मत्ती 4 - Sirmouri

प्रभू यीशू की परख

¹ तबे आत्त्मा के बुल्णों गाशी, प्रभू यीशू जाँगल़ों दे नींऐं, के शैतान के जाँणें तिनकी परख, करी ज़ाँव,

² प्रभू यीशू च़ाल़ीष देस, अरह् च़ाल़ीष रात, बिना किऐ खाई-पी, बरतू रूऐ, तिन्दें पाछ़ी जबे तिनू भूख लागी;

³ तबे पर्ख्णों वाल़े शैतान नंजीक आऐयों प्रभू यीशू खे बुलो, “जे तू पंणमिश्वर का बैटा असो, तअ अज्ञाँ दे के पाथरो की रोटी बंणी ज़ाँव।”

⁴ प्रभू यीशू ऐ जबाब दिता “पबित्र-ग्रन्थों दो ऐजो भे लिखी थो: के ‘आदमी सिर्फ रोटी शा ने, परह् ऐक नाँम बचन जुण्जें पंणमिश्वर के मुँहों ज़ात्ती शे नींकल़ो तिन्दी ही लई से जीऊँदा रंह।’”

⁵ तबे शैतान ऐ प्रभू यीशू पबित्र नंगर यरूशलेम दे नींऐं, अरह् देऊँठी की खुन्नेंऊँणीं गाशी ख्ल़ियाऐं,

⁶ अरह् तिनखे बुलो, “जे तू पंणमिश्वर का बैटा असो, तअ आपु ईथै शी ऊदी दे; किन्देखे के पबित्र-ग्रन्थों दो लिखी थो: के ‘पंणमिश्वर तेरे बारे दी आप्णें स्वर्गदूत्तो खे अज्ञाँ देंदे, अरह् से ताँव हाथे-हाथ ऊबा थाग्दे; जू कद्दी ऐशो ने हईयों के तेरे लातो दी पाथरो लई ढैस-ठूकर ने लागो।’”

⁷ प्रभू यीशू ऐ जबाब दिता, “के पबित्र-ग्रन्थों दो ऐजों भे तअ लिखी थो: ‘तू प्रभू, आप्णें पंणमिश्वर के परख ने करे।’”

⁸ प्रभू यीशू शैतान ऐं बेजाऐ ऊगले धारह् गाशी नीऐं, अरह् बादी संईसारी को राज्य, अरह् तिन्दें की चंम्क-दंम्क,

⁹ तेने बुलो, “जे तू घुढकुँणिऐं लाँम्बे पसरियों मुँखे नंमष्कार करे, तअ हाँव ऐजो सब-कुछ ताँव्खें देऊँबा।”

¹⁰ तबे प्रभू यीशू ऐ जबाब दिता, “ओ शैतान, ईथै शा दुरका ज़ा! किन्देंखे के पबित्र-ग्रन्थों दो लिखी थो: ‘तू प्रभू आप्णें पंणमिश्वर खे नंमष्कार करह्, अरह् सिर्फ तिनकी ही सेवा करह्।’”

¹¹ तबे शैतान तिन कैई शा आगू हुटा, अरह् देखो, स्वर्गदूत्त आऐयों प्रभू यीशू के सेवा कर्दे लागे।

गलील ईलाके दी प्रभू यीशू की सेवकाऐं

¹² जबे प्रभू यीशू ऐं ऐजो शुणों, के संत्त-यूहन्ना बाँनियों कय्दी दा पाया, तबे से गलील खे हुटे।

¹³ अरह् प्रभू यीशू नासरत गाँव छुड़ियों, कफरनहूम नंगर दे, जू झीलो के टिराँव्टी दे असो, से जबूलून अरह् नाप्तली के ईलाके दी असो, अरह् प्रभू तेथै रंह्दें लागे।

¹⁴ ऐष्णों ईन्देंखे खे हुवो, के ऋषी-यशायाह की सेजी बरंम्बाणीं पुरी हों:

¹⁵ “यरदन नंदी के पाईले ढबे, झील की टिराँव्टी गाशी, ज़बूलून अरह् नाप्तली ईलाके की झील गलील ईलाके दे जेथै गऐर यहूदी लोग बसे अंदे असो।

¹⁶ जुण्जे लोग ईनाँरें दे बऐठी रूऐ थिऐ, तिन्ऐ बड़ा प्रकाष दे:खा; अरह् जुण्जे मंऊँत्ती के देश अरह् छ़या दे बऐठी रूऐ थिऐ, तिनू गाशी प्रकाष चंम्का।”

¹⁷ तेसी बख्तो शुभा प्रभू यीशू ऐ ऐजा प्रचार करणा शुरू करा, “मंन बद्ल़ो किन्देंखे के स्वर्गो को राज्य नंजीक आऐ पुंज़ौ।”

आगला खास-चैला बईदा

¹⁸ गलील झील, की टिराँव्टी दे चाल्दे-फिर्दे प्रभू यीशू ऐ, दो भाऐ दे:खे: शमौन जेस्खे पतरस बुली थिया, अरह् तेस्का भाऐ अन्द्रियास जेसी झील दा ज़ाल़ो लई पणंकाँदें दे:खा थिया; किन्देखे के से झियोंर मंछ़वारे थिऐ।

¹⁹ प्रभू यीशू ऐ तिनखे बुलो, “मुँह पाछी आओं, तअ हाँव तुँओं आप्णे चैले बंणाँणों वाल़े बाँणूबा।”

²⁰ से दुईनें भाऐ तेख्णी आप्णें ज़ाल़-पाँणकें छुड़ियों प्रभू यीशू पाछी चाले।

²¹ जबे से तेथै शे आगुड़े हुटे, तअ प्रभू यीशू ऐ ओके दो भाऐ तेथै दे:खे, जब्दी के बैटे, याकूब अरह् तेस्का भाऐ यूहन्ना। तिनू दुई भाई ऐ आप्णे पिता की गईलो नाँव गाशी, आप्णें जाल़ सुवाँरी लुऐ थिऐ, प्रभू ऐ तिनू भे बईदे।

²² तेख्णी से नाँव, अरह् आप्णा पिता छुड़ियों प्रभू यीशू पाछी चाले।

प्रभू यीशू ऐ रूगी बीमार लोग चाँगे करे

²³ प्रभू यीशू बादे गलील दे, रिट्दे-फीर्दें, अरह् यहूदियों के चौत्रें दे शिक्क्षा देंदे रूऐ, स्वर्ग राज्य के पंणमिश्वर की खुषख्बरी का प्रचार कर्दे लागे; अरह् प्रभू लोगो की साँत्त-भाँत्ती बीमारी अरह् रोग, अरह् बादी कंमजूरी दूर कर्दे रूऐ।

²⁴ बादे सीरिया देश दा तिनका ज़ष फऐली गुवा; अरह् लोगे बादे बीमार जू नाँनी-बड़ी बीमारी की दु:ख दे जक्ड़े अंदे थिऐ, अरह् जिन्दी दुष्ट-आत्त्मा थी, अरह् मिर्गी वाल़े अरह् अदरंगो के दु:खिया तिन कैई आँणें अरह् प्रभू यीशू ऐ तिनू चाँगे करे।

²⁵ गलील ईलाके शे, अरह् दिकापुलिस ईलाके शे, अरह् यरूशलेम नंगर, शे अरह् यहूदिया ईलाके शे, अरह् यरदन नंदी शे पाईले ढबे के लोगों की बेशुमाँर भीड़ तिनू पाछी चाली।