प्रेरितो कै काम 15 - Sirmouri

यरूशलेम दे खुम्ल़ी

¹ तबे किऐ लोग यहूदिया ईलाके शे बड़े नंगर अन्ताकिया दे आऐ, अरह् आऐयों तिन्ऐं बिश्वाषी भाऐ-बंईणों कैई शो ऐजो शिखाव: के “जे तुवाँरा ऋषी मूसा खे भेटे गुऐ अज्ञाँ निय्म के मुँताबिक खतना ने हुवा! तअ तुओं खे मुँक्त्ति-छ़ूट्कारा ने भेंटी सक्दा।”

² ईयों बातों दे संत्त-पौलुस अरह् संत्त-बरनबास के तिनू लोगो आरी बैजाऐ बोल-चाल हंऐ; अरह् तबे ऐजी पाक्की ठाट हऐ, के संत्त-पौलुस, अरह् संत्त-बरनबास, अन्ताकिया के कुछ लोगो आरी; यरूशलेम खे ज़ाले, अरह् ईयों बातो के चर्चा खास-चैले, अरह् यरूशलेम के बादे बुड़े-बुजूर्गो आरी कर्ले।

³ तबे: अंन्ताकिया की कलीसिया ऐं तिनू तेथै शे बिदा करे: तबे तिन्ऐं फीनीके अरह् सामरी ईलाके बाटी यात्रा करी; अरह् तेथै के भाऐ-बंईणों खे बुलो, के गऐर-यहूदी लोगे केशे दाँई आप्णें मंन बद्ल़े, अरह् ऐजो शुँणाँऐयों तिन्ऐ सोभी लोग आँनन्दित्त-खुशी करे।

⁴ जबे से यरूशलेम दे पह्ईचे, तअ कलीसिया अरह् खास-चैले अरह् माँने-गीणें बुड़े बुजूर्गो ऐ तिनकी गईलो मंजे शे भेंटिऐ, अरह् तिन्ऐं बुलो, के पंण्मिश्वर ऐ तिनकी गईलो रंह्ऐयों केष्णें-केष्णें काँम-काज़ करी थुऐ।

⁵ परह् यहूदी भाट-बाम्णों के दल़ शे जुण्जे बिश्वाषी थिऐ, से खह्ड़े हुऐ, अरह् बुल्दे लागे, के ईनू गऐर यहूदियों का खतना जरूर करणा पड़ो; अरह् “ईनखे अज्ञाँ देणी पड़ो के तुँऐं ऋषी-मूसा खे भेंटे गुऐ अज्ञाँ निय्म के मुँताबिक खतना की बिधी-बिधान का पालण करोह्।”

⁶ तबे प्रभू यीशू के खास-चैले अरह् माँने-गीणें बुड़े बुजूर्गो लोग ईयों बातो की बारे दे बिचार कर्णो खे कठै हुऐ।

⁷ जबे बैजाऐ बाद-बिबाद हंदा लागा, तबे संत्त-पतरस ऐं ऊबे खह्ड़े हऐयों बुलो: “हे भाईयों! तुऐं जाँणों ऐ के पंण्मिश्वर ऐ शुरू शा ही तुओं लोगो मुँझ्शा मुँह ही च़ूणीं-छ़ाँटी थुवा; के गऐर-यहूदी लोग मेरे मुँख्ह शी खुषख्बरी का बचन शुँणों अरह् बिश्वाष करह्।

⁸ मंन के पर्ख्णों वाल़े, पंण्मिश्वर ऐ तिनखे भे अमाँरे जेष्णीं पबित्र-आत्त्मा देऐयों तिनकी गुवाऐ-शाज़्त्त देऐ थंऐ;

⁹ अरह् बिश्वाष के जाँणें तिनका मंन भे शुद्ध करियों, आँमों मुँझी अरह् तिनू मुँझी किऐ भेद्-भाव ने थंऐ थंई।

¹⁰ तअ तबे तुँऐं कैई पंण्मिश्वर पर्खी लुवा? के ईनू गऐर यहूदी चैले की टाटी गाशी ऐष्णों शँमाँऐ थऐ लो; जिन्दे का भार ना तअ अमाँरे पुराँणियाऐं के थागियों थिया, अरह् ना अमाँरे थागिन्दा?

