इब्रानियों 7 - Sirmouri

मलिकीसिदक महाँ-याजक

¹ स्वर्गो के पंण्मिश्वर का याजक मलिकीसिदक शालेम नंगर का राजा थिया, जबे बाबा-अब्राहम राजा लोगो हराऐयों पाछ़ू आँदा लागा थिया, तबे तिनकी भेंट तेसी याजक मलिकीसिदक आरी हंऐ; अरह् तेने बाबा-अब्राहम खे आशिर्बाद दिता।

² अरह् बाबा-अब्राहम ऐ तैस्खे तिनू बादी चींजो का दषंवाँ-भाग दिता, जू तेने राजाओं कैई शो लड़ाई दो जीती थुओ थियों; याजक-मलिकीसिदक के नाँव का मतल्व (“धार्मिक्त्ता का राजा” अरह् शालेम का राजा, मंतल्व “शाँण्त्ति का राजा” असो)।

³ कोसी कैई भे तेसी मलिकीसिदक के माँ, बाबा, अरह् ना बंष-गड़ी का पता आथी, अरह् ना जेस्के शुरू का, अरह् ना जीवन के अंन्त्त का किऐ पता थी; अरह् से भे पंण्मिश्वर के बैटे का जिया संदा खे याजक असो।

⁴ ऐबे ईन्दें गाशी बिचार करह्, के से केष्णाँ बड़ा आदमी थिया, जैस्खे अमाँरे कुल़-पिता अब्राहम ऐ ज़ौद्धों दी जीत्ती अंदी सोभीं शी आच्छ़ी चीजों का दंशवा-भाग भेंट करा!

⁵ ऋषी-मूसा खे भेंटे गुऐ अज्ञाँ-निय्म के मुँताबिक लेवी की अलादी-बंष के लोगों खे जुण्जें याजक के पंद्-भार खे च़ूणें-छ़ाँटे गुऐ थिऐ; अरह् तिनखे ऐजी भे अज्ञाँ असो, के से सोभी लोगों कैई शा दंषवाँ भाग कंट्ठा करह्; मंतल्व तिनू कैई शा जुण्जें तिनके बिश्वाषी भाऐ-बंईणों असो; से भाँव बाबा-अब्राहम कीं गड़ी-पीड़ी के भे असो।

⁶ परह् जबे मलिकीसिदक लेबी के बंष-गड़ी का भे थी ने, तबे भे तेस्खे बाबा-अब्राहम कैई शा दषंवाँ-भाग भेंटा; अरह् जेसी बाबा-अब्राहम आरी पंण्मिश्वर ऐ बाय्दा करी थुवा थिया, तेस्खे भे तेने आशिर्बाद दिता।

⁷ ईदा किऐ भे षंक ने आथी, के छुटे खे बड़े कैई शा आशिर्बाद भेंटो।

⁸ अरह् ईथै तअ नाँषबान आदमी भे दषंवाँ-भाग लों, परह् तेथै सेजा ही दषंवाँ-भाग लों, जेस्के बारे दी पबित्र-ग्रन्थों भे ऐजी गुवाऐ-शाज़्त्त दियों, के से सदा जीऊँदा अमर असो।

⁹ ईन्देंखे ऐजो बुलो ज़ाँव, के लेवी लोगें भे जू दषंवाँ-भाग लंणों के हंकदार असो, तिन्ऐ भे बाबा-अब्राहम के कारण तेसी बख्त्ते दषंवाँ-भाग दिता; जबे बाबा-अब्राहम ऐ मलिकीसिदक खे दषंवाँ-भाग भेंट करा थिया।

¹⁰ जबे मलिकीसिदक ऐ बाबा-अब्राहम आरी भेंट करी, तअ तेसी बंख्त्ते लेवी का जन्म भे हंऐ ने रंई थी; अरह् से ताँव तोड़ी बाबा-अब्राहम के देह्-शरीर दा ही थिया।

मलिकीसिदक जेष्णाँ ओका याजक

¹¹ तबे जे लेवी याजक पद्-भार के कारण सीद्ध हों, तअ तबे (जेसी ऋषी-मूसा खे भेटे गुऐ अज्ञाँ-निय्म लोगों खे भेटे) तअ तबे का जरूरत्त थी; के कुँऐ ऊका याजक-मलिकिसिदक की रित्ती गाशी खड़ा हों; अरह् से हारून की रित्ति का ने हों?

