यहूदा 1 - Sirmouri

नंमष्कार

¹ संत्त-यहूदा के ढबे शा जू प्रभू यीशू मसीया का दास अरह् याकूब का भाऐ असो, तुँओं सोभी खे जुण्जे परमं-पिता पंण्मिश्वर के जाँणें बईदे गुऐ सेजै प्यारे असो; अरह् प्रभू यीशू मसीया खे बंचाऐयों थुऐ गुऐ।

² कृपा, दया-रंय्म, शाँण्त्ति अरह् पियार तुँओं खे बैजाऐ भेंटो चेंई।

चीट्ठी लिख्णों का मतल्व

³ हे प्यारों! जबे हाँव तुँओं खे तैसी छुट्कारे के बारे दो लिख्णों खे बैजाऐ मेंह्नत्त कर्णो के कोशिष दा थिया, जिन्दें आँमें बादे साजी असो, तअ मुँऐं ऐजो जरूरी जाँणों के तेसी बिश्वाष खे जरूरी कोशिष करह्, जू पबित्र लोगो खे ऐकी ही बई देऐ थुवा।

⁴ किन्देंखे के केत्रै ऐशे लोग चुप-चाँण आँमों मुँझी मिली रूऐ; जिनखे तियों सजा के बारे दो पुराँणें निय्म दो आगे ही लिखी थुवो थियो: ऐजे लोग नास्तिक असो, अरह् अमाँरे पंण्मिश्वर की कृपा लुच-पंण बईमानी दा बद्ल़ी दियों, अरह् अमाँरे सिर्फ ऐक ही स्वामी, अरह् प्रभू यीशू मसीया मान्णों शे ऐ भाजी ज़ाँव।

⁵ तुँऐं ऐजी सच्चाऐ आगे ही जाँणों, तबे भे मेरा मतल्व तुँओं कैई शो चींत्ते कराँणों असो, के प्रभू ऐ आप्णी परजा मिस्र देश शी बंचाऐ छुड़ाऐयों, तिन्ही लोगो का नाँष करी दिता, जुण्जे बिश्वाष शे दुर्के हऐ गुवे थिऐ।

⁶ जिनू स्वर्गदूत्तों ऐ आप्णा पद्-भार पाक्का अट्ल़ ने थई, परह् तिन्ऐं आप्णों खास घर छुड़ी दितो, तिन्ऐं तिनू भे तेसी भायानंक देसो के नियाँव खे ईनाँरे दे, जुण्जो ईनाँरो सदा खे असो, बाँनियों थऐ थुऐ।

⁷ जैशे दाँई सदोम अरह् अमोरा अरह् तिनके ऊँडे-पूँडे के नंगर, जुण्जे तिनके जिऐ कू-कर्मी बंणी रूऐ थिऐं, अरह् पराई देह्-शरीर पाछी लागी रूऐ थिऐ, तिनू लोग आगी की सजा दे भस्मं हऐयों ओकी खे अनाँणों बंणें।

⁸ तबे भे ऐजे सूईणें दे:ख्णों वाल़े, आप्णी-आप्णी देह्-शरीर अ-शुद्ध करह्, अरह् हंक-अधिकार बैकार छुटा जाँणों, अरह् बड़े पद् वाल़े लोगो खे बुरो-भलो बुलो।

⁹ प्रधान स्वर्गदूत्त मीकाईल ऐ, जबे शैतान शो ऋषी-मूसा की मुँड़्दे-मींत्तके के बारे दे बाद-बिबाद करा, तअ तैस्खे बुरो-भलो बुलियों बैएज्ता ने करी, परह् तैस्खे सिर्फ ऐती बुलो, “पंण्मिश्वर ही ताँव खे फिट्कारा देले।”

¹⁰ ऐजे लोग जुण्जी बातों जाँण्दे ने, तिनू बातो के नीदिया करह्, अरह् ऐजे लोग बै-सम्झ बुणेंरो जैष्णें असो, अरह् तिन्दी के जाँणें ऐ नाँष हों।

¹¹ निर्भाग असो! सेजे जू कैन की जैऐ चाल-चालो, अरह् मंजदूरी धियाड़ी देणों खे बिलाम जैष्णें बंईमाँन, भीरिष्ट हऐ गुऐ, अरह् कोरह्, के जैष्णें बिरूध करियों नाँष हुऐ।

