कुलुस्सियों 1 - Sirmouri

नंमष्कार

¹ पंण्मिश्वर की हिछ़या शा मसीया यीशू का खास चैला पौलुस, अरह् अमाँरे भाऐ तिमुथियुस के ढबे शी,

² सेजे पबित्र भाऐ, बईणों जू मसीया गाशी बिश्वाष करियों कुलुस्से नंगर दे रंह् थिऐ, तिनखे अमाँरे पिता पंण्मिश्वर की ढबे शी कृपा, अरह् शान्त्ति भेट्दी रंह्।

धन्यबाद के प्रार्थना

³ जबे आँमें तुँओं खे प्रार्थना करह्, तबे: सदा आप्णे प्रभू यीशू मसीया के बाबा मतलव पंण्मिश्वर के सहाँम्णें धन्यबाद कर्दे रंह्।

⁴ किन्देंखे के आँमें मसीया यीशू गाशी तुँवारा बिश्वाष अरह् पंण्मिश्वर के बादे पबित्र लोगो खे तुवाँरे प्यार के बारे दो शुँणी थुओ;

⁵ तुवाँरा बिश्वाष अरह् प्यार तियों भुर्षें गाशी असो, जू स्वर्गो दो तुँओं खे असो, अरह् जिन्दे के बारे दो तुँऐं साच्ची खुषख्बरी के प्रचारो दो शुँणी थो;

⁶ जू तुँओं कैई पऐची रूआ, अरह् जेष्णाँ संईसारी दा भे फल़ लेआँव अरह् से बढ़दा ज़ाँव, तेष्णा ही जेस देसो शे तुँऐं तेसी बचन शुँणा अरह् सच्चाई शी पंण्मिश्वर की कृपा जाँणी, अरह् सोत्तिखे सम्झ़ी पाऐ।

⁷ ठीक तेष्णीं ही शिक्क्षा जेष्णीं के तुँओं अमाँरे प्यारे साथी इपफ्रास कैई शी भेटी, जू आँमों खे मसीया का बिश्वाष ज़ूगा दास-सेवक असो।

⁸ तेने ही तुवाँरो प्यार जू पबित्र-आत्त्मा दो असो, आँमों कैई शो भे सेजो प्यार देखाव।

⁹ ईन्देंखे जेसी देसो शुभों आँमें ऐजो शुँणी थुओ, तेसी देसो शुँभे आँमें भे तुँओ खेे ऐजी प्रार्थना अरह् बिन्त्ती कर्णी ने छुड़्दे, के तुँऐं बादे आत्त्मिक ज्ञाँन अरह् सम्झ लई पंण्मिश्वर के हिछ़या के पछ़याँण दे डटे अंदे, अरह् भर-पुर हंऐ ज़ाव।

¹⁰ जू तुवाँरा चाल-चल़्ण प्रभू ज़ूगा हों, अरह् से हर तरेह् शे खुशी हों; अरह् तुँओं दे हर किस्म के भले काँम का फल़ लागो, अरह् पंण्मिश्वर के पछ़याण दे बढ़्दे ज़ाँव।

¹¹ तिनके बड़ियाऐं के शक्त्ति के मुँताबिक शे हर तेरह् की तागत शे बलवाँन हंदे ज़ाव, ऐथै तोड़ी के खुशी आरी हर तरेह् शे सबैर, अरह् संह्ऐनशील्ता देखाऐं सको।

¹² अरह् परंम-पिता पंण्मिश्वर का धन्यबाद कर्दे रह्, तिन्ऐ आँमों ईन्देंखे ज़ुगे बाँणी थुऐ, के चंम्क-तेज दे पबित्र लोगो की गईलो हंकदार के साथी बंणों।

¹³ तिन्ऐ ही आँमों ईनाँरे के बष शे छूड़ाऐंयों आप्णे प्यारे बैटे के राज्य दे दाखिल कराऐ;

¹⁴ जिंन्दी आँमों खे छ़ुट्कारा मतल्व अमाँरे पापो के माँफी भेंटी।

मसीया पबित्रत्ता अरह् तिनके काँम-काज़

¹⁵ से तअ छाँई-माई पंण्मिश्वर का देखाई पढ़णों वाल़ा रूप असो, अरह् बादी संईसारी का जैठा असो।

