगे आप्णें खोट्णों बाटो पूडे बिछ़ाऐं, अरह् कईऐं खेच़ौ शी डाल़ी काटियों बाटो पूडी पाई।

⁹ जुण्जे प्रभू यीशू मसीया के आगे-पाछे चाली रूऐ थिऐ, से लेल्याऐ-लेल्याऐंयों बुलो थिऐ, “होशाना! भागोईत असो! सेजा जू प्रभू के नाँव शा आँव।

¹⁰ भागोईत असो! अमाँरे कुल़-गड़ी का पिता दाऊद! को आँणों वाल़ो राज्य!” सभी शो ऊगले स्वर्गो दी “होशाना”!

¹¹ प्रभू यीशू यरूशलेम दे पंऊँचियों देऊँठी दे आऐ, अरह् चौऊँ ढबे बादी चींजो दे:खियों आप्णें बहारी चैले आरी बैतनिय्याह खे हुटे, किन्देंखे के संद पढ़ी रऐ थी।

बाड़ूई तेर्मोल़ी को अनाँणों

¹² दुज़े के जबे प्रभू यीशू बैतनिय्याह शे नींकल़े, तअ तिनू भूख लागी।

¹³ तिन्ऐ दुर्के शी ऐक तेर्मोल़ी के हरी डाल़ी दे:खी, अरह् से तिन्दे के नंजीक हुटे, के हऐ सको, के आँमों किऐ ईदा फल़ भेंटी ज़ाला: परह् प्रभू यीशू मसीया खे पाँच़ों के सुवाऐ तिदो ऊको किऐ ने भेंटी, किन्देंखे के सेजा तिन्दे के फल़णों का बख्त ने थी।

¹⁴ ईन्दें गाशी प्रभू यीशू ऐ तेसी डाल़ो खे बुलो, “ऐतलो शुभा तेरा फल़ कुँऐ कद्दी ने खाओं!” अरह् सेजो तिनके चैले भे शुणी लो थियों।

देऊँठी शे बईपारी आगू गाड़े

¹⁵ तबे प्रभू यीशू यरूशलेम की देऊँठी दे आऐ, अरह् जू तेथै सह्दे-बाजी करह् थिऐ, तिनू प्रभू यीशू ऐ तेथै शे बाँईडे गाड़े। तिनू रूपिया बद्ल़ो वाल़े पीड़े, अरह् कबुतर के बिक्णों वाल़े के शैक्ड़े ऊटमुँल़े पाड़े।

¹⁶ अरह् देऊँठी दा कोसी भी किऐ बिकणों का कुँण्जा भे समाँन ने आँण्णों दिती।

¹⁷ तेथै शिक्क्षा देंदे प्रभू यीशू मसीया ऐ बुलो, “कियो रे, तुँऐ पबित्र-ग्रन्थों दो पढ़ी ने थई, के मेरो घर सभी लोगो खे प्रार्थना को घर देऊँठी हदीं? परह् तुँऐं ऐथू चोर, डाकू, लुटरें खे चुँरिणों के ओराँटी बाँणी थऐ।”

¹⁸ ऐजो शुणियों प्रधान-याजकों अरह् यहूदी-निय्म के शिखाँणों वाल़े, ऐ प्रभू यीशू मसीया खत्त्म कर्णो का मोंक्का जूँऐं लुवा थिया, से तिन्दे डरह् थिऐ, किन्देंखे के तिनके शिक्क्षा लई लोगो के तूरंबाँणच़ूँटी रूऐ थिऐ।

¹⁹ संद पड़्दे ही प्रभू यीशू आप्णें चैले आरी तेसी नगर शे बाईडे हुटे।

बाड़ूई तेर्मोल़ी शी शींख भेठी

²⁰ तबे झ़ीषो भैंयाँसरह् दे जबे प्रभू यीशू मसीया अरह् तिनके चैले तेथै शे ज़ाँदे लागे, तअ तिन्ऐ सेजी तेंर्मोल़ दे:खी, अरह् से जड़ी शी शिंखंरी तोड़ी शुक्की रंऐ थी।

²¹ पतरस के सेजी बात चींत्ते आऐ, अरह् बुलो, “हे गुरू जी! दे:खो! ऐजी तेर्मोल़ी के डाल़ी जियों खे तुँऐं फिट्कारा दिया थिया, ऐ जड़ी शी शुक्की गऐ।”

²² प्रभू यीशू ऐ तेस्खे जबाब दिता, “पंणमिश्वर गाशी बिश्वाष थो।

²³ हाँव तुँओं खे खास बात बुलू, के जे कुँऐं ईयों टिम्बड़ी खे बुलो, के ऊँख्षियों संमुन्द्रो दी पंड़, अरह् से आप्णे सासो दा बिश्वाष थंह्; तअ जुण्जो तुऐं बुल़्ले सेजो तेष्णों ही हंदों।

²⁴ ईन्देंखे हाँव तुँओं खे बुलू, के जू किऐ तुँऐं प्रार्थना करियों माँगो, अरह् बिश्वाष करह्, के जुण्जो हाँव बुलबा सेजो ही हंदो, तअ तेस्खे तेष्णों ही हलो।

²⁵ अरह् जबे तुँऐं खड़े हऐयों प्रार्थना कर्लें तअ जे तुवाँरें सासो दा कसी खे किऐ गीला-शिकंवा हों तअ तेस्खे माफ करह्: ईन्देंखे के तुवाँरा पिता जू स्वर्गो दा असो, से भे तुँवारी गलती पाप माफ करला।”

²⁶ (अरह् जे तुँऐं माफ ने करह् तअ तुवाँरा स्वर्गो का पिता भे तुवाँरे पाप गलती माफ ने कर्दे)।

प्रभू यीशू के हंक-अधिकार का सवाल

²⁷ प्रभू यीशू अरह् चैले यरूशलेम दे आऐ, अरह् जबे से देऊँठी दे रीटी-फिरी रूऐ थिऐ, तअ प्रधान-याजके अरह् यहूदी-निय्म, के शिखाणों वाल़े, अरह् अगुऐ आऐयों तिनू पुँह्छ़दे लागे।

²⁸ “तुँऐं ऐजो कस्के हंक-अधिकार लई करह्? अरह् ऐजा हंक-अधिकार तुँओं खे कुँणे देऐ थुवा?”

²⁹ प्रभू यीशू ऐ तिनखे बुलो, “हाँव भे तुँओं शी ऐक बात पुछू, मुँखे जबाब दियों, तअ हाँव भे तुँओं कैई बुलबा, के हाँव कस्के हंक-अधिकार लई ऐजी काँम-काज़ करू।

³⁰ संत्त-यूहन्ना के जाँणें कराऐ गुओ, नहाँण कियों स्वर्गो को असो, के आदमी को नहाँण असो, मुँखे जबाब दियों।”

³¹ तबे से आपु मुँझी शिखंईदें लागे, के जे आँमें बुल्बे के स्वर्गो को असो; तअ ऐ बुल्दा के तबे तुँऐं संत्त-यूहन्ना गाशी बिश्वाष कैई ने कर्दे।

³² अरह् जे आँमें बुल्बे के आदमी की तरफ शो असो; तअ से लोगो दे डरो थिऐ, किन्देंखे के बादे लोग संत्त-यूहन्ना खे बरंम्बाणीं कर्णो वाल़ा साचा ऋषी माँनों थिऐ।

³³ तबे: तिन्ऐ प्रभू यीशू खे जबाब दिता के, “आँमें ने जाँण्दे” तबे प्रभू यीशू ऐ बुलो, “हाव भे तुँओं कैई बुल्दा ने, के हाँव कस्की हंक-अधिकार शी ऐजी टह्ल करू।”