मरकुस 1 - Sirmouri

संत्त-यूहन्ना नहाँण-नहाँणों वाल़े का प्रचार

¹ पंणमिश्वर का बैटा प्रभू यीशू मसीया की खुषख्बरी ऐशी दाँई शुरू हों।

² जेष्णों बरंम्बाणीं कर्णो वाल़े ऋषी-यशायाह की कताबे दो लिखी थो; “दे:ख हाँव आप्णा दूत्त ताँव शा आगे-आगे भेजूबा; जू ताँव्खें बाट बाँण्ल़ा।

³ जाँगल़ो दा ऐक धुवाणों वाल़े की धाव शुणिंदी लागी; के प्रभू खे बाट सूँऐं बाँणों, अरह् तिनखे शड़की सिधी करह्।”

⁴ संत्त-यूहन्ना आया जू जाँगल़ो दा नहाँण-नुवाँदा अरह् पापो शा छट्कारा देणों खे मंन बद्ल़्णों खे नहाँण नहाँणों का प्रचार करह् थिया।

⁵ बादे यहूदिया पर्देशो के, अरह् यरूशलेम दे बादे रंहणों वाल़े आप्णे घर शे नीक्ल़ियों संत्त-यूहन्ना कैई भेंट कर्दे ज़ाँदे लागे, तिनू सभिऐं आप्णें पाप माँनियों यरदन नंदी दो संत्त-यूहन्ना के हाथे नहाँण-नहाँदे लागे।

⁶ संत्त-यूहन्ना ऊँटो की ऊँनों के खोट्णों बाँम्बो थिया, अरह् आप्णी कमरी दी चाँम्बड़ें की लोंत्री लई गाच़ी बाँनियों रंह थिया, अरह् तेस्का भोजन थाढ़ै अरह् जाँगल़ी मोंह् हों थिया।

⁷ अरह् ऐशा प्रचार करह् थिया, के जू मुँह पाछी आँणों वाल़ें असो, से शँक्त्तिमान असो, “हाँव तिनके लातो के जूते कैई बईठ्णों ज़ूगा भे आथी ने।

⁸ मुँऐ तअ तुवाँरो नहाँण पाँणी लई कराऐ थो, परह् से तुवाँरो नहाँण (पबित्र-आत्त्मा) लई कराले।”

प्रभू यीशू को नहाँण अरह् परख

⁹ तेसी बख्ते प्रभू यीशू गलील प्रदेश के नासरत नंगर शे आऐ, अरह् तिन्ऐ यरदन नंदी दो संत्त-यूहन्ना के हाथे नहाँण-नहाँव।

¹⁰ अरह् जबे प्रभू यीशू पाँणी मुँझ शे नहाँण-नहाँऐयों बाँईडे आऐं, तअ तेख्णी तिन्ऐ असमाँन खुल्दे, अरह् पबित्र-आत्त्मा कबुतर जेष्णीं आपु गाशी ऊतर दे दे:खी।

¹¹ अरह् स्वर्गो शी ऐजी धाव पड़ी: “तू मेरा प्यारा बैटा असो, हाँव ताँव शा बैजाऐ खुशी असो।”

¹² तबे पबित्र-आत्त्मा ऐ तेख्णी प्रभू यीशू जाँगल़ों के ढबे डियाल़े।

¹³ जाँगल़ो दे च़ाल़ीष देसो तोड़ी शैताने तिन की परख करी, अरह् से जाँगल़ो दे जागल़ी जानबर बंईच़ी आरी रूऐ, अरह् स्वर्गदूत्त तिनकी सेवा कर्दे रूऐ।

प्रभू यीशू ऐ सेवा कर्णी शुरू करी

¹⁴ संत्त-यूहन्ना कय्दी दे पाणों पाछी, प्रभू यीशू पंणमिश्वर की खुषख्बरी का प्रचार कर्दे गलील प्रदेश दे आऐ।

¹⁵ तिन्ऐं प्रचार करा, “बख्त पूरा हऐ गुवा, पंणमिश्वर को राज्य नंजीक असो, आप्णा मंन बद्ल़ो अरह् खुषख्बरी गाशी बिश्वाष करह्।”

