प्रेरितो कै काम 17 - Sirmouri

संत्त-पौलुस अरह् सीलास थिस्सलुनीकियों के नंगर दे

¹ तियों यात्रा कर्दे संत्त-पौलुस अरह् सीलास अम्‍फिपुलिस अरह् अपुल्लोनिया बाटी थिस्सलुनीकियों दे पंह्ईचे, तेथै ऐक यहूदी च़ौत्रा थिया।

² तबे: संत्त-पौलुस आप्णें ढंग शे तेथै तिनू यहूदी लोगो कैई शा भेंटिदा हुटा, अरह् च़ीन बिषाँव के देसे लगातार तिनके च़ौत्रें दे ज़ाऐयों तिनू आरी बाद-बिबाद करदा लागा; अरह् पबित्र-ग्रन्थों के बचनों का बंखाँण करदा लागा।

³ अरह् ऐजो साबित्त करी दितो, के मसीया खे दु:ख्ह-भोगणाँ, अरह् मँरे अँदे मुँझ्शो पाछ़ू ऊबो जीवणों; जरूरी थियों, “सेजे ही यीशू जिनका हाँव तुवाँरे बीच दा प्रचार करू, से ही मसीया असो।”

⁴ तिन आरी भगत्त यूनानियों मुँझ्शे भहित्ते लोगे ऐ, अरह् बैजाऐ भहित्ती बिच़्की तिरंई ऐ भे बिश्वाष करा, अरह् से भे संत्त-पौलुस अरह् सीलास की गईलो मिली गई।

⁵ परह् यहूदी लोग तिन्दे लंई डाह्-जल़्ण शे जल़्दे लागे, अरह् तिन्ऐ बंईजारो के किऐ गुँण्डै की मंद्त्त शी भीड़ कंट्ठी करी; अरह् नंगर दे झ़गड़ै कराऐ, के तुऐ संत्त-पौलुस अरह् सीलास नंगर के च़ौत्रें के सहाँम्णें हाजिर कर्णो के मंतल्व शे से यासोन आदमी कागी आऐ पुज़ै।

⁶ परह् जबे से तेथै ने भेंटी, तअ तिन्ऐं लेल्याऐयों अरह् तेसी यासोन अरह् किऐ ओके भाऐ नंगर के हाकमों के सहाम्णिंऐ खींच़ी-झीड़ियों लियाऐ, अरह् बुलो के “ऐजे सेजे लोग असो; जिन्ऐं संईसारी ऊल़्टी-पुल़्टी करी थऐ; ऐजे लोग ईथै भे आऐं गुऐ।

⁷ अरह् ऐने यासोन ऐ तिनू आप्णे कागी थऐ थुऐ, ऐ बादे के बादे ऐजो बुलो; के कुँऐ ओका ऐक राजा असो; जेस्खे यीशू बुली, अरह् से कैसर की अज्ञाँ का बिरूध करह्;”

⁸ ऐजो शुँणिंयों लोगों के भीड, अरह् हाकम डरियों बै-चंय्न हुऐ।

⁹ ईन्देंखे तिन्ऐं तेसी यासोन अरह् बाकी के लोगो के जंमाँन्त्त की तोर गाशी हाथों-लात्तों के मुँचल्के लईयो तिनू छुड़ी दिते।

संत्त-पौलुस अरह् सीलास बिरीया नंगर दे

¹⁰ बिश्वाषी भाई-बंईणों ऐ तेख्णी रात्ते-रात्त संत्त-पौलुस अरह् सीलास बिरीया नंगर खे डेयाल़ी दित्ते; अरह् तेथै पंह्ऊँचियों से यहूदियों के च़ौत्रें दे हुटे।

¹¹ ऐजे लोग तअ थिस्सलुनीकियों के यहूदियों शे जादा भले थिऐ, अरह् से बंडी हिछ़या शे प्रभू यीशू के बचन शुंणों थिऐ; अरह् तियों संच्चाई की जाँच-परख कंर्णों खे रोज पबित्र-ग्रन्थों का अध्यन कंरियों तिन्देंके खोज करह् थिऐ।