¹² किन्देंखे के जबे याजक का पद्-भार बद्ल़ा ज़ाँव, तअ ऋषी-मूसा खे भेटे गुऐ अज्ञाँ-निय्म भे जरूर बद्ल़े चेंई।

¹³ किन्देंखे के जेस्के बारे दी ऐजी बातो बुली लंई, जुण्जे के ओकी गोत्र-बंष के थिऐ, अरह् तेसी गोत्र-बंष के कोसी भे आदमी ऐ बैदी गाशी याजक के रूप दे सेवा ने करी थंई।

¹⁴ ऐजो तअ जाँणों अंदो असो, के अमाँरा प्रभू यहूदा के गोत्र-बंष शे थिऐ; परह् ऋषी-मूसा ऐं ऐसी कुँल़ शा याजक के हंणों का कैथी भे जीगर ने करी थंई।

¹⁵ अरह् जबे मलिकिसिदक के जेष्णाँ ऐक ओका याजक के आँणों लंई, ऐजों भे बिलकुल साफ़ हंऐ जाँव।

¹⁶ जूण्जा देह्-शरीर के अज्ञाँ-निय्म के मुँताबिक नें, परह् अमर-जीवन की शँक्त्ति के मुँताबिक याजक बंणाँया ज़ाँव; तअ अमाँरा दावा, बैगे ही साफ़ हंऐ ज़ाँव।

¹⁷ किन्देंखे के ऐसी बारे दा मसीया यीशू के बारे दी ऐजी घोष्णाँ करी गंऐ: के “तू मलिकिसिदक की रित्ति गाशी ज़ूगौ-ज़ूगौ खे याजक असो।”

¹⁸ ऐशी दाँई आगली अज्ञाँ कंंमजोर अरह् नीष्फल़ हणों के कारण छाँई-माँई हऐ गऐ।

¹⁹ (ईन्देंखे के ऋषी-मूसा खे भेटे गुऐ अज्ञाँ-निय्म दी कुँण्जी ही भे बात सीद्ध ने करी) अरह् तिन्देंके जागा दा ऐक ऐशा आच्छ़ा-शुँद्ध भूर्षा थुवा गुवा, जिन्दें लंई आँमें पंण्मिश्वर के नंजीक ज़ाऐ सको।

²⁰ ऐजो सब षौह्-कंस्म के बिना ने हंई, खास करियों याजक के थापना बिना षौह्-कंस्म के हों थी।

²¹ परह् मसीया के थापनाँ पंण्मिश्वर के षौह्-कंस्म के कारण हंऐ, जिन्ऐं तिनकी बारे दो ऐजो बुलो: “प्रभू ऐं षौह्-कंस्म करी थंऐ, अरह् से आप्णाँ बीचार कंद्दी ने बंद्ल़्दी; के ‘तू ज़ूगौ-ज़ूगौ खे याजक असो।’”

²² ईन्देंका मंतल्व ऐजा हुवा, के मसीया यीशू ऐक बैगे-आच्छ़ै वाचा के जाँमन बंणीं गुऐ।

²³ बैजाऐ बहीते याजक बणियों आऐ, अरह् हुटे; किन्देंखे के मऊँत्त तिनू सदा खे याजक के पद्-भार गाशी ने रंणों देंदी।

²⁴ परह् प्रभू यीशू अमर असो; ईन्देंखे तिनका याजक का पद्-भार ज़ूगौ-ज़ूगौ तोड़ी अट्ल़ रंह्दा।

²⁵ ईन्देंखे जुण्जे तिनके कारण पंण्मिश्वर कैई आँऐ, से तिनखे पुरा-पुरा छ़ुट्कारा देऐ संको; किन्देंखे के से तिनकी ताँईऐं बिन्त्ती कर्दे सदा खे जीऊँदी असो।

²⁶ तअ: ऐष्णाँ ही महाँ-याजक आँमों ज़ूगा थिया, जू पबित्र, नीर-दोष, नीष-कंल़्क, अरह् पापियों शे ज़ोई, अरह् स्वर्गो शे भे ऊगले करे गुऐ हों।

²⁷ तिनखे ओकी याजक के जेऐ रोज, आगे तअ आप्णें पाप खे, अरह् तबे ओकी लोगों के पाप खे बंल़ी भेंट कर्णो के किऐ जरूरत्त ही ने आथी; किन्देंखे के तिन्ऐ ईन्देंकी ताँईऐ ऐकी ही बंई आपु आप्णीं कुँरबाँणीं की बंल़ी भेंट सदा खे करी दिती।

²⁸ किन्देंखे के ऋषी-मूसा खे भेटे गुऐ अज्ञाँ-निय्म के मुँताबिक महाँ-याजक के रूप दा तेत्ती बंई ऐक आदमी च़ूणाँ-छ़ाँटा ज़ाँव थिया, जुण्जा के बादे आदमी का जिया, साँत्त-भाँत्ती कंम्जोरी लंई घीरा अंदा हों थिया; परह् षौह्-कंस्म के बाय्दे, बचन, के मुँताबिक, जुण्जें के अज्ञाँ-निय्म पाछ़ी प्रबल हुऐ; तबे: तिन्ऐं ऐक आप्णाँ बैटा च़ूणाँ-छाँटा, जेसी ज़ूगौ-ज़ूगौ खे सीद्ध बंणाँऐ दिता।