प्रेरितो कै काम 8 - Sirmouri

¹ शाऊल भे तियों हंत्त्या का साथी धिया। तेसी ही देसे यरूशलेम दी कलीसिया गाशी बैजाऐ बड़ा-अंत्त्याचार शुरू हुवा, अरह् खास-चैले के सुवाऐ, बादे के बादे बिश्वाषी जंण; यहूदा अरह् सामरी ईलाके दे खिदर-बिदर हऐ गुऐ।

कलीसिया गाशी अ-नियाँऐं

² भगत्त लोगे तेसी स्तिफनुस खात्ती-कबर दा दाबी दिता, अरह् तेस्के ताँईऐ तिनू भगत्त लोगे ऐं बैजाऐ रूणा-धुणाँ करा।

³ शाऊल ऐ तेसी बख्त्ते कलीसिया के लोग सताँऐ लुऐ थिऐ, अरह् से घरह्-घरह् दा जूरे घुसरियों थिया, अरह् तेथै जेसी घरह् दी कुँऐं तिरंई हों, भाँव कुँऐ मंरोद् हों; से तिनू सोभी खींच़ी-खीच़ियों कंय्द खाँनें दे पाऐ दियों थिया।

सामरिया दा फिलिप्पुस का प्रचार

⁴ जुण्जे बिश्वाषी लोग यरूशलेम शे खिदर-बिदर हऐ रूऐ थिऐ, से रिटी-फीरियों जागे-जागे दी पंण्मिश्वर की खुषख्बरी का प्रचार करह् थिऐ;

⁵ तबे: फिलिप्पुस सामरिया के ऐक नंगर दा ज़ाऐयों लोगों मुँझी मसीया का प्रचार करदा लागा।

⁶ तबे: जुण्जी बातो फिलिप्पुस ऐ बुली, लोगे ऐं तिनू बातो शुँणियों अरह् जुण्जे अनोंख्हे चींह्न-चंम्त्तकार से देखाँव थिया; तिनू देखियों से बादे लोग ऐक च़ीत्त हंऐयों तिन्दा मंन लाँव थिऐ।

⁷ किन्देंखे के बैजाऐ बिच़्की-दुष्ट-आत्त्मा जुराल़ी लेरोह् माँरियों भहित्ते लोगो शी नींक्ल़ी थी; अरह् जेतोड़े लोग तिन्दें शे दुखी थिऐ, अरह् अन्द्रर्गों के दुखिया, अरह् कंऐयों रूगी-दुखीं, अरह् लंगड़ै चाँग्गै हुऐ।

⁸ ऐषा दाँई तेसी नंगर दा बड़ा आनन्द अरह् खुशी छ़ाँऐ।

जादूगर शमौन

⁹ शमौन नाँव का ऐक आदमी तेसी नंगर दा थिया, से कोद्दी शुभे जादू-टूणें के खैल देखाँऐयों; सामरी लोग हराँन करह् थिया, अरह् आपु खे से बड़ा बंण्णों का दावा करह् थिया।

¹⁰ नहाँन्ड़े शे ऊबे बड़े तोड़ी लोग तेस्की बातो माँनों थिऐ, अरह् ऐजो बुलो थिऐ, के “ऐजा आदमी पंण्मिश्वर के सेजी शक्त्ति असो; जिन्देंखे बड़ी शक्त्ति बुली ज़ाँव।”

¹¹ तेने भहित्ते देसो शे आप्णी जादूगरी लई लोग हराँन करी थुऐ थिऐ, ईन्देंखे से तेस्की बातो माँनों थिऐ।

¹² परह् जबे से फिलिप्पुस की बातो गाशी बिश्वाष कर्दे लागे, जुण्जा पंण्मिश्वर के राज्य अरह् प्रभू यीशू की खुषख्बरी का प्रचार करह् थिया; तबे बादे तिरंई-मंर्दे ऐं नहाँण-नहाँव अरह् माँनों।

¹³ आपु तेने शमौन ऐं भे बिश्वाष करा, अरह् नहाँण-नहाँऐयों से भे आपु फ़िलिप्पुस की गईलो हमेंशा रंह्दा लागा; तबे शमौन के आपु भे तिनू च़ींह्न-च़ंम्त्तकार देखियों तेस्के बैजाऐ तूरंबाँणच़ूटी रूऐ थिऐ।

