इब्रानियों 6 - Sirmouri

¹ ईन्देंखे आँमें सीद्धत्ता आप्णाँ निशाणाँ बाणियों, मसीया शी मेल-झ़ोल थंणों वाल़ी पंह्-नींव की शिक्क्षाओं शे ऊबे बीऊँजियों पंबित्रत्ता की ढंबै बंड़ो; अरह् किऐ ओकी पंह्-नींव ने पाँव, ऐबे आँमें मंऊँत्ती की ढ़बै ज़ाँणों वाल़े कर्मो शे आप्णाँ मंन बंद्ल़ियों, पंण्मिश्वर दा बिश्वाष करह्।

² अरह् नहाँण-नहाँणों अरह् ओकी गाशी हाथ थंहणें, अरह् मँरे अँदे के ऊबे पाछ़ु जीऊँदे हंणों के; अरह् आखरी के नियाँव की शिक्क्षा देंणों के पंह्-नींव हजों ने पाँव।

³ अरह् जे पंण्मिश्वर चहाँव तअ आँमें ऐजो ही करूबे।

⁴ किन्देंखे के जिन्ऐं ऐकी बई पंण्मिश्वर का ज्ञाँन, अरह् तिनका त्तैज-प्रकाष देखी पाया; अरह् जेने स्वर्गो के बरंदाँन का सुवाद चाखी पाया, से पबित्र-आत्त्मा का हिस्सेदार बंणी गुवा।

⁵ अरह् पंण्मिश्वर के शुद्ध बचन का अरह् आँणों वाल़े ज़ूगौ की शक्त्ति का सुवाद चाखी पाँव,

⁶ जे कुँऐ पंण्मिश्वर शे भट्की ज़ाँव तअ तिनू हजों पस्तावे कराऐयों मंन बद्ल़णों खे नुवाँ बंणाँना बैजाऐ कठीण असो; किन्देंखे के से पंण्मिश्वर का बैटा आप्णी ताँईऐं हजो दुज़ाल़िऐ शुँल़ी-फ़ाषी गाशी चड़ाँव, अरह् जाणियों तिन्दा कंल़्क लाँव।

⁷ जुण्जी जीम्मीं आपु गाशी बार-बार झ़ड़ो-पाँणी के छ़ालै के छ़ालै पियों; सेजी जिम्मी तिनू लोगो खे बंड़िया षाख्ह-बाल दियों, जुण्जें तिन्देंके जींमदार हों, अरह् तियों जिम्मी खे पंण्मिश्वर कैई शा आशिर्बाद भेटो।

⁸ परह् जे तियों जीम्मीं दे झालो-झाड़ी ही जाँमों फईलो, तअ: सेजी जीम्मीं बै-कार-निकारी अरह् निरभाग हों, तियों जीम्मीं दी तबे आग ही लाँऐ ज़ाँव।

⁹ परह् हे प्यारे साथियों, जे आँमें ऐजी बातो बुलो, तबे ही आँमें तुवाँरे बारे दी, ईन्दें शी आच्छ़ी अरह् छ़ुट्कारा देंणों वाल़ी बातो का बिश्वाष करह्।

¹⁰ किन्देंखे के पंण्मिश्वर अनियाँऐ कर्णो वाल़े ने आथी, के तुँवारी काँम-काज़, अरह् सेजो प्यार बिसरी ज़ाव, जुण्जो तुँऐं तिनके नाँव शो ऐशो ढंग शो देखाव, के पबित्र लोगो की सेवा करी, अरह् हजो भे सेवा करी लऐ।

¹¹ परह् आँमें हजो बैजाऐ ऐशो चहाँव, के तुँओं मुँझ़्शे ऐक नाँम जंण आखरी तोड़ी ऐसी ही भोर्षे दे रंहणों के कोशिष कर्दे रंह्।

¹² जू तुँऐं गीद्दी-आल़सी ने बंणी ज़ाँव, परह् तिनके जैष्णें बंणों, जू बिश्वाष अरह् धीरज-सबैर के कारण प्रभू के बाय्दे के हंकदार असो।

पंण्मिश्वर का अट्ल़ निय्म

¹³ अरह् जबे पंण्मिश्वर ऐ बाबा-अब्राहम शा बाय्दा करा थिया, तबे: आपु तिन शा बड़ा ओका कुँऐं ने थी, जेस्की षौह्-कंस्म करी ज़ाँदी, ईन्देंखे तिन्ऐ आप्णी ही षौह्-कंस्म करियों बुलो।

¹⁴ “हाँब सोत्तिखे ताँव्खे बैजाऐ आशीष देंऊँबा; अरह् तेरी अलाद बड़ादा ज़ाँऊबा।”

¹⁵ अरह् ऐशा ही दाँई बाबा अब्राहम खे शाँण्त्ति-सबैर थंणों गाशी, तेसी बाय्दे का फल़ भेटा; जिन्देका बाय्दा पंण्मिश्वर ऐ करी थुवा थिया।

¹⁶ आदमी तअ कोसी आपु शे बड़े की षोंह्-कंस्म करह्, अरह् तिनके ऐक नाँम बाद-बिबाद की बातो का फऐंस्ला षोंह्-कंस्म करियों पाक्का करा ज़ाँव।

¹⁷ ईन्देंखे पंण्मिश्वर तिनू बाय्दे करे अंदें हंकदार खे साफ कर्णो चहाँव थिऐ, के मुँऐं देणों का जुण्जा बाय्दा करी थुवा; से कद्दी भी बद्ल़ी ने सक्दा; ईन्देकी ताँईऐं तिन्ऐं आपु-आप्णी षौह्-कंस्म करी।

¹⁸ परह् दो अट्ल़ बातो, के कारण, जिन्देके बारे दे पंण्मिश्वर झूठे बाँण्णें कठीण असो, किन्देखे के आँमों खे तिन्ऐं शंरण देऐ थंऐ, अरह् सेजा ही भोरषा पाक्का हंणों खे आँमो दीड़-हिम्मत्त भेंटो; जुण्जी दोऊँड़ अमाँरे सहाँम्णें तिन्ऐ थंऐ।

¹⁹ सेजा बिश्वाष अमाँरे पराँणों खे पाक्ड़ असो, जू अट्ल़ अरह् पाक्का असो, अरह् तेसी पड़्दे के भित्त्ले शे भित्त्ले जागें दे पंईचाल़ी दियों।

²⁰ जेथै प्रभू यीशू मलिकीसिदक के जेष्णाँ सदा खे महाँ-याजक बंणियों, आँमों खे अगवाल़ के रूप दे हाजीर हऐ रूऐ।