¹² अरह् तिन्दें का नंतिजा ऐजा नीकल़ा के बैजाऐ यहूदी लोग अरह् यूनानी मरोद्-तिरंई भे प्रभू यीशू गाशी बिश्वाष कर्दे लागे।

¹³ जबे थिस्सलुनीकियों के यहूदियों कैई ऐजा पता लागा; के संत्त-पौलुस ऐ बिरीया नंगर दा पंण्मिश्वर के बचन का प्रचार करी लुवा; तअ तबे से भे तेथै आऐयों लोग भड़्काँदें-दोरताँदे लागे।

¹⁴ ईन्देंखे बिश्वाषी भाऐ-बंईणिऐं तेख्णी संत्त-पौलुस तेथै शा बिदा करा, के संमुन्द्रो के टिराँव्टी गाशी ज़ाँव; अरह् तबे सीलास अरह् तीमुथियुस तैथी बिरीया नंगर दे ही रूऐ।

¹⁵ संत्त-पौलुस के साथिऐ तेसी एथेंने नंगर तोड़ी डेयाल़ा, अरह् संत्त-पौलुस के ईयों अज्ञाँ आरी पाछ़ू आऐ; के जैतड़ी शिघवाँत्त हऐ सको, सीलास अरह् तीमुथियुस मुँह कैई पाछ़ू आँव।

संत्त-पौलुस एथींस नंगर दे

¹⁶ जबे संत्त-पौलुस एथेंस नंगर दा सीलास अरह् तीमुथियुस की ठल़्णाँई दा थिया, तअ तेने सेजो एथेंन नंगर मुँर्तियों लंई भरो अंदों देखियों तेस्के तंन-मंन दी आग लागी।

¹⁷ ईन्देंखे संत्त-पौलुस रोज यहूदियों के चौत्रें दा यहूदी अरह् गऐर यहूदी भगत्तो कैई अरह् चोराई बाटो दा, जेथै बाटी लोग आँव-ज़ाँव थिऐ; तिनू बटाऊँ आरी भे से बात्त-च़ींत्त करह् थिया।

¹⁸ तबे इपिकूरी अरह् स्तोईकी दर्शण देख्णों वाल़े लोग, भे तेस्की गईलो सवाल जबाब कर्दे लागे; अरह् कंई लोगे ऐ बुलो, “ऐजा बकबादी का बुल्णों चहाँव?” परह् ओकी ऐ बुलो, के “ऐ कोसी ओकी देव्त्ते का प्रचार कर्णो वाल़ा हंणाँ” किन्देंखे के संत्त-पौलुस प्रभू यीशू का अरह् दुज़ाल़िऐं ऊबे जीऊँणों की खुषख्बरी शुँणाँव थिया।

¹⁹ ईन्देंखे तिन्ऐं संत्त-पौलुस आप्णी गंईलो अरियुपगुस कैई नीयाँ, अरह् तेस कैई शो पुछ़ो; “कियों ऐजो आँमें भे जाँण्णों चहाँव, के ऐजी नंऐ शिक्षा जुण्जी तू आँमों कैई शी शुँणाँऐं ऐजी का शिक्षा असो?

²⁰ किन्देंखे के ऐजी बातो जुण्जी तू आँमों आरी करे, ऐजी बातों आँमों खे नोंखी असो; किन्देंके के ऐत्त्लो तोड़ी अमाँरे काँने ऐजी बातो कोद्दी ने शुँणीं थंई; आँमों ऐजों जाँण्णों चहाँव के ईन्दें का मंतल्व का असो?”