सामरिया दे पतरस अरह् यूहन्ना

¹⁴ जबे यरूशलेम दे रंहणों वाल़े, खास-चैले ऐं ऐजो शुँणों; के सामरिया के लोगे ऐ पंण्मिश्वर का बचन माँनीं पाया, तअ तिन्ऐं संत्त-पतरस अरह् संत्त-यहूना तिन कैई डेयाल़े।

¹⁵ तबे से दुईन्नै तेथै हुटे, अरह् तिन्ऐं सामरियों खे प्रार्थना करी; के ईन खें पबित्र-आत्त्मा भेंटो।

¹⁶ पबित्र-आत्त्मा ऐभी तोड़ी तिनू मुझी कोसी गाशी ने ऊत्री रंई थी, तिन को सिर्फ प्रभू यीशू के नाँव गाशी; नहाँण ही कराऐ थों थियो।

¹⁷ संत्त-पतरस अरह् संत्त-यूहन्ना ऐ तिनू सोभी सामरी लोगो गाशी आप्णें हाथ थुऐं, अरह् तबे तिनू सोभी खे पबित्र-आत्त्मा भेंटी।

¹⁸ जबे शमौन ऐ ऐजो देखो, के खास-चैले के हाथ थंणों लई पबित्र-आत्त्मा भेंटो, तअ तेने तिनू कैई रूपिया देखाऐं बुलो।

¹⁹ “मुँखे भे ऐजी शक्त्ति ऊँडी दियों, के जबे हाँव कोसी गाशी आप्णाँ हाथ थंऊँ, तअ तेसी भे पबित्र-आत्त्मा भेंटी ज़ाँव।”

²⁰ परह् संत्त-पतरस ऐ तैस्खे बुलो, “ऊँगल़ी ज़ाँव तेरो, अरह् नाँष हों तेरा धंन-दोल्त्त, अरह् छतिया नाँष हो तेरे रूपिया! किन्देंखे के तुँऐं पंण्मिश्वर का बर्दाण रूपिया लई खर्दोणों का बिचार करा।

²¹ ईयों बातो दा ना तअ तेरा किऐ हिस्सा-भाग आथी, अरह् ना तेरा किऐ हंक-अधिकार आथी; किन्देंखे के तेरा मंन पंण्मिश्वर खे साच्चा-नीछल़ा कप्ट के बीना ने आथी।

²² ऐबे तू आप्णें पाप-बुराई शा मंन बद्ल़ अरह् पस्तावा करियों प्रभू शी प्रार्थना करह्, जिन्दें लई तेरा दूच़ींत्ता मंन अरह् तेरी बुराऐ माँफ करी ज़ाँव।

²³ मुँऐ देखी लो, के तू पीत्त की जैई कड़वाट लई दाबी-दाबियों भरा अंदा असो; अरह् अ-धरंम की बैड़ी-शाँग्ल़ी लई तू हेभी तोड़ी भे जक्ड़ा-बाँना अँदा असो।”

²⁴ तबे शमौन ऐ तिनखे जबाब दिता, के “तुँऐं ही मुँखे प्रभू शी प्रार्थना करह्, के जुण्जी बातो तुँऐं मुँखे बुली थंई, तिन्दें मुँझ्शी ऐक भे अब्ल़ी मुँह गाशी ने पड़ो।”

²⁵ तबे: संत्त-पतरस अरह् संत्त-यूहन्ना आप्णी गुवाह्-शाज़्त्त देऐयों, अरह् प्रभू का बचन अरह् खुषख्बरी शुँणाँऐंयों पाछ़ू यरूशलेम खे हुटे, अरह् सामरियों के भहित्ते गाँव दे से समाँचार शुँणाँदे लागे।

फिलिप्पुस अरह् कूश देश का हाकम

²⁶ तबे प्रभू के ऐक दूत्त ऐं फिलिप्पुस खे बुलो, “बीऊँज यरूशलेम शा गाँज़ा ज़ाणों वाल़े बाटो बाटी दखिणों के ढबै ज़ा, किन्देखे के सेजी बाट शुनं-शाँन असो।”

²⁷ फिलिप्पुस बीऊँजियों अज्ञाँ के मुताबिक चाल पड़ा, तेख्णों इथियोपियों देश का ऐक ख़ोजा इथियोपियाई महा-राँणी कन्दाके का बड़ा अधिकारी, मतल्व मंत्री, अरह् भंडारे का संईजाल़ी थिया; अरह् से आरार्धना खे यरूशलेम आऐ रूवा थिया।