मछ्वारे झियोंर बईदे

¹⁶ गलील झील की टिराँव्टी बाटी ज़ादी बई, तिन्ऐं शमौन अरह् तेस्का भाऐ अन्द्रियास झीलो दा ज़ाल़ों लई पंणकाँदे दे:खे; किन्देंखे के से झियोंर थिऐ।

¹⁷ प्रभू यीशू ऐ तिनखे बुलो, “मुँह पाछी आओं, तअ हाँव तुँओं आप्णे चैले बंणाँणों वाल़े बाँणूबा।”

¹⁸ आप्णें जाल़ तेथी छुड़ियों से तेख्णी तिनकी गईलो चाल पड़े।

¹⁹ दाँणिक आगुड़े हुटियों, प्रभू यीशू ऐ जब्दी के बैटे याकूब, अरह् तेस्का भाऐ यूहन्ना दे:खा, से भे नाँव दा थिया, अरह् तिन्ऐं आप्णें जाल़ स्वारी-संनाँल़ी लुऐं थिऐ।

²⁰ तिनू दे:ख्दे ही मसीया प्रभू यीशू ऐ तिनू बईदे; अरह् तिन्ऐ आप्णा बाबा जब्दी धियाड़ूवा आरी नाँव दा ही छुड़ियों से आपु तिनू पाछी हुटे।

दुष्टो का भूचा अंदा चाँगा करा

²¹ तबे प्रभू यीशू अरह् तिनके साथी फरनहूम दे आऐ, अरह् से तेख्णी बिषाँव के देसे यहूदी लोगो के यहूदी-च़ोंतरे दे ज़ाऐयों शिक्क्षा देंदे लागे।

²² लोगो के प्रभू यीशू की शिक्क्षा शुणियों तूरंबाणच़ूंटे, किन्देखे के से यहूदी-निय्म शिखाणों वाल़े जिऐ ने, परह् ऐशी शिक्क्षा दियों थिऐ, जेष्णों कुँऐं हाक्म हंक-अधिकार आरी बुलो।

²³ तेसी ही बख्त्ते यहूदी-च़ोंतरे दा ऐक आदमी जू दुष्ट-आत्त्मा का भूंचा अंदा लेल्याऐ रूवा थिया।

²⁴ तेने दुष्ट-आत्त्मा के भूंचे अंदे आदमी ऐ लेल्याऐयों बुलो, “हे प्रभू यीशू नाँसरीं, अमाँरे तुँओं शो का लोणों? कियो तुँऐं आँमों खत्त्म कर्दे आऐं रूऐ? हाँव तुँओं पछ़याँणूऐं के तुँऐं पंणमिश्वर के पबित्र जंण असो!”

²⁵ “चुप्पी”! तेसी फीट्कारियों प्रभू यीशू ऐ तियों दुष्ट-आत्त्मा खे अज्ञाँ दिती, “ऐसी छुड़ियों ऐच्छ़ी बाऐडी निक्ल़ी ज़ा!”

²⁶ तबे सेजी दुष्ट-आत्त्मा तेसी आदमी च़ुड़ी मुंछियों अरह् जुराल़ी लेरंह्-च़ाँडों मारियों तेच्छ़ीं निक्ल़ी गऐ;

²⁷ सभी के तूरंबाणच़ूंटे, से आपु मुँझी सुच़्दे लागे! “ऐजो सब-कुछ का हंदो लागो? ऐ तअ हाक्म के जेऐ हंक-अधिकार आरी शिक्क्षा दियों! अरह् दुष्ट-आत्त्मा भे ईनकी अज्ञाँ माँनों, अरह् तिन्दें का पाल़्ण करह्।”

²⁸ अरह् प्रभू यीशू को नाँव तेख्णी बादे गलील के ईर्द-गिरद के बादे पर्देशो दो फऐली गो।

प्रभू यीशू ऐ बेजाऐ बीमार चाँगे करे

²⁹ प्रभू यीशू तेख्णी आप्णे साथी आरी यहूदी लोगो के यहूदी-च़ोंतरे शे निक्ल़े, अरह् याकूब, यूहन्ना की गईलो शमौन अरह् अंन्द्रियास के घर दे आऐ।

³⁰ तेथै शमौन की शाशू ठोंह् ऐकाँन्द्रे के तापो के दु:खिया थी, अरह् तिन्ऐ तेख्णी तियाँरें बारे दो प्रभू यीशू कैई बुलो।

