2 कुरिन्थियों 1 - Sirmouri

नंमष्कार

¹ संत्त-पौलुस के ढबे शा जू पंण्मिश्वर के हिछ़या शा मसीया यीशू का खास-चैला असो, अरह् अमाँरे भाऐ तीमुथियुस की ढबे शा पंण्मिश्वर की तियों कलीसिया के नाँम, जुण्जी कुरिन्थस नंगर असो, अरह् बादे अखया ईलाके के पबित्र लोगो के नाव:

² अमाँरे परंम-पिता पंण्मिश्वर अरह् प्रभू यीशू मसीया की ढबे शी तुँओं खे कृपा अरह् शाँण्त्ति भेट्दी रंह्।

पंण्मिश्वर का धन्यबाद करणा

³ अमाँरे प्रभू यीशू मसीया के पंण्मिश्वर अरह् बाबा का धन्यबाद हुआ चेंई, जू दया-रंय्म का पिता अरह् हर प्रकार की शाँण्त्ति का पंण्मिश्वर असो।

⁴ से अमाँरे ऐक नाँम दु:ख-कल़ैष दी शाँण्त्ति दियों; जू आँमें तियों शाँण्त्ति के जाँणें जू पंण्मिश्वर आँमों खे दियों, तिनू ओकी खे शाँण्त्ति देऐ सको; जू साँत्त-भाँत्ते दु:ख-कल़ैष दे पड़े अंदे असो।

⁵ किन्देंखे के जैष्णें मसीया के दु:खो के आँमें हिस्सेदार असो, तैष्णें ही आँमें तियों शाँण्त्ति दे भे मसीया के जाँणें हिस्सेदार असो।

⁶ जे आँमों दु:कल़ैष भेटो, तअ से तुँवारी शाँण्त्ति अरह् छुट्कारे की ताँईऐं असो; जिन्दें का असर लई तुँऐं धीरज-सबैर करियों सेजे दु:ख-कल़ैष संऐ पाव, जुण्जे आँमों भे सहणें पड़ो।

⁷ अमाँरा भूर्षा तुवाँरे बारे दा पाक्का असो, किन्देंखे के आँमें जाँणोंऐं, के तुँऐं जैष्णें अमाँरे दु:ख-कल़ैष दे, तैष्णें ही अमाँरी शाँण्त्ति दे भे बराबर के हिस्सेदार असो।

⁸ हे भाऐ बंईणों, आँमें ने चहाँदें के तुँऐं अमाँरे तेसी दु:ख-कल़ैष शे अजाँण्दें रंह्, जू आसिया ईलाके दा आँमों गाशी पड़ा; आँमें ऐशे बड़े भारी बोझ़ थाँई दबी गुऐ थिऐ, जू अमाँरे बष का ने थी, ऐतै ज़ुगा के आँमें आप्णों तारी पाओ थियों, अरह् आँमें तबै जीऊँणों के आश भे छ़ुड़ी पाऐ थी।

⁹ अरह् आँमें ऐजो जाँणी पाव के ऐतलो अमाँरी मंऊँत्त नंजीक असो, तबे अमाँरे आप्णा भूर्षा च़ूटी गुआ थिया, परह् पंण्मिश्वर जू मरे अंदे मुँझ्शे भे ऊबे जीयाल़ो,

¹⁰ तिन्ऐ ही आँमों मऊँत्ती के मुँहों शे बचाऐं; अरह् तिन गाशी अमाँरा ऐजा भूर्षा असो, के से हजों भे आँमों बचाँदें रंह्दे।

¹¹ तुँऐं भे मीलियों प्रार्थना के जाँणें अमाँरी सहाय्ता कर्दे, के जू बर्दांण भहीते के जाँणें आँमों भेटा, तिन्दे के जाँणें बैजाऐ लोग अमाँरी ढबे शा पंण्मिश्वर का धन्यबाद करह्।