²⁸ अरह् जबे से पाछ़ू ज़ाँदा लागा थिया, तअ से आप्णें रंथ गाशी बंईठा अंदा थिया; अरह् तेने ऋषी यशायाह का ग्रन्थ पढ़ी लुवा थिया।

²⁹ पबित्र-आत्त्मा ऐ फिलिप्पुस खे बुलो, “नंजीक ज़ाऐयों रंथो की गईलो चाल।”

³⁰ फिलिप्पुस बिच़ड़ियों खोज़े के रंथो कैई पंह्ईचा, अरह् तेने तेसी खोज़ा ऋषी यशायाह का ग्रन्थ पढ़दे शुँणियों तेछ़ौ पुछ़ो; “तुऐं जुण्जो किऐ पढ़ी लुओं, कियों ऐथू तू सहम्झी भे पाँव ऐ?”

³¹ तेने जबाब दिता, “भला जाँव तोड़ी कुँऐं मुँह संहम्झाँव ने ताँव तोड़ी हाँव केशो दाँई संहम्झी सकू?” तबे सेजा खोज़ा फिलिप्पुस खे ढाल-अरज करदा लागा, के “हे श्री माँन! तुऐं मेरे रंथो गाशी मेरी गईलो भंईठियों मुँह सहम्झाव।”

³² तेने पबित्र-ग्रन्थों का जुण्जा पाठ पढ़ी लुवा थिया, से ऐजा थिया: के जेष्णीं भैंड़ काट्णों-माँर्णों खे आगू नींह्, अरह् गाब्टा ऊँन कत्रर्णों वाल़े कैई चूप्प-चाँण रंह्, तेष्णों ही तिन्ऐं आप्णों मुँह ने खुली।

³³ तिनकी सह्ऐन-शीलता दा, तिन की गईलो सुवाँ नियाँव ने करा गंई; तिनके बख्त्तो के लोगों का बखाँण कूँण करदा? किन्देंखे के तिनके प्राँण धर्त्ती गाच्छै ऊँबे टिप्पै गुऐ।

³⁴ तबे तेने खोज़े ऐं फिलिप्पुस शो पुछ़ो, के ऋषी ऐ ऐजो कोस्के बारे दो बुलो, “आप्णें बारे दो? के कोसी ओकी के बारे दो बुलो?”

³⁵ तबे: फिलिप्पुस ऐ बुल्णों शुरू करो, अरह् पबित्र-ग्रन्थों के ऐसी पाठ की आड़ दो; प्रभू यीशू के खुषख्बरी का प्रचार करा।

³⁶ जबे यात्रा कर्दे-कर्दे बाटो पुडे से चाल्दे-चाल्दे कोसी पाँणी वाल़ी जागा दे पंह्ईचे। तअ तबे तेने खोजे़ ऐ बुलो, “ईथै पाँणी असो, अरह् ऐबे मेरे नहाँण-नहाँणों दे का रूकावट असो?”

³⁷ (तबे फिलिप्पुस ऐ जबाब दिता, के “जे तू आप्णें साच्चै अरह् बादे मंन शा बिश्वाष करे, तअ नहाँण-नहाँणों दे किऐ रूकावट ने आथी।” ईन्दे गाशी तेने बुलो, “हाँव बिश्वाष करू, के यीशू मसीया ही पंण्मिश्वर का बैटा असो।”)

³⁸ तबे तेने रंथ रोक्णों के अज्ञाँ दिती, अरह् फिलिप्पुस अरह् खोज़ा दुईन्नें पाँणी मुँझी हुटे, अरह् तबे फिलिप्पुस ऐं तेसी खोज़े कैई शो नहाँण-कराँओ।

³⁹ अरह् जबे से पाँणी मुँझ्षे बाईडे आऐ, तअ तबे प्रभू की आत्त्मा ऐ तेसी फ़िलिप्पुस ऊबा थागा; अरह् तबे तेने खोज़े ऐं तेसी हंजों दुज़ाल़िऐ ने देखी: तबे से आँनन्द-खुशी शा आप्णें बाटे हुटा।

⁴⁰ फ़िलिप्पुस के भे सुईणों जियों लागो, अरह् जबे तेने आप्णीं आखी खुली; तअ तेने का देखो के हाँव अश्दोद नंगर दा असो, अरह् से कैसरिया पंह्ऊँच़्णों तोड़ी बादे नंगर दे खुषख्बरी का प्रचार करदा लागा।