²¹ (ईन्देंखे बादे एथेंस के रंहणों वाल़े, अरह् तेथै रंहणों वाल़े प्रदेशी लोग, नंई-नंई बातो बुल्णीं अरह् शुँण्णों के सुवाऐ ओकी कोसी भे काँम-काज़ दा आप्णाँ बख्त्त ने बिताँव थिऐ।)

अरियुपगुस की खुम्ल़ी दा संत्त-पौलुस का भाष्ण

²² तबे संत्त-पौलुस अरियुपगुस के च़ौत्रें दा बिचो ठाँई खह्ड़ा हंऐयों बुल्दा लागा; “हे एथेंस के लोगो, मुँऐ देखी लो, के तुँऐं लोग धर्मिक बातो दा बैजाऐ मंन लाँव।

²³ किन्देंखे जबे मुँऐं रीट्दे-फिर्दे, तुँवारी पुज्णों की चींजो देखी लई थी, तअ ऐक ऐशी बैदी देखी, जिदो लिखी थो थियो, ‘अण्जाँण देव्त्ता की बैदी!’ ईन्देंखे तेसी देव्त्ता तुँऐं बिना जाँणें पूजों, अरह् हाँव तुँओं कैई तेसी ही देव्त्ते की खुषख्बरी शुँणाँदा आऐ रूवा।

²⁴ जेने पंण्मिश्वर ऐ संईसारी अरह् ईन्दें की बादी चींजो बंणाऐ थई, से स्वर्ग अरह् धर्ती का स्वामी-माँलिक हऐयों, हाथो की बाँणी अंदी कोसी भी देऊँठी दा ने रंऐ सक्दा;

²⁵ अरह् ना कोसी भी चींजो की जरूरत की ताँईऐं से आदमी के हाथो की सेंवा चहाँदा, किन्देंखे के से आपु ही जीवन अरह् प्राँण, अरह् सब-कुछ देऐ दियों।

²⁶ तिन्ऐं ही ऐक शुरू के आदमी (आदम) शी बादी आदमी की जात्ती पय्दा करी थंई, के से बादी संईसारी दे बंसी फऐली ज़ाँव; तेने आदमी खे निय्म, अरह् रंहणों की सिमाँ-हंद् बंणाँऐ थंऐ।

²⁷ के सेजे लोग पंण्मिश्वर की खोज कर्दे जूह्ऐ पाँव, अरह् खास करियों से आँमों मुँझ्शे कोसी शे भे दुर्के ने आथी।

²⁸ किन्देंखे के तिन्हीं दे ही आँमें जीऊँदें रंह्, अरह् चाल्दे-फिर्दे, अरह् अट्ल़ रंह्; अरह् जेष्णों ही तुवाँरे कंई कबिता लिख्णों वाल़े ऐ बुली थो, ‘के आँमें तिन्ही के ही बंष अलाद असो।’

²⁹ तबे: पंण्मिश्वर के अलाद-बंष हऐयों, आँमों खे ऐजो सम्झणों ठीक ने आथी; के पंण्मिश्वर सुन्नें के, के चाँन्दीं के, के पाथर की मुँर्ती के जेष्णें असो; जुण्जी के आदमी की हस्त्त कला के हिछ़ा हों।

³⁰ “पंण्मिश्वर ऐ अज्ञाँनी का जबाना, अण-देखा करी थुवा; अरह् ऐबे तिनकी अज्ञाँ ऐजी असो; के हर ऐक आदमी पस्ताँवा करह्।

³¹ किन्देंखे के तिन्ऐ सेजो ऐक देस पाक्को करी थुओं, के जबे बादे आदमी संईसारी का नियाव के रूप दा बिचार करह्; किन्देंखे के पंण्मिश्वर ऐं तेसी आदमी हजों पाछ़ू ऊबा जीऊँदा करियों ईन्दे का परमाँण भे देऐ थुवा।”

³² मरियों ऊबे जीऊदें हणों वाल़ी बातो शुँणियों, बादे आदमी ठाठे पाड़दे लागे; अरह् कंई ऐं बुलो, “ऐजी बातो आँमें ताँव कैई शी हजो जादा शुँण्णीं चहाँव।”

³³ तबे संत्त-पौलुस तिनके बीचो शे निक्ल़ियों आगु हुटे।

³⁴ तबे: भे किऐ आदमी संत्त-पौलुस की गईलो मिले, अरह् बिश्वाष करा; जिन मुँझी दियुनुसियुस जू अरियुपगुस जू बिम्बर थिया, अरह् दमरिस नाँव की ऐक तिरंऐ थी, अरह् तिनकी गईलो ओके भे बैजाऐ लोग थिऐ।