याकूब 4 - Sirmouri

संईसारी शी दूस्त्ती

¹ तुँओं मुँझी झगड़ा कैई हों? कियों तिन्देका कारण तुवाँरे सासो का सुख-विलास आथी ने? जुण्जा तुवाँरे अंग दा बास करह्?

² तुँऐं हिछ़या थों, परह् तुँओं भेंट्दो ने आथी; ईन्देंखे तुँऐं हंत्त्या करह्। तुँऐं डाह्-जल़ण करह् तबे ही तुँओं किऐ ने भेट्दो; तबे तुँऐं लड़ाऐ झगड़ा करह्, अरह् तुँओं ईन्दें खे ने भेट्दो के तुऐं माँगदे ने।

³ तुँऐं माँगो तअ असो ऐ, परह् तुँओं भेंट्दो ने, परह् तुँऐं आछ़ै काँम-काज़ कर्णो खे ने माँगदे, किन्देंखे के तुँऐं तेथू आप्णे भोग-बोलास दो ऊड़ाणों चहाँव।

⁴ ओ कू-कर्मी बिगड़े अंदे लोगो, कियों तुँऐं जाँण्दें ने, के संईसारी शी मित्रता कर्णी, पंणमिश्वर आरी बईर कर्णो असो? अरह् जुण्जा कुँऐं संईसारी का मित्र-दोस्त्त बंण्णा चाँव; से आपु आप्खे पंमिश्वर का बऐरी बाँणों।

⁵ कियो तुँऐं ईयो जाँणों के पबित्र-ग्रन्थों का ऐसी कथंन का किऐ अर्थ ने आथी: सेजी आत्त्मा जियों “पंणमिश्वरे आँमों दी बसाऐ थऐ, से बैजाऐ आप्णी हिछ़या शी आँमों खे ऐजी काँमना करह् जिन्दें का प्रत्ति-फ़ल़ डाह्-जल़ण हों”।

⁶ पंणमिश्वर आँमों खे बैजाऐ कृपा दियों, ईन्देंखे पबित्र-ग्रन्थों दो ऐजो लिखी थो: “पंणमिश्वर घमंन्डियों के बिरूध रंह्, अरह् गरीब-दीन नंरमाँई वाल़े लोगों खे आप्णी कृपा-रंय्म अरह् शाँण्त्ति दियों”,

⁷ ईन्देंखे पंणमिश्वर के अधीन-बष दे रंह्, अरह् शैतान का बिरूध करियों तेस्का साम्णाँ करह्, तअ से तुवाँरे साम्णें शा भागी लागला।

⁸ पंणमिश्वर के नंजीक ज़ाव, तअ से भे तुवाँरे नंजीक आला। ओ पापियों! तुँऐं आप्णे हाथ शुद्ध करह्, तुँऐं जू दू-मंने असो; तुँऐं आप्णें मंन शुद्ध करह्।

⁹ रूणा-पिट्णा करह्, अरह् दु:खी हो, के तुँवारी रूणा, हसी दा, अरह् तुँवारी ऊदासी आँनन्द-खुशी दे बद्ल़ी ज़ाँव।

¹⁰ प्रभू के साम्णें आपु खे दींन अरह् नंम्बर बंणों तअ से तुँओं शिरोमंणी बंणाँले।

आप्णें भाई दी बदी ने लाऐं

¹¹ हे भाऐ बंईणों, ओका ओकी के बदनाँमी ने करे, किन्देंखे के जुण्जे भाऐ बंईणों ओका ओकी के नीदया-बदनाँमी करह्, के आप्णें भाऐ कसूरबार बाँणों; से अज्ञाँ-नीय्म के बदनाँमी करह्; अरह् अज्ञाँ-नीय्म कसूरबार बाँणों; अरह् जे तू अज्ञाँ-नीय्म दा चाल्णों वाल़ा ने, परह् तिन्दे का नींयाँईच़ू बंणें।

¹² अज्ञाँ-निय्म देंणों वाल़ा, अरह् नीयाँईच़ू ऐक ही असो सेजा, जेस्दी रंक्क्षा कर्णो के शक्त्ति अरह् नाँष कर्णो वाल़ा भे असो, तुऐं कुँण असो, जू आप्णें भाई पड़ोसी दुषी कसूरबार बाँणी सको?

सैठो-सूँकारो अरह् घंमन्डियों खे नंसीय्त्त

¹³ ऐबे तुँऐं शुणों, जू ऐजो बुलो, के “ऐतलो के दोत्ती आँमें कोसी ओकी नगर दे ज़ाऐयों तेथै ऐक साल भर रंह्ऊँबे, अरह् बईपार करियों धंन दा नाँफा कमाँऊबे।” बईपारंह् दा नाँफा कमाणा बादा ऐस्कि हाथी असो।

¹⁴ जबे के सच्चाऐ तअ ऐजी असो, के तुँऐं तअ आप्णें बारे दो ऐजो भे जाँण्दे ने के दोत्ती तुवाँरे जीवन दो का हंदों। दे:खो, तुँऐं तअ तेसी भाप-कुँऐड़ी जेष्णें असो, जू ऐगड़ी खे दे:खियों अरह् तैई पाछू लुप्त्त हऐयों तिन्दें का किऐ पता ने लागदा के से केशे खे हुटी।

¹⁵ तुवाँरो ऐजो बुल्णो ठीक ने आथी: ईन्देखे के “जे प्रभू के हिछ़या हों, तअ आँमें जीऊँदी रंह्ऐयों सेजा काँम-काज़ करी सको।”

¹⁶ परह् तुँऐं आप्णी हंकार दा घुमंन्ड करह्, परह् हंकार अरह् घमंन्ड पाप शा भरा अंदा हों।

¹⁷ ईन्देंखे जू कुँऐं भलाऐ कर्णी जाँणियों भे जे कुँऐ भलाऐ ने करह्, तअ से पाप करह्।