1 पतरस 5 - Sirmouri

ठग्ड़ै अरह् नुऐं नहाँन्ड़िया खे सलाह्

¹ तुँओं मुँझी जुण्जे ठग्ड़ै आदमी असो, हाँव, तिनू जैष्णा ठग्डा अरह् मसीया के दु:खों का गुवाह्-शाज़्त अरह् पर्गट हंणों वाल़ी बड़ियाऐं दा साजी हऐयों तिनू ऐशे सम्झाऊँ

² के पंणमिश्वर की हिछ़या दे पंणमिश्वर की मंडल़ी के दे:ख-भाल़ करह्—कोसी दबाव दी आऐयों ने, परह् आप्णी हिछ़या के मुँताबिक कोसी लाल़च की नंजरी शी ने परह् शुद्ध सेवा-भाव शी।

³ जुण्जे लोग तुँओं खे देऐं थुऐं, तिन गाशी हंक-अधिकार ने जताऐं, परह् मंडल़ी खे आदर ज़ुगे बंणों।

⁴ जबे सेजा बड़ा जगवाल़ा पर्गट हला, तअ तुँओं खे बड़ियाऐं को मुँकुट-ताज दियो ज़ालो; जू कोद्दी भे मुँल़शाँन्दो ने।

⁵ ऐशो ही दाँई, हे नों जुवाँनो, तुँऐं भे ठग्ड़ै के बष दे रंह्, परह् तुँऐं बादे के बादे ओका ओकी की सेवा कर्णो खे नींमताई शी कमरी दी गाच़ी बाँनों, किन्देंखे के “पंणमिश्वर घम्मडी का बिरोध करह्, अरह् दींन-गरीबो गाशी कृपा कर्णो की पक्क्ष दे रंह्।”

⁶ ईन्देंखे पंणमिश्वर के तागतबर हाथो थाँई नरमाँऐं शे रंह्, जिन्दे लई से तुँओं खे ठीक बख्तो गाशी बड़ावा दियों।

⁷ आप्णे बादे फिकर तिन्ही गाशी पाऐ दियों, किन्देंखे के तिनके तुवाँरा ख्याल असो।

⁸ च़ौक्क्ष रूऐ, अरह् बीऊँजी रूऐ; किन्देंखे के तुवाँरा बिरोधी शैतान नाँदिणों वाल़े सिंह के जेष्णाँ ऐसी ताक दा रंह, के कोसी ऊपाड़ियों खाऊँ।

⁹ बिश्वाष दे पाक्के हऐयों, अरह् ऐशो जाँणियों तैसका साँम्णा करह्, के तुवाँरे भाऐ बंईणों भी जू संईसारी दे असो, से ऐष्णें ही दु:ख संह्।

¹⁰ ऐबे पंणमिश्वर जू बादी कृपा का दाता असो, जिन्ऐं तुँओं मसीया दे आप्णी सदा की बड़ियाऐ खे बय्दी थुऐं, तुवाँरे ऐगड़ी खे दु:ख भूगणों पाछ़ी, आपु ही तुँओं साचे-पाके अरह् तागतबर कर्ले।

¹¹ तिनको सदा को राज ज़ूगौ-ज़ूगौ तोड़ी रंह्। आमीन।

आखरी नमंष्कार

¹² मुँऐं सिलवानुस के हाथे, जेसी हाँव बिश्वाष ज़ूगा भाऐ जाँणू, दाँणिंक लिखियों तुँओं सम्झाऐ थुऐ, अरह् ऐजी गुवाऐ-शाज़्त देऐ थऐ, के पंणमिश्वर की साची कृपा ऐजी ही असो, ईन्दी ही पाक्के डटे अंदे रूऐ।

¹³ जू बेबीलोन दे तुवाँरे जेष्णें चूंणें-छ़ाटे अंदे लोग असो, से अरह् मेरा बैटा मरकुस तुँओं खे नमंष्कार बुलो।

¹⁴ पियार शी खुप्टी देऐयों ओका ओकी खे नमंष्कार करह्। तुँओं सोभी खे, जू मसीया दे असो, तिनू सोभी शाँण्त्ति भेटो!