¹⁶ किन्देंखे के तेसी के जाँणें बादी चींजो के रंचणाँ हऐ, स्वर्गो की, अरह् धर्ती की, देखी भाँव ना देखी, का सिगाँस्ण, अरह् का हंक-अधीकार, राजा भाँव हाकम सब-कुछ़ तिनकी ही ताँईऐं बंणाँऐं थुओ।

¹⁷ से ही बादी चींजो दा जैठा असो, अरह् बादी च़ीज़ो तिनके ही जाँणें अट्ल़ असो।

¹⁸ से ही देह्-शरीर मतल्व कलीसिया को मुँड असो, से ही आदी असो, अरह् मँरे अँदे मुझ्शे आगले ऊँबे जीऊँणों वाल़े भे असो; ईन्देंखे से बादी बातो दे सोभी शे आगले असो।

¹⁹ किन्देंखे के पिता की खुशी ईन्दी असो, के तिनदी ही बादी भरपुरी बास करह्;

²⁰ अरह् शुँल़ी-फ़ाँषी गाशी लह्ऊँ बुवाणों के कारण शाँण्त्ति के मेल-झोल कराऐयों, तिनके ही जाँणें संसारीक हों भाँव स्वर्गिऐ तिन्ऐं आपु ही आरी बादा मेल-मिलाप कराया।

²¹ तुँऐं लोग आप्णें कू-कर्मो के जाँणें पंण्मिश्वर शे दुर्के हऐ गुऐ थिऐ, अरह् तिनके खिलाफी थिऐ;

²² ऐबे मसीया ऐ, आप्णी देह्शरीर की मऊँत्ती के जाँणें; पंण्मिश्वर आरी तुँवारा मेल-झोल कराऐ थुवा। जिन्दे लई से तुँओं पबित्र, निर्दोष-बैकसूर, अरह् बैदाग बंणाऐयों पंण्मिश्वर के सहाँम्णें हाजिर करी सको।

²³ तुँओं बिश्वाष दे पाक्के अरह् अट्ल बंणों अंदो रहणों पड़ो, जू तुँओं खे खुषख्बरी के जाँणें देऐ गऐ, सेजी खुषख्बरी अस्माँनों थाईली बादी संईसारी खे शुँणाऐं गऐ, अरह् हाँव पौलुस तिनका सेवक-दास असो।

कलीसिया का सेवक संत्त-पौलुस

²⁴ ऐबे हाँव तिनू दु:खो के जाँणें आँनन्द करू, जू हाँव तुँवारी ताँईऐं ऊठाऊँ; मसीया ऐ आप्णी देह्-शरीर मतल्व कलीसिया की ताँईऐं जू दु:ख भोगी थुवा, तिन्दी जुण्जी किऐ कंम्मीं-पैशी रंऐ रई, हाँव तियों आप्णी देह्-शरीर दी पुरी करूबा।

²⁵ ईयों ही कलीसिया की ताँईऐ हाँव तुओं खे पंण्मिश्वर के जाणें दिती गंऐ, सेवा खे सेवक च़ूणाँ-छ़ाँटा गुवा, के हाँव पंण्मिश्वर की अज्ञाँ का ठीक ढंग शा बचन का प्रचार करूँ।

²⁶ मतल्व सेजा भेद् जुण्जा पींढ़ियों शा ऊबा चुप्पी थिया, परह् ऐबे तिनके पबित्र लोगो कैई पर्गट करा गुवा।

²⁷ जिन कैई पंण्मिश्वर ऐ पर्गट करणा चाया, के तिन कैई ऐजा ज्ञाँन हों, के गऐर यहूदी कैई तेसी भेद् की बड़ियाऐ का मोल का असो, अरह् से ऐजो असो, के मसीया जेस्दा बड़ियाऐ का भूर्षा असो, से तुँओं दे बास करह्।

²⁸ जिनका प्रचार करियों आँमें हर ऐक आदमी च़ौक्क्ष करी दियों, अरह् बादे ज्ञाँन शे ऐक नाँम आदमी कैई शो शिखाँव ऐ, के आँमें ऐक नाँम आदमी खे मसीया दा पाक्का सीद्ध करियों हाजिर करह्।

²⁹ ईन्देंखे हाँव तिनकी तियों शक्त्ति के मुँताबिक, जुण्जी मुँदी तागत आरी असर पाँव, तिन्देंखे हाँव तन-मंन लाऐयों मेंह्नत भे करू।