¹² ऐजे लोग तुँवारी पियार की खुम्ल़ी दो तुँवारी गईलो खाँदें, पींन्दें रंह्, ऐजे लोग संमुन्द्रो दी छुपी कऐड़ी जेई असो; अरह् बै-झीझ्क बै-धड़क आप्णों पेट-ओजरा भरो; से बिना पाँणी के बाद्ल़ो जिऐ असो, जुण्जे बागूरिऐ ऊड़ाऐ ज़ाँव; ऐ बै-मोस्मी फल़ की जेई डाली जुण्जी दूबंई मंरी गुऐ अरह् जंड़ शै ऊखलियों हुटे।

¹³ ऐ संमुन्द्रो के प्रचंन्ड फालो जैष्णी हों, जू आप्णी लाजो-शर्मी की शैफो बंणाऐयों छुड़ो: ऐ हिल्दे-झुल्दे तारे मंडल़ असो, जिन खे सदा-सदा तोड़ी घोर-घुप्प ईनाँरो पाक्को अट्ल़ असो।

¹⁴ हनोक ऐ भे जू आदम शी साँत्तवें पीड़ी-गड़ी का थिया, तिनके बारे दी ऐजी बरंम्बाणीं करी, “दे:खो, प्रभू आप्णें लाखो पबित्रों की गईलो आया,

¹⁵ के सोभी लोगो का नियाँव करह्, अरह् सोभी नाँस्तिकों खे दुष्टों के बादे कामों के बारे दा जुण्जे तिन्ऐं पाप की बुराई शे कुठूर्ता की बातो पापी बंणिंयों तिनके बारे दी करी थी, तिनू दुषी कसूरबार बंणाँऐं।”

¹⁶ से सेजे लोग असो, जुण्जे तुड़-खुड़ा दें रंह्, अरह् सदा गलती निंकाल़्दें रंह्, अरह् से आप्णी हिछ़्या शे कू-कर्णी के लूभी-लाल़्चि, अरह् घमंन्डी अरह् आप्णें फाय्दे खे चाप-लुसी कर्णों वाल़े हों।

चिंताँव्णी अरह् शिक्क्षा

¹⁷ परह् हे प्यारों! तुँऐं ऐजी बातो चित्तै थुऐं, जू अमाँरे प्रभू यीशू मसीया के खास-चैले ऐ आगे ही बुली थई थी।

¹⁸ तिन्ऐ तुँओं खे बुलो, के “आखरी के देसो दे ऐष्णें लोग हले जू तुओं अरह् प्रभू ठाटै खे कर्ले, सेजै लोग आप्णें सभाव शे ही नाँस्तिक, अरह् आप्णी पापमंऐ हिछ़या के मुताबिक चालै।”

¹⁹ ऐजे लोग फूट-दराड़ पाड़णों वाल़े, अरह् संईसारीक लोग असो; जिन्दीं पबित्र-आत्त्मा ने आथी।

²⁰ परह् हे प्यारों! तुँऐं आपु आप्णे आप के बैजाऐ पबित्र बिश्वाष दे बढ़्दे ज़ाव, अरह् पबित्र-आत्त्मा दे प्रार्थना कर्दे रंह्।

²¹ सदा-सदा के अमर-जीवन पाँणों खे अमाँरे प्रभू यीशू मसीया की कृपा बड़े भुर्षे आरी सबेर मारियों आपु-आप्खे पंण्मिश्वर के पियार दे पाके अट्ल़ बंणे अंदे रंह्।

²² जुण्जे लोग बिश्वाष दे पाक्कै अट्ल़ ने रंऐ बल़्दे; तिनू गाशी दया-रंय्म करह्।

²³ अरह् भहीते लोग आगी मुझ्शे नीकाल़ियों बंचाऐ दियों, परह् प्रभू के डर-भऐ दे रह्दें, दया-रंय्म कर्दे चौक्क्ष रंह्, ऐथै तोड़ी के देह्-शरीर के ज़ाँणें कंल़न्कित खोट्णों दे शंगाऐ ज़ाव, जू तुँओं दा दाग ने लागो।

आशिर्बाद के बचन

²⁴ ऐबे: जुण्जा तुँओं ठूकर लागणों अरह् रिड़णों शे बंचाऐ सको, अरह् आप्णी बड़ियाई के साम्णें खुशी-आँनन्द मंनाऐयों तुवों नीरदोष बंणाँणों ज़ूगा हों,

²⁵ तैसी सिर्फ ऐक ही पंण्मिश्वर अमाँरे मुँक्त्ति देणों वाल़े, के बड़ियाऐं, अरह् महाँन्ता, पराक्रम, अरह् हंक-अधिकार, अमाँरे प्रभू यीशू मसीया के जाँणें हंमेशा शे असो, से ऐबे भे असो, अरह् ज़ूगौ-ज़ूगौ तड़ी रंह्। आमीन।