1 थिस्सलुनीकियों 5 - Sirmouri

प्रभू यीशू की हजो आँवणीं खे तैयार रंह्

¹ परह् हे भाऐ-बंईणों, ईन्देका मतल्व ऐजा ने आथी, के बख्त्तो अरह् ज़ूगौ के बारे दे तुओं कैई बुलो, अरह् लिखों ज़ाँव।

² किन्देंखे के तुँऐं आपु भे ठीक जाँणों, के जेष्णाँ रात्ती चोर आँव, तेष्णा ही प्रभू को देस भे आँणों वाल़ो असो।

³ जबे लोग बुल़्ले, के “आछो असो, अरह् किऐ डोर ने आथी,” तअ तिनू् गाशी ऐकदंम अब्ल़ी बईशली, जैष्णी के पेट्भारी के ऐकदंम सुणो को चाईत लागो; अरह् तैयाँरे केशी ही दाँई भे चऐन ने पढ़दी।

⁴ परह् हे भाईयों, तुँऐं तअ ईनाँरे दे आथी ने, के सेजे देसो तुँओं गाशी चोर जैष्णें पड़ले।

⁵ किन्देंखे के तुँऐं बादे सच्चाई के जोत्त प्रकाष के अलाद असो; आँमें ना रात्ती के अरह् ना ईनाँरे के साथी आथी।

⁶ ईन्देंखे आँमें ओकी जैष्णें सुत्ते अंदे ने रंह्, परह् बीऊँजी अरह् संकने रंह्।

⁷ किन्देंखे के जुण्जे सूत्तो ऐ, से रात्ती खे ही सूत्तो, अरह् जू माँचियों ऐ, से भे रात्ती खे ही माँचिंयों।

⁸ परह् आँमें जू देसो के असो, बिश्वाष अरह् प्यार का चौग्गा बाँम्बियों अरह् छुट्कारे के भोर्षे का टूप्पा लाऐयों संकने रंह्।

⁹ किन्देंखे के पंण्मिश्वर आँमों सजा देणों खे ने, परह् अमाँरे प्रभू यीशू के जाँणें मुँक्त्ति पाँणों खे बंणाऐं थुऐ।

¹⁰ प्रभू यीशू ऐ अमाँरी ताँईऐं प्राँण ईन्देंखे दित्ते, के आँमें जीऊँदे असो, भाँव मँरी ज़ाँव, परह् जबे से हजो पाछू आँव; तअ आँमें तिनकी गईलो जीऊँदें रंह्।

¹¹ ईन्देंखे ओकी खे होंस्ला दियों, अरह् ओकी की बड़ोत्री का कारण बंणों; जेष्णों के तुँऐं करी भे लुओ।

कलीसिया खे शिक्क्षा

¹² हे भाऐ-बंईणों आँमें तुँओं खे ढाल-अरज करह्, के जू तुँऐं मेंह्न्त करह्, अरह् जू प्रभू दे तुवाँरे अगवाल़ असो, अरह् तुँओं खे शिक्क्षा दियों, तिनका आदर करह्।

¹³ अरह् तिनकी काँम-काज़ के जाँणें प्यारो आरी, तिनू बैजाऐ आदर-ईज्ज्त्त ज़ूग्गै ज़ाँणों; अरह् आपु आरी मिली-झ़ुलियों रूओं।

¹⁴ हे भाऐ-बंईणों, आँमें तुँओं सम्झाओं के जू ठीक चाल ने चाल्दे तिनू सम्झाव; अरह् डराड़ो खे दीड़-हिम्मत दियों, कंमजोर संभाल़ो, सोभी आरी संय्नशिल्त्ता देखाव।

¹⁵ सकन्नै रूऐ! कुँऐं कोसी आरी बुराई के बद्ल़े बुराऐ ने करह्; परह् सदा भलाई की ताक दे रंह्, आपस मुझी अरह् बादे आरी भलाई की ही कोशिष करे।

¹⁶ सदा खुशी रंह्।

¹⁷ सदा प्रार्थना दे लागे रंह्।

¹⁸ बादी बातो दा प्रभू का धन्यबाद करह्; किन्देंखे के तुँओं खे प्रभू यीशू मसीया दी पंण्मिश्वर की ऐजी ही हिछ़या असो।

¹⁹ पबित्र-आत्त्मा के काँम-काज़ दबाऐ ने।

²⁰ ऋषियों की बरंम्बाणीं छुटी ने जाँणें।

²¹ बादी बातो पर्खो-अजमाँव; जू आच्छ़ी असो, तिनू पाकड़ी अंदी थुऐ।

²² साँत-भाँत्ती बुराई शे बंचे अंदे रूऐ।

आशिर्बाद

²³ शाँण्त्ति का दाता पंण्मिश्वर आपु ही तुँओं पुरी रित्ती शे पबित्र करह्; अरह् तुँवारी आत्त्मा अरह् जीयाँन-प्राँण अरह् देह्-शरीर अमाँरे प्रभू यीशू मसीया के आँणों तोड़ी शुरे-पुरे अरह् नीर्दोष आछे थों।

²⁴ तुवाँरा बईद्णों वाल़ा साच्चा असो; अरह् से ऐष्णो ही करला।

²⁵ हे भाऐ-बंईणों, आँमों खे प्रार्थना करह्।

²⁶ बादे भाई-बईणों खे पबित्र दिल शा नमंष्कार करह्।

²⁷ हाँव तुँओं खे प्रभू की षौं देऊँ, के ऐजी पत्री सोभी भाऐ-बंईणों कैई शी पढ़ियों शुँणाऐ ज़ाँव।

²⁸ अमाँरे प्रभू यीशू मसीया की कृपा तुँओं गाशी हंदी रंह्।