प्रेरितो कै काम 21 - Sirmouri

संत्त-पौलुस यरूशलेम खे हुटा

¹ इफिसुस के बुड़े बुजूर्गो कैई शी बिदाऐ लंणों गाशी, आँमें पाँणीं को जहाज खुलियों सीधे कोस टापु गाशी पंह्ऊँचें; अरह् दुज़े के आँमें रोदुस टापू दे आऐ, अरह् तेथै शे पतारा नंगर खे हुटे।

² पतारा नंगर शो आँमों पाँणी को जहाज भेटो, जुण्जो फीनीके प्रदेश खे ज़ाँदो लागो थियों; ईन्देंखे आँमें तिन्दें शुवार हऐयों तेथै शे आगु हुटे।

³ जबे अमाँरे साईप्रस टापू देखाई दिता, तअ आँमें तेसी टापू डेरे ढबे छुड़ा, अरह् आँमें सीरिया खे ज़ाऐयों सूर नंगर दे ऊदे ऊत्रें; किन्देंखे के तेथै जहाजो को संमाँन ऊदो ऊतार्णो थियो।

⁴ तबे आँमें तेथै चैले का पता लाया, अरह् चैले भेंटीयों आँमें सात्त देसो तोड़ी तेथै रूऐ; तबे तिनू चैले ऐ पबित्र-आत्त्मा की शक्त्ति लई संत्त-पौलुस खे बुलो, के यरूशलेम दी आप्णीं कंदमं-भींख ने थुऐ।

⁵ जबे तेथै शा अमाँरे ज़ाँणो का बख्त्त पुरा हुवा; अरह् आँमें बिदा हंऐयों जाँदे लागे, तअ बादे लोग तिरंई अरह् नहाँन्ड़िया आरी, नंगर शे बाँईडे आँमों डेयाल़्दे आऐ; अरह् आँमें संमुँन्द्रो के काटल़ो गाशी आप्णें घुण्डू नाँऐयों प्रार्थना कर्दे लागे।

⁶ अरह् तबे आँमें ओका ओकी शी बिदाऐ लईयों, जहाजो दे बईठे अरह् से आप्णे-आप्णे घरह् दे पाछू हुटे।

⁷ तबे आँमें सूर नंगर शे पाँणी की यात्रा पुरी करियों पतुलिमयिस दे पंह्ईचे, अरह् तेथै के बिश्वाषी भाऐ-बंईणों खे नमंष्कार करियों तिनकी गईलो ऐक देस तेथै रूऐ।

⁸ दुज़े के आँमें तेथै शे हाडियों कैसरिया दे पंह्ईचें, अरह् तबे आँमें फिलिप्पुस खुषख्बरी देणों वाल़े के घरह् दे हुटे, अरह् तैथी रूऐ, अरह् से “सात्ती सेवकों” मुझ्षा ऐक सेवक थिया;

⁹ तेस्के चार कुंँवाँरी बेटी थी, जिन कैई पंण्मिश्वर की बरंम्बाँणीं कर्णो का बंरदाँण थिया।

¹⁰ जबे आँमों तेथै भहित्ते देसो हऐ गुऐ, तअ अगबुस नाँव का ऐक ऋषी यहूदिया शा आया।

¹¹ तेने ऋषी ऐ आँमों कैई आऐयों संत्त-पौलुस का कंमर बंन्द आँमो कैई शा आगु करा, अरह् आप्णे हाथ लात्त बाँनीयों बुलो, “पबित्र-आत्त्मा ऐजो बुलो: के जेसी आदमी का ऐजा कंमर बंन्द असो; तेसी यरूशलेम दा ऐष्णाँ ही बाँन्दा, अरह् तेसी गऐर-यहूदियों के हाथै देऐ देईला।”

¹² ऐजो शुँणिंयों आँमें अरह् तेथै के लोग, संत्त-पौलुस शी ऐजी अरज कर्दे लागे; के से यरूशलेम दे ने ज़ाँव।

¹³ ईन्दे गाशी संत्त-पौलुस ऐ जबाब दिता, “तुँऐं लोगे तअ रूऐ-रूऐयों मेरा दिल च़ूड़ी लुवा, अरह् ऐजो बुलियों? हाँव प्रभू यीशू के नाँव के कारण यरूशलेम दा बाँनणों शा ने, परह् मंर्णो खे बे तैयार असो।”

¹⁴ जबे संत्त-पौलुस अमाँरी बातो माँन्दा तैयार ने हंई, तअ आँमें ऐजो बुलियों चुप्पी हऐ गुऐ; के “प्रभू की हिछ़्या पुरी हों!”