³¹ तबे प्रभू यीशू तियाँरी नंजीक हुटा, अरह् तियाँरा हाथ थाँम्ब्ड़ियों तियों ऊबी बिऊँजाल़ी, अरह् तेख्णी तियाँरें ठोंह् ऐकाँन्द्रे च़ूंटे, अरह् तबे से प्रभू की सेवा-भंगत्त कर्दे लागी।

³² देसो ऊछाँदें सुरूज ढूब्दें संदों आरी लोग बीमार अरह् जिन्दी दुष्ट-आत्त्मा थी; तिनू लोग प्रभू यीशू कैई आँण्दे लागे।

³³ अरह् बादे नगर के लोग देऊँल़ी दे कठै हुऐ, जेथै प्रभू यीशू थिऐ।

³⁴ प्रभू यीशू ऐ बैजाऐ भहीते लोग जू छुटी-मुँटी बीमारी के दु:खिया थिऐ तिनू चाँगे करे, अरह् कऐयों दुष्ट-आत्त्मा भी गाड़ी, अरह् से तिनू दुष्ट-आत्त्मा किऐ ने बोल्णों दियों थिऐ, किन्देंखे के से प्रभू यीशू पछ़याँणों थी।

ऐक्लाल़े दी प्रभू यीशू ऐ प्रार्थना करी

³⁵ झीष हणों गाशी झूल-मूँली, आरी भियाँसरंह् दे प्रभू यीशू बींऊँजे अरह् ऐक शुन-शाँन जागे दे हुटे, अरह् तेथै से प्रार्थना कर्दे लागे।

³⁶ तबे शमौन अरह् तिन के साथी तिनू जूँह्दे लागे।

³⁷ प्रभू यीशू भेटियों तिन के साथिऐं तिनखे बुलो, “सभी लोगे तुँओं जूऐं लुऐ।”

³⁸ परह् प्रभू यीशू मसीया ऐ बुलो, “चालो, कैथी ओक्त्ते ज़ाँऊबे, ईथे केथी नंजीक के गाँव नंगर दे, जेथै हाँव प्रचार करी सकू, किन्देंखे के मेरा ईथे आँणों का ऐजा ही मतल्व असो।”

³⁹ से बादे गलील ईलाके दे घूंम्दे-फीर्दे अरह् यहूदी-च़ोंतरे दे ज़ाऐ ज़ाऐयों खुषख्बरी का प्रचार कर्दे रूऐ, अरह् लोगो शी दुष्ट-आत्त्मा गाड़दे गुऐ।

ऐक कुढ़ी चाँगा करा

⁴⁰ ऐक कोढ़ का दु:खिया तिन कैई आया, तेने प्रभू यीशू मसीया के साम्णें घूँढकुँणिऐं तिनशी बिनती करी, “तुँऐं चहाँव तअ मुँह चाँगा करी सको।”

⁴¹ प्रभू यीशू के तेसी आदमी की घिणों-असेरोह् लागी, अरह् तेस गाशी तरष करियों आप्णे हाथो लई छुँऐयों बुलो, “हाँव चहाँऊ के तू चाँगा हऐ ज़ाऐं।”

⁴² तेख्णी तेस्का कोढ़ झड़ी गुवा, अरह् से तेख्णी शुद्ध हऐ गुवा।

⁴³ तबे प्रभू यीशू ऐ तेसी पाक्का सम्झाऐयों तेख्णी बिदा करा।

⁴⁴ अरह् प्रभू यीशू ऐ तेस्खे बुलो, “दे:ख, कोसी कैई ने बुले, परह् आप्णी जाँच याजक कैई शी करा, अरह् आप्णे शुद्ध हणों के बारेदे ऋषी-मूसा खे भेटे गुऐ अज्ञाँ-निय्म के हिसाब शी भेंट चंढ़ा, जू ईयों बातो की गुवाऐ-शाज़्त हली।”

⁴⁵ परह् तेसी आदमी ऐ ज़ाऐयों खुल्मं-खुला तियों बातो का प्रचार ऐते ज़ूगा फएलाऐ दिता के प्रभू यीशू मसीया तबे नंगर दे खुल्म-खुला ने ज़ाऐ सकी, अरह् तिनू नंगर शे बाऐर शुन-शाँन जागा दो रंहणों पड़ो, तबे भे ढिक्कों च़ौऊ ढबे शे लोग तिन कैई आँदें लागे।