1 थिस्सलुनीकियों 4 - Sirmouri

जीवन जू पंण्मिश्वर खुशी करह्

¹ ईन्देंखे हे भाऐ-बंईणों, आँमें तुँओं खे ढाल-अरज करह्, अरह् तुँओं प्रभू यीशू दे सम्झाँव, के जैष्णी तुँऐं आँमों शी आच्छ़ी चाल चाल्णी अरह् पंण्मिश्वर खुशी करणा शिखा, अरह् जैष्णें तुँऐं चालो भे ऐ, तेष्णे ही हजो भे बढ़्दे रंह्।

² किन्देंखे के तुँऐं जाँणो ऐ, के आँमें प्रभू यीशू के अधीन शी तुँओं खे कुण्जी-कुण्जी अज्ञाँ देऐ थई।

³ किन्देंखे के पंण्मिश्वर की हिछ़या ऐजी असो, के तुँऐं पबित्र बंणो: मतल्व बिचका-काँम शे बंचियों रंह्,

⁴ अरह् तुँओं मुझ्षा हर ऐक पबित्रता अरह् आदर आरी आप्णी तिरंई की गईलो रंह्,

⁵ अरह् ऐजे काँम लाल़्च शे ने, अरह् ना तिनू गऐर यहूदी जेष्णें जू पंण्मिश्वर ने जाँण्दी,

⁶ के ईयों बातो दे कुँऐं आप्णे बिश्वाषी भाऐ-बंऐणीं ने ठगे, अरह् ना तिनखे किऐ चाल-चाले, किन्देंखे के प्रभू ईनू सोभी पापो का बद्ल़ा लोंणों वाल़ा असो; जेष्णों के आँमें तुँओं कैई शो आगे ही चिताऐं थुओ थियो।

⁷ किन्देंखे के पंण्मिश्वर आँमों बिचकै हणों खे ने, परह् पबित्र हंणों खे बय्दी थुऐ।

⁸ ईन्देंखे जू कुँऐं ईयों शिक्क्षा निकारी जाँणों, से कोसी आदमी ने, परह् तेसी पंण्मिश्वर खे निकारा जाँणों जू आप्णी पबित्र-आत्त्मा तुँओं खे दियों।

⁹ परह् भाई के प्यारो के बारे दो ऐजो जरूरी ने आथी, के हाँव तुँओं खे किये लिखू, किन्देंखे के आपु मुँझी प्यार थंणों, आँमें आपु ही पंण्मिश्वर कैई शो शिखी थो;

¹⁰ अरह् मकीदुनिया के बादे भाऐ आरी ऐष्णों ही प्यार करह्। परह् हे भाईयों, आँमें तुँओं सम्झाँव के हजो भे बिश्वाष दे बढ़्दे रंह्,

¹¹ अरह् जैष्णी अज्ञाँ आँमें तुँओं खे दिती, तेष्णें ही चुप-चाँण रंहणों अरह् आप्णें-आप्णें काँम-काज़ दे लागे अंदे रंह्, अरह् आप्णे-आप्णे हाथे कमाणों की कोशिष करह्;

¹² जू बाईले लोगो कैई शी आदर-ईज्ज्त्त भेंटो, अरह् तुवाँरे कियों भी चींजो की कम्मी ने हो।

प्रभू की हजो आँवणीं

¹³ हे भाऐ-बंईणों, आँमें ने चहाँदें के तुँऐं तिनके बारे दे जुण्जे मँरी रूऐ, तिन्दे के बारे दे अजाँण्दे रंह्; जू कद्दी ऐशो ने हईयों के तुँऐं तिनू ओकी जेष्णाँ शोग पाल़ो जिनके प्रभू दा भोर्षा ने आथी।

¹⁴ किन्देंखे के जे आँमें बिश्वाष करह्, के प्रभू यीशू मंरे अरह् ऊबे जीऐ, तअ तेष्णे ही पंण्मिश्वर तिनू भी ऊबे जीयाल़्दे जू प्रभू यीशू गाशी बिश्वाष करियों मंरी रूऐ।

¹⁵ किन्देंखे के आँमें प्रभू के बचन के जाँणें तुँओं खे ऐजो बुलो, के आँमें जू जीऊँदे असो, अरह् प्रभू के आँणों तोड़ी बचे अंदे रऊँबे, आँमें तिनू मंरे अंदे शे आगे ने बड़्दी।

¹⁶ किन्देंखे के प्रभू आपु ही स्वर्गो शे ऊदे आँदे; तेसी बख्ते लेल्लापूर, अरह् मुँख्या दूत का शब्द शुँणाई पड़दा, अरह् पंण्मिश्वर की तूरी फूकरी ज़ाँदी; अरह् जू मसीया दे मँरी रूऐ, सेजे ही आगे ऊबे जीऊँदे।

¹⁷ तबे आँमें जू जीऊँदे अरह् बंचे अंदे असो, आँमों भे तिनकी गईलो बाद्ल़ो मुझी ऊबे टिप्दे, के बाद्ल़ो दे प्रभू कैई शे भेंटिऊँबे; अरह् तेषे दाँई आँमें प्रभू आरी संदा रह्ऊबे।

¹⁸ ऐशा ही दाँई ईनू बातो लंई ओका ओकी खे होंस्ला देऐया करह्।