संत्त-पौलुस की यात्रा दा बद्ल़ाव

¹² किन्देंखे के आँमें आप्णे बिचारो के गुवाऐ-शाज़्त गाशी तारीफ करह्, के संईसारी दे प्रभू यीशू के जाँणें तुवाँरे बिचो दा, अमाँरा चाल-चल्ण पंण्मिश्वर ज़ूगा ऐशा पबित्र अरह् सच्चाई आरी थिया, जू देह्-शरीर की अज्ञाँ शा ने परह् पंण्मिश्वर की कृपा आरी थिया।

¹³ आँमें तुँओं खे ऊको किऐ ने लिख्दे, सिर्फ सेजो जू तुँऐं पढ़ो, अरह् माँनों ऐ, अरह् मुँह ऐजा भुर्षा असो, के आखरी तोड़ी भी तुँऐं माँन्दें रंह्दे।

¹⁴ जैष्णों तुँओं मुझ्शो कंई ऐ मानी पाव, के आँमें तुवाँरे तारीफ का कार्ण असो, तैष्णें ही तुँऐं भे प्रभू यीशू के देसे अमाँरे बारे दा तारीफ का कारण बणले।

¹⁵ तैसी ही भूर्षे शो हाँव चहाऊँ थिया, के आगे तुँओं कैई आँऊ, के तुँओं आँमों दे:ख्णों का ऐक ओका मोंका भेंटो,

¹⁶ अरह् तुँओं कैई शा जाँदी बई मकिदुनिया खे जाऊँ, अरह् तबे मकिदुनिया शा पाछु तुँओं कैई आँऊ; अरह् तुँऐं मुँह यहूदिया की ढबे किऐ आगुड़े तोड़ी डियाल़ो।

¹⁷ ईन्देंखे मुँऐ जे ऐजी हिछ़या करी, तअ कियो मुँऐ किऐ याँणीं मंत्त-शीख दे:खाऐ? के जुण्जो किऐ कर्णो चहाऊँ, कियों देह्-शरीर के मुँताबिक कर्णो चहाऊँ, के हाँव बातो दी “हाँ के हाँ” भे करू, अरह् “नहाँ के नहाँ” भे करू?

¹⁸ पंण्मिश्वर साच्चा गुवाह्-शाज़्त असो, के अमाँरे तेसी बचन दा जू तुँओं कैई बुला गुआ, के “हाँ” अरह् “नहाँ” दुईनें ने हई चेंई।

¹⁹ किन्देंखे के पंण्मिश्वर का बैटा यीशू मसीया जिनका अमाँरे जाँणें मतल्व मेरे अरह् सिलवानुस अरह् तीमुथियुस के जाँणें तुवाँरे बिचो दा प्रचार हुआ, तिन्दो “हाँ”, अरह् “नहाँ”, दुईनें ने थी, परह् “हाँ” ही “हाँ” हऐ थी।

²⁰ किन्देंखे के पंण्मिश्वर के जै-तोड़े बाय्दे असो, से ईन्दी ही “हाँ” आरी हों। ईन्देंखे तिनके जाँणें आमीन भे हऐ, के अमाँरे जाँणें पंण्मिश्वर के बड़ियाऐं हों।

²¹ अरह् जू आँमों तुँवारी गईलो मसीया दे पाक्के करह्, अरह् जिन्ऐं अमाँरा चुणाँव करी थुवा, सेजा ही पंण्मिश्वर असो,

²² जिन्ऐं आँमों गाशी छाप-मुँहर लाऐ थऐ, अरह् जाँमनी खे पबित्र-आत्त्मा अमाँरे सासो दी देऐ थऐ।

²³ हाँव पंण्मिश्वर खे गुवाह्-शाज़्त जाँणियों बुलू, के हाँव हेभी तोड़ी कुरिन्थुस दा ईन्देखे ने आई, के मुँह तुँवारी घीणों लागो थी।

²⁴ ऐजो ने के आँमें बिश्वाष के बारे दा तुँओं गाशी हंक-अधिकार जमाँणा चहाँव; परह् तुवाँरे आँनन्द-खुशी के साथी असो, किन्देंखे के तुँऐं बिश्वाष दे ही पाक्कै रंह।