गलातियौं 3 - Sirmouri

मूसा खे भेटे गुऐ अज्ञा-निय्म

¹ ओ, बै-अकले गलातियों के लोग, तुँओं कैथु ऐ भूचै? तुँवारी तअ आँ:खी के सहाम्णें प्रभू यीशू मसीया शुँल़ी-फ़ाँशी चड़ाऐयों दे:खाऐं थुऐ थिऐ!

² हाँव तुँओं कैई शो सिर्फ ऐजो जाँण्णों चहाऊँ, के तुँओं पबित्र-आत्त्मा; मूसा खे भेटे गुऐ अज्ञा-निय्म का पाल़्ण कर्णो लई भेटा; के खुषख्बरी दा बिश्वाष कर्णो के कारण भेटी रूआ?

³ कियो तुँऐं ऐत्रे बै-अकल असो, के आत्त्मा की रित्ती गाशी शुरू करियों; अरह् आदमी के कर्मो के जाँणें खत्त्म कर्ले?

⁴ कियों तुँऐं ऐत्रा दु:ख बै-कार ही भूगा? परह् बिल्कुल् बै-कार ने भूगी।

⁵ पंण्मिश्वर जू तुँओं खे आप्णी आत्त्मा दियों, अरह् जू तुँओं मुँझी चींन-चम्तकार करह्; से ऐजो ईन्देंखे करह्, के तुँऐं मूसा खे भेटे गुऐ अज्ञा-निय्म का पाल़्ण करह्, के तुँऐं खुषख्बरी शुणियों बिश्वाष करो?

⁶ ऐजो तैष्णों ही असो, जेष्णों के “अब्राहम ऐ पंण्मिश्वर गाशी बिश्वाष करा; ईन्देंखे से पंण्मिश्वर के सहाम्णें धर्मी बंणा।”

⁷ तअ तबे तुँऐं ऐजो जाँणी पाव, के जुण्जे बिश्वाष कर्णो वाल़े असो, सेजे ही अब्राहम के अलाद नहाँन्ड़िया असो।

⁸ अरह् पबित्र-ग्रन्थों दो आगे ही शो ऐजो जाँणियों के पंण्मिश्वर गऐर यहूदी लोग बिश्वाष शे ही धर्मी बाँण्दे, आगे ही शुभो अब्राहम खे ऐजी खुषख्बरी शुणाऐ, के “तेरे जाँणें बादी गऐर यहूदी खे आशिर्बाद भेट्दा।”

⁹ ईन्देंखे सेजे लोग जू बिश्वाष कर्णो वाल़े असो, सेजे बिश्वाषी भे अब्राहम की गईलो आशिर्बाद पाव।

¹⁰ ईन्देंखे जै-तोड़े लोग मूसा खे भेटे गुऐ अज्ञा-निय्म शा काँम-काज़ गाशी बिश्वाष थों, से बादे निरभाग असो! किन्देंखे के लिखी थो; के “जुण्जों किऐ, मूसा खे भेटे गुऐ अज्ञा-निय्म की कताबे दो लिखो अंदो असो, सेजो जे कुँऐं बादी बातो दो पुरो कर्णो खे पाक्का ने रह्दा, तअ से निरभाग असो!”

¹¹ परह् ऐजी बात जरूर पर्गट असो, के मूसा खे भेटे गुऐ अज्ञा-निय्म के जाँणें, पंण्मिश्वर कैई कुँऐं धर्मी ने बंणी सक्दा, किन्देंखे के धर्मी आदमी बिश्वाषो लई ही जीऊँदा रंह्दा।

¹² परह् मूसा खे भेटे गुऐ अज्ञा-निय्म के रित्ती तअ बिश्वाषो गाशी टिकी अंदी ने आथी, परह् पबित्र-ग्रन्थों के मुताबिक, के “जू कुँऐं मूसा खे भेटे गुऐ अज्ञा-निय्म के रित्ती का पाल़्ण करह्, से तिन्दें ही के सहारे जीऊँदा रंह्दा।”

¹³ मसीया ऐ जिन्ऐं अमाँरी निरभागऐता के अब्ल़ी आपु गाशी लऐयों, मूसा खे भेटे गुऐ अज्ञा-निय्म के रित्ती के निरभागऐता शे आँमों छुडाऐ दिते। किन्देंखे के पबित्र ग्रन्थो दो लिखी थो; के जुण्जा “काठो गाशी टाँगा गुवा, से निरभाग असो!”

¹⁴ मसीया ऐ आँमों ईन्देंखे छुड़ोऐ, के इब्राहम खे दिता गुआ आशिर्बाद मसीया यीशू के कारण गऐर यहूदियों खे भे भेटी सको, जू बिश्वाष के कारण आँमें तियों पबित्र-आत्त्मा पाँऐ सको; जिन्दें का बाय्दा करी थुवा थिया।

यहूदी निय्म अरह् बाय्दा

¹⁵ हे भाऐ बंईणों, ऐबे मुँऐं तुँओं खे रूज मंरा के जीवन शा ऐक उदारण देऐ लुवा; दे:खो, जेष्णाँ आदमी आरी बाय्दा करा भे गुवा; तिन्दें मुँझ्शो ना तअ किऐ घटाव ज़ाँदो, अरह् ना तिन्दो किऐ बड़ाव ज़ादो;

¹⁶ तेष्णा ही अब्राहम खे अरह् तेस्के बंष खे दिते गुऐ बाय्दे के बारे दो असो, दे:खो, पबित्र-ग्रन्थों दो ऐजो नें बुल्दा; के “तुवाँरे बंष खे” जे ऐजो हंदों, तअ भहीते के ढबे ईशारा हंदा थिया; परह् पबित्र ग्रन्थो दो बुलो, के तेरे बंष खे जुण्जे मसीही असो।

¹⁷ परह् मतल्व ऐजा असो, जुण्जा बाय्दा पंण्मिश्वरे आगे ही पाक्का करी थुवा थिया; सेजा चार षौ तीष बर्ष पाछी आँणों वाल़ा, मूसा खे भेटे गुऐ अज्ञा-निय्म के रित्ती शा ने बद्ल़ी सको थिया; अरह् ना ही बाय्दा बै-कार बाँणा ज़ाँव थिया।

¹⁸ किन्देंखे के जे हंक-अधिकार मूसा खे भेटे गुऐ अज्ञा-निय्म गाशी टिका अंदा हंदा, तअ तबे से बाय्दा गाशी ने टिक्दी थी, परह् पंण्मिश्वर ऐ हंक-अधिकार बाय्दे के जाँणें ऐई मुँझी अब्राहम खे दिता थिया।

¹⁹ तअ तबे भलिया मूसा खे भेटे गुऐ अज्ञा-निय्म का मतल्व ही का रूआ? अज्ञाँ टाल़्णों के कारण मूसा खे भेटे गुऐ अज्ञा-निय्म के रित्ती शा जुड़ा गुवा थिया; अरह् जुण्जा बाय्दा करा गुवा थिया, से ऐजा थिया, के तेसी वंष तोड़ी रंह् जुण्जा आँणों वाल़ा असो; से मूसा खे स्वर्गदूत्त के जाँणें देऐ गुऐ थिऐ।

²⁰ ऐबे दे:खो के गुवाऐ-शाज़्त तअ दू झ़ुणें मुँझी हों, परह् पंण्मिश्वर तअ ऐके ही असो।

²¹ तअ कियों ईन्दें का मतल्व ऐजा असो, के निय्म के रित्ती पंण्मिश्वर के बाय्दे का बिरोधी असो? बिल्कुल ने! किन्देंखे के जे निय्म ऐशा दिया ज़ादा; जू से सदा का जीवन देऐ सक्दा, तअ सोतिखे पंण्मिश्वर के सहाम्णें धर्मी बंण्णों निय्म के जाँणें हंदों थियों।

²² परह् पबित्र-ग्रन्थों दे ऐजी घोष्णा करी थऐ, के बादी संईसारी पाप के बष दी असो; जू ऐजा निय्म, जिन्दें का हिस्सा यीशू मसीया दा बिश्वाष का करणा असो; से बिश्वाष कर्णो वाल़े खे पुरा हऐ ज़ाँव।

बाय्दे के वारिस

²³ परह् ऐसी बिश्वाष के आँणों शे आगे निय्म के बष दे रंऐयों अमाँरी देख-भाल़ हों थी; अरह् तेसी बिश्वाष के आँणों तोड़ी, जू पर्गटा हंणों वाल़ा थिया; तिन्दें शे आगे आँमें कय्दी जिऐं मूसा खे भेटे गुऐ ज्ञाँन-निय्म दे बोंने रंह् थिऐ।

²⁴ ईन्देंखे निय्म आँमों मसीया तोड़ी पईचाल़्णों खे अमाँरी शिक्क्षा देणों वाल़ी बंणी, के आँमें बिश्वाषो लई धर्मी बंणों।

²⁵ परह् जबे बिश्वाष आऐं गुआ, तअ आँमें तबे निय्म की शिक्क्षा के बष दे ने रंई।

²⁶ किन्देंखे के तुँऐं बादे तेसी बिश्वाष के जाँणें जू प्रभू यीशू मसीया गाशी असो; तुँऐं पंण्मिश्वर के नहाँन्ड़िया अलाद असो।

²⁷ किन्देंखे के तुँऐं बादे झुणें, जिन्ऐं मसीया को नहाँण-नहाँऐं थुओं, तिन्ऐं मसीया धार्ण करी थुवा।

²⁸ ऐबे कोसी दा किऐं फर्क ने रंई, किन्देंखे के ना तअ कुँऐं यहूदी रूवा, ना यूनानी, ना कुँऐं दास ना कुँऐं अजाद ना कुँऐं नंर अरह् ना कुँऐं नारी, किन्देंखे के तुँऐं बादे यीशू मसीया दे ऐक असो।

²⁹ अरह् जे तुँऐं मसीया के असो, तअ अब्राहम के बंष अरह् बाय्दें के हिसाब शे वारिस मतल्व हंकदार भे असो।