¹⁵ तिनू देसो बित्त्णों गाशी, आँमें तैयारी करी, अरह् यरूशलेम खे हुटे।

¹⁶ कैसरिया के किऐ चैले अमाँरी गईलो आऐं, अरह् आँमों कुप्रुस के रंहणों वाल़े मनासोन नाँव के आदमी के घरह् दे हुटे; अरह् सेजा मनासोन शुरू के देसो दा चैला बंणी रूवा थिया, अरह् आँमें तबे तेसी कागी रंहणों वाल़े थिऐ।

संत्त-पौलुस की याकूब आरी भेंट मील हऐ

¹⁷ जबे आँमें यरूशलेम दे पंह्ईचे, तअ बिश्वाषी भाऐ-बंईणों ऐं अमाँरा आँनन्द आरी सु-स्वागत् करा।

¹⁸ दुज़े देसे संत्त-पौलुस अमाँरी गईलो याकूब कागी हुटे; तेथै बादे यहूदी बुड़े बुजूर्गो लोग कठै थिऐ।

¹⁹ संत्त-पौलुस ऐं तिनखे नमंष्कार करा, अरह् पंण्मिश्वर ऐ तिनके सेवा के काँम-काज़ लंई गऐर-यहूदियों के बीच जुण्जो किऐ कोरो थियों, सेजो सब-कुछ बारी-बारी शो तिन कैई बुलो थियों।

²⁰ तिन्ऐं ऐजी बात शुँणिंयों पंण्मिश्वर की बड़ियाऐं करी, अरह् संत्त-पौलुस खे बुलो; “भाऐ! तुऐ देखी लो, के हजारो यहूदियों ऐ बिश्वाष करी पाया; अरह् से बादे निय्म पाक्कै माँनणों वाल़े भे असो।

²¹ तिन्ऐं तुवाँरे बारे दो शुँणीं थुओं, के तुऐं गऐर-यहूदियों के बीच रंहणों वाल़े; यहूदियों खे ऐजी शिक्क्षा देऐ थंऐ, के तुऐ ऋषी-मूसा खे भेटे गुऐ अज्ञाँ निय्म छुड़ी दियों; किन्देंखे के तुऐ ईनखे बुलो, के ऐ ना तअ आप्णें नहाँन्ड़िया का खतना करह्; अरह् ना पुराँणें यहूदी-रित्ती-रूवाज का किऐ पाल़्ण करह्।

²² तअ ऐबे का करो ज़ाँव? ऐ जरूर शुँण्दें के तुऐं ईथै आऐ रूऐ।

²³ ईन्देंखे तुऐ अमाँरा कंऐणाँ माँनों; के अमाँरे ईथै चार आदमी असो, जिन्ऐं हीछ़ा-मंन्त्त माँनी थंऐ।

²⁴ तिनू ईथै शे आप्णी गंईलो आगु नीयों, अरह् ईनकी गईलो आप्णें आप खे शुद्ध करह्; अरह् ईनके मुँडंन की किमम्त्त दियों, ऐशो दाँई सब लोग जाँणी पाँदे, के ईन्ऐं जुण्जो तुवाँरे बारे दो शुँणी थुओं; सेजो झूठों असो; अरह् तुऐं आपु भे ऋषी-मूसा खे भेटे गुऐ अज्ञाँ निय्म का पाल़्ण करह्, अरह् तिन्दे के मुँताबिक चालो ऐं।

²⁵ परह् तिनू गऐर यहूदियों के बारे दो, जिन्ऐ बिश्वाष करी थुवा; तिनखे आँमें ऐजी पत्री लीखियों, तिनखे आप्णाँ फंऐस्ला भे डेयाल़ी थुवा; के मुँर्तियों गाशी चड़ाऐ अंदे माँस शे, अरह् लंह्ऊँ के खाणों शे, अरह् गल़ा-घोट्टे-हलाल के बईच़ीं के माँस शे, अरह् चूरी-जारी शे बंचियों रूऐ; परह् ईन्दें शे दुर्के ही रूऐ।”

²⁶ तबे: संत्त-पौलुस ऐं तिनू आदमी आगू नींऐ, अरह् दुज़े का तिनकी गईलो, शुद्ध हऐयों देऊँठी दा हुटा, अरह् तेथै बुली दितो, के शुद्धीकरण के बिधी पुरी हंदी, अरह् तिनू मुँझ्शी ऐकी नाँमों खे भेंट चड़ाऐ ज़ाणों तोड़ी के बादे देसो पुरे हंदे।

देऊँठी दा संत्त-पौलुस ऊडा थाँहम्बड़ा

²⁷ जबे सात्त देसो पुरे हंदे लागे थिऐ, तअ आसिया ईलाके के यहूदियों ऐ संत्त-पौलुस देऊँठी दा देखियों बादे लोग दुरताऐ, अरह् तिन्ऐ लेल्याऐयों संत्त-पौलुस ऊडा थाँहम्बड़ा।