¹¹ होर, ऐजो तअ पाक्को असो; के जेशे दाँई ऐ प्रभू यीशू की कृपा शा छुट्कारा पाँदें; तेष्णा ही आँमें भे पाँदे ऐं।”

¹² जबे बादी खुम्ल़ी के लोग चुप-चाँण संत्त-बरनबास अरह् संत्त-पौलुस की बातो शुँण्दे लागे, के पंण्मिश्वर ऐ तिनके जाँणें गऐर-यहूदी मुँझी कैष्णें-कैष्णें बड़े चींह्न-चंम्त्तकार अरह् नोंखे-नोंखे काँम-काज़ देखाऐ थुऐ।

¹³ तिन्ऐं जबे बुली पाओ, तअ याकूब बुल्दा लागा, “हे भाईयों! मेरी बातो शुँण्णों।

¹⁴ शमौन ऐ आँमों खे बुलो, के पंण्मिश्वर ऐ कैशे-कैशे दाँई गऐर-यहूदियों मुँझी; आप्णें नाँव खे ‘खास लोगो’ च़ूण्णों-छ़ाँट्णों की कृपा करी थंऐ।

¹⁵ ऐजो ऋषियों की बरंम्बाँणी के मुँताबिक ही असो; किन्देंखे के पबित्र-ग्रन्थों दो लिखी थो:

¹⁶ ऐजो पुरो हंणों गाशी, हाँव पाछू आँऊबा, अरह् दाऊद की ढल़ी अंदी रंहणों के जागा हजो: बंणाँऊबा। हाँव तेस्के घराँच़ौ हजो: ही बंणाँऊबा; अरह् तिनू हजो खह्ड़े करूबा,

¹⁷ ईन्देंखे के ओके गऐर यहूदी लोग जिनू मुँऐ आप्णें नाँव शे आप्णें बंणाँऐ थुऐ, सेजे ही लोग प्रभू जुह्ले,

¹⁸ ऐजी सेजी ही प्रभू! की धाव असो; जुण्जी ज़ूगौ शुभी ईन बातो पर्गट कर्दे आऐ रूऐ।

¹⁹ “ईन्देंखे हे भाईयों! हाँव ऐसी नंत्तिजे गाशी पंह्ईच़ीं रूवा, के जुण्जे गऐर-यहूदी लोग, पंण्मिश्वर की ढबै शे च़ूणें-छ़ाँटे ज़ाँव; तिनू गाशी ऋषी मूसा खे भेंटे गुऐ अज्ञाँ निय्म का भार-बोह्झ ने पाऐ;

²⁰ परह् पत्र लीखियों तिन खे बुली दियों: के तुऐं लोग मुर्त्तियों की गंन्दगी शे, अरह् च़ूरी-जारी शे, अरह् गल़ा घूट्टै हलाल करें अंदे बंईच़ियों के माँस शे, अरह् लह्ऊँ के खाँणों-पीणों शा, पहरेज करियों दुर्के ही रूऐ।

²¹ किन्देंखे के ज़ूगौ-ज़ूगौ शुभे, नंगर-नंगर दे ऋषी-मूसा की ईन बातों के प्रचार कर्णो वाल़े असो; जुण्जे हर देस बिषाँव के देसे यहूदी च़ौत्रें दे ऋषी मूसा खे भेंटे गुऐ अज्ञाँ निय्म पढ़ो अरह् शुँणाँव ऐ।”

गऐर-यहूदी बिश्वाषी खे पत्रीं

²² तबे बादी कलीसिया की राजी बंन्दी शी खास-चैले अरह् यहूदी ठह्गड़ै ऐं पाक्को कोरो, के तिनू लोगो मुँझ्शे किऐ लोग च़ूणी-छ़ाँटियों संत्त-पौलुस अरह् संत्त-बरनबास आरी बड़े नंगर अन्ताकिया खे डेयाल़े ज़ाँव; तबे तिन्ऐं दो आदमी च़ूणें-छ़ाँटे; जुण्जे भाई-बंईणों मुँझी मुँख्या जाणें-माँणें लोग थिऐ, मतल्व यहूदा, जेस्खे बरसब्बास बुली थिया; अरह् सीलास दुईन्ने डेयाल़े;

²³ अरह् तिनके हाथै ऐजी पत्री डेयाल़ी जिन्दो लिखी थो थियों: के “खास-चैले अरह् यहूदियों के ठह्गड़ै लोग; तुओं सोभी भाऐ-बंईणों खे, अनताकिया, सीरिया, अरह् किलिकिया, के गऐर-यहूदी, भाऐ-बंईणों खे नमंष्कार करह्।

²⁴ आँमें शुँणी थो, के ईथै शे किऐ बाईले लोग, जिनखे आँमें किऐ हंक-अधिकार ने देऐ थंई थी; से तुओं कैई आऐ, अरह् तिन्ऐं तुवाँरे मंन चंच्ल़ अरह् दू:च़ींत्तै करी दिते; परह् तिनू आँमें ने डेयाल़ी थंई थी, से झूठै थिऐ।

²⁵ ईन्देंखे आँमें ऐक चींत्त अरह् ऐक मंन हऐयों ठीक संहम्झियों, च़ूणें-छाँटै अंदे आदमी, आप्णें प्यारे बरनबास अरह् पौलुस की गईलो तुओं कैई डेयाल़ी थुऐ।

²⁶ ऐजे तअ ऐशे आदमी असो, जिन्ऐं आप्णें प्राँण अमाँरे प्रभू यीशू मसीया के नाँव खे खत्रे दे पाऐ थुऐ।

²⁷ ईन्देंखे आँमें यहूदा अरह् सीलास डेयाल़ी थुऐ, जुण्जे आप्णें मुँहों शी भे ऐजी बातो तुओं कैई बुल़्लै।

²⁸ “पबित्र-आत्त्मा के अरह् अमाँरे ऐजो ठीक जाँणियों, के ऐजी सब जरूरी बातो के सुवाऐ; तुओं गाशी ओके किऐ भार-बोह्झ ने पाँव;

²⁹ तुँऐं लोग मुर्त्तियों गाशी बल़ी चड़ाऐ अंदो माँस शे, अरह् लह्ऊँ के खाँन-पान शे, अरह् गल़ा घूटै अंदे बंईच़ियों के माँस शे, अरह् च़ूरी-जारी शा परेज करे; अरह् ईन्दें शे आपु बंचियों रंहणों शा तुवाँरा कल्याँण असो; ‘तुवाँरा भला हों’।”

³⁰ तबे से तेथै शे बिदा हऐयों अन्ताकिया दे पंह्ईचे, अरह् जबे तिन्ऐं मंडल़ी कंट्ठी करी, अरह् तबे तिन्ऐं सेजी पत्रीं तिनखे देऐ दित्ती।

³¹ तिनू लोगे ऐं जबे सेजी पत्री पढ़ी, तअ तियों पत्री पढ़ियों सेजे मंडल़ी के लोग बैजाऐ आँनन्दित्त-खूशी हुऐ।

³² यहूदा अरह् सीलास आपु भे ऋषी थिऐ; अरह् तिन्ऐं भे भाऐ-बंईणों खे हिमम्त्त देऐयों बिश्वाष दे पाक्कै करे।

³³ से किऐ देसे तेथै रंऐयों, बिश्वाषी भाऐ-बंईणों शी शाँण्त्ति भेटियों बिदा हुऐ; अरह् से आप्णें डेयाल़्णों वाल़े कैई पाछ़ू हुटे।

³⁴ (परह् सीलास के तेथै रंहणों आछो लागो।)

³⁵ संत्त-पौलुस अरह् बरनबास अन्ताकिया दे ही रूऐ: अरह् ओकी भहूते लोगो कैई शे प्रभू के बचन का प्रचार कर्दे अरह् खुषख्बरी शुँणाँदें रूऐ।

दुज़ी प्रचार के यात्रा दे पौलुस अरह् बरनबास मुँझी फूट

³⁶ कुछ देसो बित्त्णों गाशी संत्त-पौलुस ऐ संत्त-बरनबास खे बुलो, “जेसी-जेसी नंगर दा आँमें प्रभू का बचन शुँणाँया थिया, चालो, हजो तेथै ज़ाऐयों आप्णें बिश्वाषी भाऐ-बंईणों का शुज़ा करूबे।”

³⁷ तबे बरनबास ऐ यूहन्ना जेस्खे मरकुस बुली थिया, तेसी आपु आरी साथी नींणों का बिचार करा।

³⁸ परह् संत्त-पौलुस ऐ ऐजो ठीक ने संहम्झी, के जेने आदमी ऐ ईनू पंम्फूलिया दे छ़ूड़ी दित्ते थिऐ; अरह् जेने हमाँरे काँम-काज़ दा किऐ भे हाथ ने लाई, कियों आँमें ऐसी आदमी हजो भे आप्णीं गईलो नींयों?

³⁹ तबे: ईन्दें गाशी दुई मुँझी, ऐत्रा जादा मंत्त-भेद् हऐ गुवा; के से ओका ओकी शे ज़ोई हऐ गुऐ; तबे संत्त-बरनबास ऐ मरकुस आप्णी गंईलो नींहयों पाँणी के जहाँजो दे कुप्रुस टापु दे हुटे।

⁴⁰ परह् संत्त-पौलुस ऐ सीलास छाँटा, अरह् भाई-बंईणों शा पंण्मिश्वर के कृपा दा देऐयों, संत्त-पौलुस तेथै शा चाल पड़ा;

⁴¹ अरह् से सीरिया, किलिकियाँ, की कलीसियों दा घुमियों; अरह् ऊकी बादी कलीसिया बिश्वाष दी पाक्की करदा रूवा।