कुलुस्सियों 3 - Sirmouri

¹ तअ: जबे तुँऐं मसीया आरी ऊबे जियाल़ी थुऐं, तअ सवर्गिऐ चींजों की खोज दे रंह्, जेथै मसीया हाजिर असो; अरह् पंण्मिश्वर के सुऐं ढबे बऐठी रंह्।

² धर्ती गाशली ने परह् स्वर्गिऐं चींजो गाशी आप्णा ध्याँन लाओं,

³ किन्देंखे के तुँऐं तअ मँरी गऐ थिऐ, अरह् तुवाँरा जीवन मसीया आरी पंण्मिश्वर दा छुपा अंदा असो।

⁴ जबे मसीया जू अमाँरा जीवन असो से पर्गट हंदा; तबे तुँऐं भे तिनकी गईलो बड़ियाऐ आरी पर्गट करे ज़ाँदे।

पुराणा जीवन अरह् नुवाँ जीवन

⁵ ईन्देंखे आप्णे सेजे अंग माँरी दियो, जू धर्ती के असो, जेष्णाँ मतल्व चुरी-जारी गंन्दगी, बुरी हिछ़या, अरह् लोभ-लाल़्च जू मुर्ती पूजा के बराबर असो।

⁶ ईन्दी ही के ताँईऐं पंण्मिश्वर का कुरूध अज्ञाँ ने मानणों वाल़े गाशी पड़ो।

⁷ अरह् तुँऐं भे जबे ईनू बुराई दे जीवन बिताँव थिऐ, तअ ईन्दी के मुँताबिक चालो थिऐ।

⁸ परह् ऐबे तुँऐं भे ईनू बादी बातो मतल्व कुरूध, बईर भाव, नीदिया, अरह् ज़ात्ती लई गाल़ी देणी, ऐजी बादी बातो छुड़ी दियों।

⁹ ओका ओकी शो झूठो ने बुले, किन्देंखे के तुँऐं पुराँणी इंनसाँनिय्त अरह् तिन्दे के काँम-काज़ छुड़ी थुऐ।

¹⁰ अरह् नुऐं इंनसाँनिय्त धारण करी थऐ, जू आप्णे पय्दा कर्णो वाल़े के सरूप के मुँताबिक ज्ञाँन पाणों खे नुवाँ बंण्दा ज़ाँव।

¹¹ तिदा ना तअ कुऐं यूनानी रंई, अरह् ना यहूदी; ना खतना वाल़े, अरह् ना खतना के बिना, ना जागल़ी, ना स्कूती, ना दास, अरह् ना अजाद: सिर्फ मसीया ही सब-कुछ असो, अरह् सोभी दा बसा अंदा असो।

¹² ईन्देंखे पंण्मिश्वर के चूणें-छाँटे अंदें जैष्णें जू पबित्र अरह् प्यारे असो, बड़ी कृपा, भलाऐ, अरह् गरबाई-नींम्ताई, अरह् सय्नशिलता धारणा करह्।

¹³ अरह् जे कोसी के कोसी गाशी दोष-ईल़्जाँम लाणों का, मतल्व हों; तअ ओका ओकी की ऊँडी सुवें, अरह् ओका ओकी के कसूर माँफ करह्; जैष्णें प्रभू ऐ तुवाँरे पाप माँफ करे, तेष्णें ही तुँऐं भे करह्।

¹⁴ ईनू सोभी गाशी प्यार जू ऐक्त्ता का चींन असो, सदा तुँऐं ईदे बाँनिऐं अंदें रूऐ।

¹⁵ मसीया की शाँण्त्ति तुवाँरें दिल-सासो दो राज करह्, ईयों ही शाँण्त्ति खे; तुँऐं ऐक देह्-शरीर के अंग बणियों बय्दी थुऐ, अरह् तुँऐं सदा धन्यबाद कर्दे रंह्।

¹⁶ मसीया की शिक्क्षा ठीक-ढंग शा तुँओं दा बास करह्, तुँऐं बड़ी सम्झदारी शे ओका ओकी खे शिक्क्षा अरह् ज्ञाँन देईया करह्; अरह् आप्णें-आप्णें मंन दा कृपा आरी पंण्मिश्वर का धन्यबाद देंदे-देंदे, तिनके भजन; सतुति अरह् आत्त्मिक गीत गाया करह्;

¹⁷ तुँऐं भाँव किऐ बुलो, भाँव किऐ करह्, सब-कुछ प्रभू यीशू के नाँव शो करिया करह्, तुँऐं तिन्ही के जाँणें पिता पंण्मिश्वर खे धन्यबाद देंदे रंह्।

नुऐं जीवन के कुड़्बे के निय्म

¹⁸ हे, घोरवाल़ियों जेष्णों प्रभू के आछो लागो, तैष्णी ही आप्णें-आप्णें घरवाल़े के बंष दी रंह्।

¹⁹ हे घरवाल़ों आप्णी-आप्णी घरवाल़ी शो प्यार करह्, अरह् तिनू आरी हठाव्णें ने बणें।

²⁰ हे नहाँन्ड़िया, बादी बातो दे आप्णे माँ-बाबा की अज्ञाँ माँने, किन्देंखे के प्रभू ईन्दें शे ही खुशी हों।

²¹ हे, माँ-बाबा आप्णे नहाँन्ड़िया तंग ने करे, ऐशो ने हऐयों के तिनके हिम्मत्त ने च़ूटी ज़ाँव।

²² हे दासो, संईसारी दा जू तुवाँरा माँलिक असो, बादी बातो दी तिनकी अज्ञाँ माँनणो का पालण करह्; तुँऐं सिर्फ आदमी के खुश कर्णो के देखावे खे ने; परह् मंन के कऊँट्ल़ों बिना प्रभू गाशी ध्याँन थऐयों ऐष्णों करह्।

²³ जू किऐ तुँऐं करह् सेजो तंन-मंन शो करह्, ऐजो जाँणियों के आदमी खे ने; परह् प्रभू खे करी लों;

²⁴ किन्देंखे के तुँऐं जाँणो ऐ, के प्रभू ईनाँमों के रूप दा तुँओं खे हंक-अधिकार देंदा, किन्देंखे के तुँऐं प्रभू मसीया के दास-सेवक असो।

²⁵ किन्देंखे के जू बुरो करह्, से बुराई का फल़ पादा, तेथै कोसी का पक्क्षपात्त ने हंदी।