²⁸ “हे प्यारे भाईयों! अमाँरी मद्त करह्; ऐ सेजा ही आदमी असो! जुण्जा ढींकों सोभी लोगों खे ऐशी शिक्क्षा का प्रचार करह्, जुण्जा अमाँरी जात्ती, अरह् अमाँरे रिती-रूवाज, अरह् ईयों देऊँठी के बिरूध असो; ऐने ईनू यूनानियों लोग पबित्र जागें दे नींह्ऐयों अ-पबित्र करी पाऐ।”

²⁹ खास करियों ईन्दें शा आगे ईन्ऐं इफिसुस का रंहणों वाल़ा, त्रुफिमुस तिनकी गईलो नंगर दा देखा थिया, अरह् ऐजो जाँणों थिऐ; के ऐसी पौलुस ऐ देऊँठी दा लियाऐ थुवा।

³⁰ तबे बादे नंगर दी हारकुँजीं हंऐ, अरह् लोग चौऊँ ढबै शे बिच़्ड़ियों कठै हुऐ, अरह् संत्त-पौलुस ऊँडा थाँहम्बड़ियों देऊँठी शा बाँईडा खीच़ी-झीड़ियों आँणा, अरह् देऊँठी की पोह्ल़ तेख्णीं पाछ़ू डाकी दित्ती।

³¹ जबे से पौलुस माँरी देंणाँ चहाँव थिऐ, तअ रोमन पल़ट्ण के सरदारो कैई ऐजा पता लागा; के बादे यरूशलेम दे हारकुँजीं हंऐ रंऐ।

³² तबे से तेख्णी फऊँजी अरह् सूबेदारोह् आरी, लोगों की भीड़ की ढबै बिच़्ड़े, जबे लोगे ऐ फऊँजी का सुबेदार अरह् फऊँजी का द्ल़ देखा; तअ तबे से संत्त-पौलुस माँर्दे-पीट्दे भाजी गुऐ।

³³ तबे पल़ट्ण के सेरदारे नंजीक आऐयों संत्त-पौलुस बाँनी दिता, अरह् तेसी दू बैड़ी लंई बाँनणों के अज्ञाँ दिती; तबे तेने तिन कैई शो पूछ़ो, के ऐजा कुँण असो, अरह् ऐने का करी थुओं?

³⁴ लोगों के भीड़ो मुझ्षो कुँणिंऐ किऐ बुलो, कुँणिऐ किऐ बुलो; ऐजा पता ही ने लागी, के कुँणें का बुली लो; अरह् सेजा सुबेदार तिनू लोगों कैई ढह्स्रोल़े के कारण पंह्ऊच़ी ने सकी, अरह् जबे बैजाऐ रोल़ा पड़ा, तअ तेने सुबेदारे तेसी पौलुस कीलै दा भीटा नींहणों के अज्ञाँ दिती।

³⁵ जबे पौलुस पंईड़ी कैई पंहईचा, तअ लोगों की बै-शुमाँर भीड़ के कारण फऊँजी के जवाँन ऐ तेसी थागियों भीटा किले दा नींयाँ।

³⁶ लोगो की भीड़ तेसी पाछ़ी ले-ल्लियाऐयों पढ़ी, के “ऐसी माँरो-माँरो खत्त्म करी दियों।”

³⁷ जबे फऊँजी ऐं संत्त-पौलुस किले दा भीटा नींयाँ, तअ संत्त-पौलस ऐं सुबेदार खे बुलो; “कियों हाँव तुओं कैई किऐ बिनती करी सकू?” तेने सुबेदार ऐं तेस्खे जबाब दिता; कियों तू यूनानी भाषा-बुली जाँणें ऐ?

³⁸ कियों तू सेजा ही मिस्री आथी ने, जेने किऐ बख्त्ते आगे बिरोध करा थिया; अरह् चार हजार गुण्डै जुण्जे हंथयारो, अरह् कृपाँण वाल़े लोग थिऐ, तिनू तुऐं शुँन-शाँन जागे दे आगु नींह् ने थी?

³⁹ संत्त-पौलुस ऐ बुलो, “हाँव यहूदी असो! अरह् किलिकिया के तरसुस नंगर का रंहणों वाल़ा असो; हाँव कोसी सिधे-साधे नंगर का नागरिक ने आथी, मेरी ताँव कैई शी ऐजी अरज असो; के मुँखे लोगों की भीड़ मुँझी किऐ बुल्णों के अज्ञाँ दियों।”

⁴⁰ जबे तेने अज्ञाँ देऐ दिती, तबे संत्त-पौलुस ऐ पईड़ी गाशी खह्ल़ियों लोगो खे हाथो लई ईशारा दिता। जबे सेजे लोग चुप्पी हऐ रूऐ थिऐ, तअ से इब्रानी भाषा दा बुल्दा लागा: